أزعم انني آخر من يكتب بلهجة عامية مناطقية ( لهجة أهلي في شمال حلب كما في كل سوريا ، المُستعمرة حالياً من قبل فوضى أرادتها طغمة نظام الوضاعة والإجرام و عصابات تديرها دول ) والهدف من ذلك ( العامية ) كي تصل الفكرة الى بعض غرباء كشفت عن خبثهم إرهاصات الثورة في بلدي ، هذه الثورة ، التي حاول كثيرين تحويلها الى مرتع لتجارب ومستوعب لنفايات التخريب والتخريف بأبشع صوره ، ربما نجح البعض بأماكن واغتنموا ضعف التجربة في ادارة الثورة ، لكن في المطلق تلك النجاحات كانت أصلا فخ اختبار ، وقع فيه أصحاب المشاريع الغريبة عن الجسد السوري .

كذلك أدون شديد اعتذاري لمن لا يروقه المسرد المصحوب ، ولا اخفيكم بتُ أتفحص عيوب جمّة رافقت تكويننا البيولوجي نظرة بعض المخاليق التي هبطت بعد 1400 عام لتسرد عن حين كان العالم كله لا يتعدى 100 خيمة وماشية تسرح في مقدمة البشر كدليل للخصوبة والطبيعة والحياة .

قلة منهم امتلكوا ثقافة نتيجة اقامتهم في الغرب لكنهم في ذات الوقت مازالت تسيطر على مخيلاتهم بضع سموم ، ويفلتون دقونهم كيفما اتفق ، فيما أعين حولاء عن دور المرأة وحضورها ، فبدل ان يندغم هؤلاء بمشهد مواز ، راحوا يهيجون بثيرانهم ونزواتهم فتاوى اقّل ما يقال فيها هُبلٌ وجنون بلا طائل .

ــ في المسرد ( الملحق ) بعض محكيات شفوية ، هي كناية عن ” طق حنك و براغي ” نشرتها على الشبكات الإجتماعية وسامحونا اذا لم يطالكم شيء منها ، في ذات الوقت أعدكم بالوصول إليكم حيث أنتم متيمون . لنبدأ أول برغي بالوعي الهمجي

1. جنّة تشليح : واحد مرضان طالع من ” تورا بورا ” هدد بقتلي حتى لو كنت بالصين ، جاوبتو : يا غبي ، وقتها أنا بصير شهيد وبشلحكن كل النسوان

2. طقتني بوسهِ : وينك وليه دبيه ،، صارت تبكي مثل الزغار وإجتمعو علينا الجيران ،، سألوها شو القصة ، قالت من وقت ما تجوزنا نفسي إسمع هيك حركوشة . وفجأة هجمت عليي قدام العالم وطقتني بوسهِ ، وبلشت الجماهير بالتصفيق .ـ كنت عم إمزح … هيدا تمرين عا كذبة نيسان ومحسوبكن مهجور من أول اسبوع بالثورة .. عاشت مرتي عكس الحرية

3. فصل ملون: تشبه الزغار اللي بنشوفهن بالدعايات حاملة سلة ورود وجزدان زغير عا خصرا .. ناولتني الحمرا الغامغة ، يمكن ﻻني كنت مفنجر عيني عليها .. حطيت بالمطمورة مرتين ، مرة ﻻنه عمرها ( 10 سنين ) وعم تشتغل ، ومرة لأنها وعدت تدلني عا مشتل كبير فيو كل اﻻلوان .. اختفت شوي ورجعت معها ولد شكلو وهوي عم يطلع صوبي ما بيطمن .. يمكن ما حبني ، مع انه حاط براسو يوصلني ويرجع لعند رفيقته ..

طلعنا بالميترو ، وبعدين بالباص ، مشينا شوي واشرلي عالمشتل .. تفحصت محل ما واقف ، تلفتت شوي حواليي ، ابتسمت وهزيت براسي وإذ نحن جنب المفرق اللي بيودي عابيتي وفهمت لييه الولد ما حبني ، لأنه بسلامتو طلع ابن الجيران – نيالي شو طلع بدي شغل ، اذا صرلي ساكن بالمنطقة اكثر من سنة وبعدني ما بعرف كم مفرق بيودي عا بيتي .

