كله بيعدي... سودت ⚫⚫⚫ البروفايل

إحساسك بعدم الراحة😣 ممكن تترجمه علي شكل إنفعال أو عصبية أو قلة نوم وأكل أو تعمل ذيي: كل التفاصيل دي وكمان تغير صورة البروفايل⚫. طبعا كانت شارة سودا في الفيس والواتس والفايبر وأنا الوحيدة اللي مش مستغربة لكن كل الناس كانت قلقانة 😓 ومندهشة😯. لدرجة إني لما رجعت وغيرتها كان السبب كلمتين سمعتهم من ناس غالية علي قلبي أوي 😍 وكأنهم مستقويين 💪 ع الدنيا بيا أنا ومش قادرين يقبلوا فكرة إني off.

ده اللي حصل في يوم ما وبعد كده الدنيا اتقلبت، مش كنت متخيلة إن كل ده هيحصل وإن كل الناس هتفهمني غلط ❌ وتفسر الموقف غلط ❌وللأسف تقريبا الكل أجمع علي نفس الفكرة وبروزوها جوا نفس الإطار .

أنا لقيت نفسي شايفاها ( والهاء تعود ع الدنيا) كده⚫ مش أكتر ده بجد يعني مش مبالغة. هي لونها أدام عيني كان⚫ أسود كنت شايفة كل حاجة لونها غامق, نفسيتي كانت مقفولة عن كل حاجة حتي الكلام 🤐, مش كنت عاوزة حاجة ولا بتمني حاجة ولا بفكر في حاجة باختصار off.

قفلة النفس 😥 وقلة الكلام 🤐وحتي الوجع😣 اللي مش سهل يوصفه كلام مش بيكون معناه إنك راضي, إنما بيكون قلة حيلة... تعب من التبرير... دليل ع الاستسلام... أو مافيش فايدة...

مشاعرك في الوقت ده بتكون مريضة محتاجة رعاية وراحة، لأن في مواقف بتفرض نفسها علينا وعشان نكون أد الموقف ونصمد للنهاية بنسحب من طاقتنا بشكل كبير، بعد ما ينتهي الموقف بخيره وشره بتلاقي نفسيتك فصلت منك فجأة ومحتاجة إعادة شحن، بس أنا مش كنت عارفة أعيد شحنها😔.

بعض الظروف بتفرض علينا رد فعل أقوي مننا شخصيا وعشان تقوي عليها بتكون مضطر تيجي علي أعصابك جدا وبتجهدها وتحملها أكتر من قدرتها، كمان في ناس التعامل معاها ممكن يشوه ويغير من ملامح شخصيتك لأنها كتير مختلفة عنك ومن الطبيعي إنك تتجنبهم بس ده قرار مش سهل.

بعد ما تبعد عنهم بتحاول تلحق نفسك عشان تجاهد نفسك ومش تعمل ذيهم ولا تسمح لهم يشوهوا كل جميل جواك ولا انهم يحولوك لمسخ انت نفسك لا عارفه ولا قابله.

الموقف ممكن يكون عند حد تاني أصعب مني كتير ذي مثلا لو أنت بتبعد عن حد روحك فيه😍 ومتعلق بشكل قوي فيه باختصار روحك عنده وسكن قلبك 💕 انت مش بس بتضغط علي أعصابك أنت حرفيا بتدمر نفسك؛ لكن أحيانا بيكون الطريق مسدود ومافيش أي وسيلة إنقاذ هتساعد إن العلاقة تكمل... تتطور... تنجح، بتقرر تبعد.

لأننا بشر وبنتأثر بتراكمات جوانا وضغوطات حوالينا بتحصل قفلة مش أكتر, بس في لحظة بنرجع نفتكر إن فعلا كله بيعدي... وحش حلو هيعدي... صعب سهل هيعدي... حتي الكسرة وسحبة الروح برضو بيعدوا... في النهاية بنتعلم وبنتغير وبنكون أقوي👍

فجأة بتلاقي حاجة جواك بتقول لك:

I know you are tired. I know you are physically and emotionally drained. But you have to keep going!

في عز ما أنت لوحدك بتحارب المود ده هييجي الوقت وتدرك إنه ممكن يغرقك وإنك لازم:

⬅️ تنجي بنفسك قبل ما يسحبك للبراميل وتموت مقهور😣,

⬅️ تعرف إن الخيرة لازم تكون فيما اختاره الله🖒,

⬅️ تفهم إنه مش صحي أبدا أنك تسمح لأي شئ يسود⚫ الدنيا أدام عيونك الحلوة... الاكتئاب والضيق مش لايقين علي نفسك الراضية... الحزن مش مخلوق عشانك... لازم تكون نفسك عزيزة ومدللة أكتر من كده...

⬅️ تدرك إن الابتلاء بييجي لحكمة من رب العالمين, بس لازم كمان نصدق إن اللي كتب عليك الكسرة قادر يجبرك, وذي ما كتب عليك المرض قادر يشفيك, وذي ماخللاك في الدنيا دلوقتي وحيد قادر يزرع كمان الونس حواليك.

✅ دي اسمها سنة الحياة ابتلاء... ثم دعاء... فاستجابة

السنة دي لو أدركناها... استقمنا!

#وجهة_نظري احنا مش بنزعل لأننا بنخسر حد أو حاجة احنا بنزعل علي نفسنا, بس الأولي بعد ما ندرك الحقيقة دي إننا نتعلم نكسب نفسنا ونعززها وننجي بها قبل ما تسجنها ضلمة #الوجع

عشان كده رجعت أدركت إن " أحب هدايا رب العالمين هي القدرة علي البدء من جديد "

" كله بيعدي... سودت⚫ البروفايل وانا آسفة🙏 "

أميرة

#amira_ibrahim_neues_leben