ماذا لو كانت هذه اخر لحظة فحياتك

هذا سؤال كنحطو على راسي وعليك تا نتا لي كتقراا...مكتسناش اجابة تواجهني بها ..بقدر ماباغيك تانتا براسك تجاوب نفسك بنفسك

هي ماشي محاولة مني نظهر نفسي عميق باسئلة عميقة ..الامر ماشي بهاد السطحية...

كل مافي القضية انني وليت كنشوف كلشي عايش كما لو انه خالد في هاد الحياة ..عوض قضاء الامور في وقتها....التأجيل والمماطلة والامل الزائف عوضوا بلاصت كلشي ..وبقينا كنقولو اليوم غذا ....

على هادشي كامل كان لازم نكتب هاد المقال .هو اولا لنفسي ...ولكاع الناس لي بغاو يصنعو التغيير في حياتهم ولو كان صغير ..

على بركة الله

لو انه كانت اخر لحظة فحياتك ..واش كنتي غتبقا في نفس البلاصة فاش راك؟! فنفس الخدمة؟

فنفس التخصص؟؟فنفس المدينة؟؟!

واش كنتي عتبقا تمارس نفس العادات لي كدير كل نهار...من غير انك تفكر تغيرهوم ولو شويا؟!

واش غتبقا دوز وقت فراغك في التفاهات والمحاداثات الفارغة؟!

ولو انه اخر لحظة فحياتك واش غتبقا مخاصم مع الناس لي دايران بيك..الوالدين ديالك..خوتك صحابك...بل حتى نفسك ..واش غتقبل راسك كيفما نتا ولا ديما غتبقا تحاول تكون نسخة على ناس اخرين؟؟

لو انها اخر لحظة فحياتك واش هادوك الاهداف والاحلام لي حاط فراسك غيبقاو مجرد افكار...مازال مانوي تخدم عليهوم وتقرب منهم كتر وكتر...؟؟

مااخبار صلاتك مازال مقررتي تبداها؟

ولا مازال كتسنا اللحظة المثالية؟

ماذا عن واليديك ..واش مازال مانوي تفرحهم..مازل مانوي ترضيهم..مازال ماناوي توقف عصيانك ليهوم...؟؟؟

ماذا لو انها اخر لحظة فعمرك ..شناهي اهم حاجة غتفكر ديريها؟؟....شناهو التغيير لي غتبدا بيه .....

الكتب لي كتفكر تخلي ليهوم الوقت..قرايتك لي كتأجلها ..صلاتك لي مبعد عليها..سعادتك لي كاتحلم بيها ...تضحيتك لي مازال ما مستعد ليها...كلها أشياء معندهاش وقت مثالي تسناه باش تبداها ..داكشي علاش مغتلقاش حسن من اللحظة هاذي باش تبدا!

كنتمنا تكون ستوعبتي كلامي وفهمتيه مزيان!

على العموم لي خصك تفهم هو ان الحياة لاتنتظر احد ولا الموت ُيعلم قبل الحضور..ولايترك فرصة للتفكير ...يأتي على غفلة ويأخذ الصغير والكبير ...سواء كنتي مستعد ولا لا..الموت ماغايرحمكش...داكشي علاش كون ديما

مستعد ليه ...وديما قبل ماتعمل شي حاجة وقول لو ان هاد اللحظة هي اخر لحظة فحياتي واش بهاد الطريقة غندوزها؟؟؟

فالاخير بغيت نفكرك بأن التغيير صعب وصعب جدا !مرهق ومكلف بزاف! يحتاج تضحية ..وصبر..وقوة...نهار يتوفرو فيك هاد الشروط عرف راسك غتحقق لي بغيتي..والا ضيع وقتك وانتظر الموت

والسلام❤