4. شجرة بتلمع : كان في شوية شجر وكم غابة ، بهمة براميل الحب الطايرة احترقو نصن … واليوم بسلامة فالنتاين ، بدل ما الشباب يشترو الورود بلشو يشلعو الشجر ، الصبايا كانو فرحانين ، يمكن هيك اسهل وفريش ، نصيحتي وعن خبرة ترفيهية : أحلى شي ورود البلاسيتك تنشرى مرة وحدة وبتلمع

5. جحش مكتف : دخلت عامطعم تبع اﻷلف نجمة ..النسوان فيه أكثر من عدد سكان مصر .. وانا بطبيعتي مزوح واحيانا بصفن لما كون بحالي .. فجأة واذ قدامي وحدي بتشبه تبع المسلسلات المصرية، هوديك النسوان اللي بتكون الوحدة رابطا راسا و بتنطح .. سألتني من وين انت ؟ تلبكت وبسرعة سألتها : عندكن فول ؟ وفرطت الدبي من الضحك .. ( طبعا سؤالي كان بغرض الفكاهة ) انا صرت خاف اكثر جرصتني خصوصا لما صارو الناس الحوالينا يتطلعو صوبي .. ست الكل طلعت مصرية من ام ألمانية .. عزمتني عا حفلة بنتها ﻷنو صار عمرا 18 سنة ، ( اخ لو كانت 30 سنة والله بكتب كتابي عليها.. واصدر فتوى.) تكرفت و طلعت من المطعم بعد نص ساعة من طق حنك بيخلي الواحد يبكي .. حسيت أنو ريحة الفول والملوخية رح تكون عنجد بالمطعم .. صرعت راسي مع اني بحب الحكي .. بس مو مع هاي اللي بتشبه قصص عنتر بيكييا .. حبيت احكي هاي القصة مشان ما فوت بالحيط إﻻ ومعي صبية حلوة عازمتني عا مطعم ” فلافل ” او طبق ” مامونية ” … يا الله شو اشتقت ﻷهلي ومعشر شعبنا والبلد . يلعن وﻻية “بادن بودنبيرغ ” على “وﻻية باير ” كل نسوانهن تخينات وانا بكره حالي لما شوفهن كأنن عم ياكلو ليل نهار جحش مكتف مع شحمو .

6. دب : في كثيريين ما بيهنالن العيش إلا إذا الواحد تعامل معهن على اساس انن قاصرين ، او يعتبرهن شي دب ، ببساطة لأن هيدا المخلوق مُبرر إله شو ما عمل – وكما تعلمون ايها العشاق … الدببة لا يصلحون للحب

7. شارلي إيبدو : بعدن مشغولين بالحكي عن الهجوم على صحيفة " شارلي إيبدو " بالطبع الحادث ارهابي ، بكل تأكيد القتل مدان من كل الانسانية ، لكن بنفس الوقت محدا عم ينتبه بأنه الأنظار صارت متجهة خارج بلدان عم يموت فيها كل يوم العشرات من الرسل والملائكة بسوريا والعراق ولبنان ... القاتل معين حاله متحدث بإسم إله أو وثن أو حتى مجرم ، الكل عم يحكي بإسم الدين او تحت مسميات الدفاع عن الوطن ... حامي الوطن هو نفسه فالت وعم يتفنن برمي براميل الموت والكيماوي ، في الواقع كلنا منعرف ان الهجوم على" شارلي إيبدو " مرتبط بتهديدات صدرت عن مفتي النظام السوري لما قال بأنه رح ينطلق جهاديين فوق سماء أوروبا .

محدا انتبه بأنه الصحيفة المستهدفة أنجزت من سنين عدد كامل ضد مجرم الحرب بشار أسد ، لكن غباء البعض اللي اتذكروا انن مسلمين تحت تأثير صدمة الخروج من الديسكو بدون ما يطبقو وﻻ حورية .. هدول وقعو بفخ العداء للصحيفة تحت مسمى الدفاع عن رسول الاسلام وما انتبهوا بأن حالة التجيبش ساعدت المنظمات الجهادية المأجورة وعملت منن أبطال بقصة اصلا كلها تأسست لترويح الدعاية الارهابية بالغرب .

8. زواج طفلة : بهيم مأصل ومختوم ، بدو بنت بعمر بنت بنتو، قال مثل بنتي وكمان عم يشهد الله ،،، ليش لا .. لأنو مفكر الله فاضي إلو أو عم يكزدر حواليه .. بدل ماتحلف يا محترم … و يا بهيم عطيني مبرر واحد لحمير داعش ومعشر المشايخ تاركين كل عهر العالم وعم يتخصصو بإصدار فتاوى خاصة محورها بين فخاذ النساء ؟؟؟ ،، هدول البهايم أنفسهن عم يشرعو بزواج الطفلة اذا كان عمرها تخطى 8 سنين ، وكمان ممكن لو سمحتو بدي واحد يدلني على شي شرشوح مقتدر عمرو أكثر من 60 ما عم يبرم عا صبية عمرا بعمر بنت بنتو ؟؟ خصوصا بالدول العربية الإسلامية ولله الحمد … قال بنتي قال … روح اندعش ياه .. صحيح إنك بهيم مختوم بشمع أحمر

9. بإسم الدين : وحق الكعبة والكنيس والكنايس ودور العبادة تبعهن … بدهن إيمان ووساخة بلا حدود … يا بهاليل الفتن … اصابعنا غافية فوق كومبيوتراتنا .. ارواحنا عم ترفرف مثل دقات قلوب شعبنا … شبعنا موت يا إللهكم .. وهاي صار فوقنا حبة بركة .. ومن شوي يا الله اجاني صوت بعيد عن قصة شعب عم يندبح بإسم اﻻمم .. شعب عم يندبح بإسم الدين .. شعب عم يجوع وعيون واسعة مغمضة … وحدهن عم يصرخو بإسمك يا الله .. وغلاوتك عندي ياالله وحق الكعبة والكنيس والكنايس ودور العبادة ما اكثرها ياالله وقلة الايمان ما اكثرو يا الله ..

10. من شوي : تذكرت منامي … وصلني صوت بعيد .. اصوات بترعد بإسم المقتولين بلا سسبب صراخ وتنديد بإسم شعبنا … امي و اختي وستي والطفالى الزغار وكل شهدا شعبنا …بكل تأكيد صراميهن تاج عا راسكن يا هيئة شعوب وأمم نجاسة وتصفيق على قتلنا .

11. أحلى شغلي : رح صير بابا لعشيرة قرايب من كل وادي عصا .. ما عم أمزح عنجد ، بلشت بإحصائية زغيرة بين قرايبني جمعت أكثر من 20 شب تراوحت أعمارهن بين الـ 20 والـ 27 شباب وأكثر من 47 وردة وزهرة بأعمار متقاربة من الشباب ، بحسب معلومات منن ما بدهن يتزوجو من القرايبين وهيدا ناتج عن وعي ويُفضل ذلك .. بس يا جماعة هدول مجموعهن 67 شخص من وين بدي حل اشكاليتهن وجوزهن إذا كلن عايشين بالمريخ … قال أنا مستشارهن وهني قرروا أمنلهن مستقبلهن …. هيك ظلما وعدوانا .. إي والله ، دخلكن انا مين بدو يعبرني إذا صرلي عشر سنين قاعد ورا الكومبيوتر وعم اتنطوط من مقال سياسي على حقوقي على نص أدبي ونازل شرشحة بالعالم على كل الجبهات ؟؟ …. يلا حبابيبي الأفضل تعملو حفلة تعارف وتعفوني من دور البابا والماما … أنا بعدني شب بأول عمري وأزغر منكن ما بدي انفرم بشي فتوى مصدرها أمير اهبل أو قائد اجدب .

12. شانزليزيه : بعض الصبايا ( فوق الثلاثين ) عم يدفشونا على ابتكار طرق بتمشي عند نسوان جمعية فيمن .. رايح عا الشانزليزيه وبلش تطبيق على كل الجبهات … بالمناسبة اصل المرأة قالب ثلج اسألوا البرادات – ولكل قاعدة استثناء

13. مثنى وثلاثة ورباع : اصبح لازم الواحد يختصر الطريق و يتزوج أربعة .. بس أنا بدي وحدي خلنج مثل هاي الشقرا اللي عم تدق عا صــــدرا ولازم تكون لابســـا برقــــع أفغاني مشان نحمي راســــنا

14. بثار ومرتو : شهادات دكتوراه للبيع مختومة ومباركة من رئاسة مخفر المهاجرين بثار ومرتو

15. حملة للتف عليه ،،، قال لكل خمسين إمرأة رجل قّيم واحد ينكحهن… وأقول لكل ساقط يتبنى هذا الخطاب من أمثالك مليون تفلة يا واطي يا مُنحط يا خنزير .. يعني خلال أقّل من سنة بيصير عدد سكان سوريا أكثر من الصين

16. ما تسب المخابرات : الله يرحم البابا ، قلي ، ابني خليك مثل ما انت بجنانك بس تعا وعيش عنا وسبني إلي بلا ما تسب المخابرات والله طلعتك من تمو للأسد

17. شارلي إيبدو : بعدن مشغولين بالحكي عن الهجوم على صحيفة " شارلي إيبدو " بالطبع الحادث ارهابي ، بكل تأكيد القتل مدان من كل الانسانية ، لكن بنفس الوقت محدا عم ينتبه بأنه الأنظار صارت متجهة خارج بلدان عم يموت فيها كل يوم العشرات من الرسل والملائكة بسوريا والعراق ولبنان ... القاتل معين حاله متحدث بإسم إله أو وثن أو حتى مجرم ، الكل عم يحكي بإسم الدين او تحت مسميات الدفاع عن الوطن ... حامي الوطن هو نفسه فالت وعم يتفنن برمي براميل الموت والكيماوي ، في الواقع كلنا منعرف ان الهجوم على" شارلي إيبدو " مرتبط بتهديدات صدرت عن مفتي النظام السوري لما قال بأنه رح ينطلق جهاديين فوق سماء أوروبا .

محدا انتبه بأنه الصحيفة المستهدفة أنجزت من سنين عدد كامل ضد مجرم الحرب بشار أسد ، لكن غباء البعض اللي اتذكروا انن مسلمين تحت تأثير صدمة الخروج من الديسكو بدون ما يطبقو وﻻ حورية .. هدول وقعو بفخ العداء للصحيفة تحت مسمى الدفاع عن رسول الاسلام وما انتبهوا بأن حالة التجيبش ساعدت المنظمات الجهادية المأجورة وعملت منن أبطال بقصة اصلا كلها تأسست لترويح الدعاية الارهابية بالغرب .

18. مافي احلى من عبادة الأصنام ناكلهن وقت مابدنا وماحدا إلو عنّا… يلي عندو تمر يتبرعلنا بشوي بعدنا عم نبني الصنم وصلنا للرقبة

19. يا حجر : اليوم اخترت عبادة الحجر لأنو بيمتص الضجيج ويخفف عن راسي ، ويا حجر خزّن صوات اللي عم ينقتلو يا حجر

20. جهنم : الشاعر والصديق يحيى جابر يرفع لافتة غير سياسية ويؤكد بأنه أكل فروجا مشويا بدون ان يعرف طائفته …. لا تسامحه يا الله ولا تسامحني أيضا إذا قلت لك بأن شواء السوريين بات بإســــــــمك …. فأنت ” السميع البصير ، المهيب الرحيم ” فنحن لا حول بنا ولا قوة لنا ، ثم انك يالله قتلتنا بصمتك … يا أبتاهم ورب خلق يسجد بلا كلل حـــــرر عبيدك من جهنم لم يحن أوانها .

21. بخصوص النبك والرقة والأتارب :… يا مخابرات العالم وروسيا وايران وحمير القاعدة اسمعوا مليح … كل واحد منكن يضب الداعش تبعو ويسحبوا عا أقرب مفرق بضيعكن وهاي للذكرى تفوووووووو

22. عيوني وينكن ؟؟؟ انتو دايما عا بالي ، ما في خطوط ، و لا نت … حساباتكن عالفيس بوك ما فيها كلام جديد ، كل مابيصير قصف ترتجف روحي عليكن … وأنت يا زعرور الحي وينك ؟ كيف الماما وكل النايمين بمكان مخفور بالبعيد … من كم يوم حطيت بوست بإسمك ، كلمة بحبكن قليلة بحقكن … أنتو الحكي كلو و صعب الحكي

23. تفكيك وطن : عنا وطــن عم ينذبح بهمة حزب كردي وكم مهرج بإسم الإسلام والجهاد المأجور و تبع عيلة الأسد … حلمكن ما رح يستمر بشمال ســـــوريتنا .

24. مخابرات فاحش : اعتقل احد أمراء داعش واعترف بأنه مقدم بالأمن السياسي ،،، يعني بلاها هاي ” دولة العراق والشام ” صار اسمهن مخابرات مابين النهرين

25. طائفي على سنة لينين : تم تصنيفي من البعض اني كافر .. وقسم اعتبرني مهلوس … وكثيرين إكتشفو اني مُنّشق عن الطوائف .. تروتسكي وماركس مرجع طائفتي … الطريف باﻻمر عدد كبير منن ما بيعرف انه عندي عشر كتب متنوعة بين الشعر واﻷدب والسياسة ، ويمكن اذا عرفو أكيد رح يرفضو يتصفحوها.. في الواقع انا بتعامل مع محيطي اني كون سوري وكثير منسجم مع نفسي ، لهيك بشوف ما في احلى من الكفر والكلام عن الهلوسة تبعهن ومثل ما بعرف ان الشرف الكبير إلي الانشقاق عا نظافة .. و تفضلو عابيتنا قبل 30 سنة

26. حرب الله والمجاهدين : بعدني من عشرين سنة عم اقرأ اشعار الغرب الكافر الارهابي المنحط الرائع اللي وهبنا شعراء عن غير قصد … القراءة عا نظافة افضل و احسن ما جن من نصوص شعراء اﻻنابيب .. يا ريت حدا يقرأ معي بيانات السريالية ﻷنها تعبير حقيقي عن حرب الله والمجاهدين وامم الوضاعة عا سوريا … ويمكن افضل من الغوص بحال الكتاب بها الثورة

27. حبايبي الأكراد السوريين : رح احكي عا ناس أنتو ما معترفين فيهن ، يعني مساندة لمصاهرتكن يا ولاد عمي … قصدي عن تجار الدم المأجورين ، بتعرفوهن انتو أكثر مني … رح بلش بكل شفافية ووضوح … أصلا قامشلو كمدينة هي خردة تتصلح وقت بيطير الجزار بشار و شراشيحو ( البي طي طظ ) وجماعة فاحش وفشرة وداعش ،، وعرفتلكن شغلي بس ماني متأكد منها ، قامشلو أصلها قطعة من ألمانيا، وكمان نهر الفرات عم ينبع لغة عبرية، والدليل اسألو اللي تعاملو مع المخابرات وباعو الثورة بسيكارة حشيش بعثي شغل حزب إيران بلبنان … و كمان في خبرية بتقول ان جزء من سكان قامشلو عايشين بعز ونعيم أيام الصرماية حافظ ، والعلامة كانو بياعين بسطا وعيونهن بتقدح سمسرة وتجارة بدم السوريين ،، يعني هني تقريباً شعب الله المحتال .. قصص هدول بتشبه فصيلة لاجئين إجو عا أوروبا وعاملين لحالهن هيبة قدام المساكين اللي ما وصلو البلد من من عشرينن سنة …المهم الفصيلة عا اساس هني ثوار و عاشوي معتبرين حالن أنبياء وآلهة الثورة … البعض من الأكراد صار يشتغل بزنس وبكل وضوح ، وعم يروجو عن حالن بأنن هربو لأنهم صارو مطلوبين للكل ، بالفعل منظر بيضحك و أنتيكا مفكرين العالم هبلان وبلا تفكير عم ينظرو عالعالم ليل نهار ،عمم يتفهمنو ويخبرو العالم ان الأكراد من العرق الآري ، يعني ألمان ،، برأيي نعمل معهن تحالف مشان ياخذو جماعة التقسيم كلهن ويعلنو من ألمانيا ولاية على سند ورمح .. طبعا ، مصدقين ، انو قامشلو وكوبابي وما بعرف شو من كل وادي عصا بيصير عندهن مقاطعة بالإتحاد الأوروبي ، شغلتن عالكبير .. شوي شوي بلكي يساعدونا و نقدر نجيب عا ألمانيا كل الشعب السوري يعني 23 مليون اللي عم يموتو بببطئ ،،، الدم ما بيصر مي يا خيو اسألو ( البي طي طظ ) … بالفعل بدي بق هالبحصة ، الشباب ما مقصرين بنوب … إيدهن مع النظام وعينهن عالمعارضة ،، طبعا هني أبدا ما خونة ، مكانهن محجوز بإقليم طوبزستان

28. وارطان تبع كلو : في أرمني فجأة شاف عسكري واقف قدامه .. تلبك كتير وفكرو من الجيش الحر ، وعسلامته بدون تركيز حط عينه بعين العسكري و قله للعسكري ( انتي شايفي الدنيا شلون صارت ؟ بس الله كبيري ) بعد ماخلص شاف عا إيد العسكري اليسرا كلمة ( سنحرق البلد ) انفتل عقل الأرمني وارطان ، وبسرعة لحق حالوا بموشح جديد لــ للعسكري ( الله كبيري بس لازم بيشو تحرق البلد ) . قال تكبير قال ، هل الحكاية بتشبه وضع شعبنا اليوم مع الجماعات المتطرفة بعد ما دحشن بشار بالثورة ، وكلن نازلين شي ذبح حلال وشي تقنيص ، بكل الأحوال حافظين الدرس مليح وياريت ما كان في تكبير

29.سمونا كفـــار : حجــــــاب العقـــــــل لا حَل له : والله يا خيو القصة وما فيها عقولكن ملعوب فيها… ومتل مابدكن سمونا كفـــار ودمنا رخيص معليش ، لكن انتو حاطين أكتر من حجاب على عقولهن ، مسامحينكن

30.مــــارك … إيدي بزنارك ما تحذف حسابي غيرت رأيي .. سامحني لأني شرشحتك امبارح ماتواخذني كنت معصب وغيران منّك ،- ما تحذف حسابي ، جكارة بقرايبين بشار كيماوي والهمج الباعتهن أوباما… بتعرفهن هدول حمير داعش والنصرة ، دير بالك تبعتلن ربع فرنك احسن ما يتهموك بغسيل اموال ويشلحوك تعبك وتعبنا بالفيس بوك - اذا حبيت تحولي عا حسابي بزيورخ انا ناطــر حتى لو تأخر شـــحن غوار مافي مشكلة

31. متسللين : بخصوص عسكر “حزب العمال الكردي ” قلنالكن قبل فترة انو بعد انسحابهن من تركيا للعراق رح يدخلو عاسوريا ومعهن عساكر من عند برزاني .. ماصدقتو وكمان طنشتو . ، وبعد كم شهر بيصرو الشباب المتسللين من العراق سوريين من عشر ألاف سنة … احسبوها لما ينتخبوا مرشح رئاسي ـــ يعني كل كم يوم يشيلو رئيس ويحطو رئيس ، هيك ببساطة .. وحسب كلامهن عم بيقولو انو عددهم خلال سنة بيكون سبعة مليون ، وبما انو عندهن رئيس اقليم بالعراق ، شكلهن رح يخططو ليصير عندهن رئيس ثاني بسوريا .. ويمكن يفوزو بإنتخابات الرئاسة السورية برعاية بشار والأربعين حرامي .

32. وصية خزمجي : السيد شارل أيوب الصحفي الخزمجي تبع عيلة الأسد ، اليوم عم يطلب مساعدة من اهبل دمر بلد بكاملو مشان ولا شي … متل مابتعرف مافي علاج لمعالجة الأغبياء ورطوك وطلبو منك كتابة رسالة بجريدتك مشان يتبروزو قدام العالم بالشحادين ، يمكن بيبعتولك شي إصبع ديناميد أو يكتشفو بمكتبك شبكة تجسس أو شي جماعة كانو ناطرينك ويتم نحرك بالغلط مثلاً .ولا يهمك موضوعك سهل يمكن سرطان زغير بالراس .. جرب حظك ودق باب صحيفة القدس العربي سمعت انهن فاتحين فرع خاص برؤساء التحرير اللي بمثل حالتك ــ على العموم اتصل بـــ عبد الباري عطوان وحاول تشرحلو وضعك ، صحيح هيدا الأخير استقال لكن بعدو بيمون عالشباب - الله يشفيكن انت وهيدا اللي بعدو مفكر حالو رئيس .

33. حبيت العيشة بالنار : هدول اللي نازلين تكبير وتهجير وارهاب الناس بإسم الدين ، هدول الحاطين بنيتهن يشفطو النفط ويشحشطو ويجلدو ويقطعو روس اللي بيخالف طاعتهن . هدول الحابين يعملو الناس متل العبيد تحت رحمة تفجيراتهن .

34 . بنات خلنج : كل الشباب بدن صبايا بعيون ملونة وشعر أشقر وجسم أبيض وطول الزرافة ، والأهم تكون زغيرة وخلنج … أما الصبايا بدن شخص يجيهن من عالم ألف ليلة وشهوة عم يتنطوط من حصان ابيض لمرسيديس حمرا ويخطفن ويبلش تشفيط .

35. انقتلت رفيقتي : وصلتني رسائل سلخ من كثيرين ، اصحابها عم يحتجوا ويستنكروا عا كم كلمي كتبتن بنقاء روحي ابيض عن انسانة بحبها وهي اصلا رفيقة نضال ايام ماكانت دولة الأصنام بتحاسب الناس حتى على طريقة تنفس الهواء ، المهم انقتلت رفيقتي ويمكن انا كمان انقنصت وتفحمت روحي… ماكنت اتصور انو في عماء فكري وجحود بهيدا الحجم يصدر من ناس كنت متصور انن أكثر وعي وتفهم ومدنية … أنا مستعد في المرات القادمة قبل ما فكر بكتابة اي شي استشيركم ، لكن بشرط انكن تسمحولي انشر كل شي بعرفو عنكن

36. ما في منها والله : امي ، مجهزتلي مفاجأة غير شكل … طابور طويل من قريباتنا وناطرة رجعتي … أحلى أم بالدنيي والله … بس كل خوفي مايكونو نفس البنوتات اللي كنت اسمعهن عم يرددوا : ( قال باسم .. قالت رباب … و عمي منصور النجار ) وكمان خوفي تكون حاطتلي شرط تعجيزي مثلا : نفذ عملية انتحارية قدام مقر داعش وارجاع خوذ حوريتك .

37. فنتورة : الفنتورة ما بتنظف … بدنا أسيد نجربو عالأســـــد و داعش … بعدين ثاني واحد من جهة اليمين الزغير اللابس أصفر كأنو من جماعة التنسيق ما موافق يفنتر . - طلع الثاني عا ملها تحتو … يعني مسجل موقف كبير وحط رفقاتو بجيبتو

38. بالألماني : وزير ” شلمبا ” : السيد عمران الزعبي … كونك وزير أعلاف اسطبلات الأسد ، عم تأكد انو مخك اعوج … لأنو احتجاجات اسطمبول بسبب قضايا تخص التنمية الإقتصادية وابداً مش متل احتجاجات أطفال درعا …. و ياريت تخّبر جماعتك ببرقية عن الخازوق اللي ناطركن بعد كم يوم – بصراحة قليل عليك وزارة الأعلاف يجب ان تكون رئيس عصابة لأنك ” شلمبا ” أكثر من معلمك – اسأل عن المعنى بالألماني

39. سبتمبر ســـوري : الله يرحم أبنية 11 سبتمبر اللي ماتوا فيهن خمس آلاف اميركي ، من وقتها عم يتباكوا السياسيين الأميركان عليهن ، اما بسوريا السفاح بشار فسد دمر نص البلد و هجر نص شعبنا واعتقل مئات الألوف وعمل عشر” سبتمبرات ” ومجازر بالجملة وقتل أكثر من مية وخمسين ألف بشري .. وحرق الملائكة بالكيماوي ، لليوم بعدهن عم يتناطحوا دول العالم وما عم تزبط معهن الحكاية ، يا ترى صعب عليهن يعتقلوا هيدا الكلب السعران ولا حابين يجمعوا بمزابل الغرب كل حكام الأنتيكا ليصلوا على جثتنا وعلى بلدنا والمنطقة كلها السلام … بوعدكن ســـــوريا أكبر وشعبها لا يُقهر .

40. أوكرانيا : المجاهدين الفوار اللي نطوطو على دم الشهداء و دحشو حالن بصفوف الثورة .. اليوم قرأت بوستات تعطي نصائح للثوار الاوكرانيين .. كل خوفي يلتزموالاوكرانيين بنصيحة تفجير محوﻻت الكهرباء. ﻻنه بأوكرانيا الكهرباء تشتغل بالنووي ونصائح بعض ثوارنا متخصصة بالهبل .. وكلو نازل عا تكبير .

41 . سر الأفلام الإرهابية : البعض مندهش ومستغرب من نجاح الأفلام الإرهابية ، وإمكانياتها التقنية المتميزة ، إضافة للكادر الفني وخبراء التصوير .

المسألة ما بدها تفكير كثير .. خصوصا إذا عرفنا ميزانية داعش الشهرية .. ( النفط السوري بكامله تركه الجزار بشار أسد للتنظيم ، الهبات من الدول والمجموعات التي تستفيد من خدمات داعش الدموية ، الغزوات التشبيحية التي يقوم بها داعش ، نهب خيرات المدنيين تحت مسمى ديني كاذب ) أما من الناحية التقنية العالية بتصوير الأفلام بسبب وفرة مهندسين واستشاريين غربيين موجودين ﻷسباب عدة . البعض منن مهووس بالميديا الغرائبية ذات الطابع الفنتازي ، وجزء منن مرضى ومصابين بالإكتئاب ، هدول إجتهن فرصة للتنوع والتغيير والمغامرات في البلدان اللي بتعاني من ويلات وحروب ، وبيناتن موجود حتى مدمني المخدرات وخريجي السجون وأصحاب السوابق .

وفر داعش لهدول بيئة حية ، لتحقيق مشاهد النحر والحرق والتلذذ بمشاهد القتل بكل أنواعه بدون تمثيل ، لأن الضحايا بشر والدماء حقيقية وليست أصباغ مثل الأفلام .

بنرجع للنقطة الأولى ، الإقتصاد يغذي أي نشاط إرهابي أو تنويري .

على الهامش : كل متضرر من كلامي أعده بالمزيد من البراغي ، خصوصاً جماعة الجهاد المدنس … وبالسلخ كتبناكم

فيمــن ( FEMEN ) : منظمة نسائية تستخدم التعري كإسلوب احتجاج على مظاهر خاطئة تمارس بحق المرأة وفيما بعد تحولت المنظمة بأنشطتها الى التنديد في السياسات العامة الغير منصفة في البلدان .من هنا كان تركيب الإسم في النص أعلاه ، اعتقادا مني حاجة الرجال لنمط احتجاج فضائحي يقدم إجابات فاعلة ، بما يوازي أو يتخطى دور ذات المنظمة النسائية التي تثبت يوما بعد يوم فاعلية خطابها .

أحمد سليمان / ميونخ