" ومن الحب ما حسد 😁 حاسديني عليكي يا مصر 🇪🇬”

حتي احنا كمان محتلين في وطن 🇪🇬 بقي ذكري علي ورق قديم 📜... وطن فيه ناس بتعرق😪 في طابور العيش🍞 وناس بتعرق في ملعب التنس🎾،

⬅️ وطن إيه اللي بقي شبه كنيسة🕍 من غير مسيحيين ومسجد🕌 مافيهوش مصلين؟

⬅️ وطن إيه اللي انجازاته فيروس سي وفشل كلوي وأكل مسرطن وشباب بتنتحر؟

⬅️ وطن إيه اللي فيه أرملة بتنام بعيالها في شارع حي راقي؟

⬅️ وطن إيه اللي بيخصم من العراة مرتبات الجيش والقضاة؟

⬅️ وطن إيه اللي همومه بقت عيال رايحة الدروس وأطفال بتتخطف في لمح البصر ورجال بيبيعوا كليتهم وسيدات بيبيعوا نفسهم؟

⬅️ وطن إيه اللي بنتظلم فيه ويضيع مستقبلنا ومجهود سنين عشان مش سيساوية ومش بندفع رشاوي ومش بنمسح لهم جوخ؟

⬅️ وطن إيه اللي مستشفياته 🏥 تخوفك تدخل تتعالج فتخرج من غير أعضائك؟

⬅️ وطن إيه اللي قسم الشرطة فيه مرعب أكتر من جهنم؟ ⬅️ وطن إيه اللي بيبنوا فيه سور عشان الناس ماتشوفش البحر🏖؟

⬅️ وطن إيه اللي دكتور الجامعة👨‍💼 فيه متحرش والأستاذ👨‍🏫 مرتشي والطبيب 👨‍⚕️ حرامي أعضاء والظابط 👨‍✈️حرامي والقاضي ظالم؟

⬅️ وطن إيه اللي بيعدم قصر وشباب وبنات بريئة؟

⬅️ وطن إيه ده؟ وإذاي سميته وطن؟ وبتحسدني عليه كمان؟

كنت مسافرة وعشان بحب أعيش عيشة عامة الشعب 😁وأركب مواصلات ركبت الباص🚌 لمحطة القطار🚉. بعد ما دخلت حطيت الشنطة جنب الباب ووقفت جنبها، برغم إن في أماكن كتير جدا فاضية بس أولا عشان ماضايقش حد ثانيا لأن المسافة قصيرة.

بس كان في رجل 👨 أربعيني مركز معايا جدا وبيبص لي😶 ويبص😶 لشنطة السفر ويبص😶 حواليه قلت بس ده بيحشد جمهور وهنعيش #موقف_لا_ينسي 😄

لقيته بيقول لي: اتفضلي اقعدي في أماكن، مش فاهمة هو اذاي مش متخيل إني بشوف😅 قلت له: شكرا، قال لي: مش منطقي يعني تقفي والباص🚌 فاضي فهمته اني معايا الشنطة والمسافة قريبة.

قال لي: هاتيها 😯واتفضلي اقعدي، إيه هتفتشها ولا ايه يا عم؟😅😃

تمام قعدت بس كنت محرجة منه لأنه شكله مصاب🤕 أو عامل حادثة، اخد الشنطة جنبه وسند عليها وكان طول الطريق فعلا ماسكها، وبدأ يشد أطراف الحديث اللي كان من طرف واحد 😉ويتكلم في مشكلة صحية عنده هو فعلا كان لابس رقبة وماسك عكاز وعرفت منه انه حصلت له إصابة وعمل عمليات كتير، طبعا في دقايق معدودة عرفت تفاصيل العمليات وفي اي مستشفي 🏥 وامتي ده حصل وتداعيات الإإصابة وكمان أصله وفصله وتاريخ حياته....

أخونا من يافا ويكفي الإسم عشان نتوقع مأساته ، من يافا وبالتالي عنده مشكلة أمنية في السفر✈ والتنقل في المطارات وكمان انه يزور بلده أو يزور بلاد تانية أقام فيها قبل كده أو حابب يزورها ذي مصر🇪🇬 مثلا...

طبعا أول رد مني عليه كشفني، وعرف اني مصرية🇪🇬 وسألني عن الوضع في مصر وطبعا جملت واقع وقح احنا كمصريين عايشينه أو بنضطر نعيشه، وكان رده عليا مفاجأة: " كفاية إنك ليكي وطن... كفاية إنك مصرية "

اخونا اتنقل من فلسطين🇵🇸 للأردن🇯🇴 ومنها لمصر🇪🇬 اللي عاش فيها فترة قصيرة وطلع منها علي اسبانيا 🇪🇸اللي اشتغل فيها شوية وراح علي بريطانيا 🇬🇧 اللي استقر فيها كام سنة وطلع منها علي ألمانيا 🇩🇪 اللي مش عاجباه 😒 بسبب عنصرية 😡 أصحاب البلد وعدم احترام الآخر: أصله… دينه… وتقاليده، ده علي اساس أننا أصحاب بلد واحدة بنحترم بعض ومش عنصريين مع بعض!😒

تنقله بباسبور فلسطيني 🇵🇸 كان مشكلة كلاجئ في بلاد عربية أكبر منها في بلاد الغرب وحس بالدونية 😔وسوء المعاملة 😞ع العكس كان في ترحاب 😎 من الغرب به كلاجئ فلسطيني 🇵🇸وطبعا دعم مادي 💸عشان يفضلوا متفرقين ومتشردين في العالم 🌍، بس هو في كل بلد كان بيعاني بشكل مختلف ومهما كانت حياته مستقرة من ناحية الشغل أو الماديات يبقي بدون وطن،صعب عليه يدخل بلده وصعب عليه الإجراءات الأمنية اللي بيتعرض لها لمجرد أنه من يافا واللي بتتضاعف عن أي فلسطيني تاني.

جملته اللي قالها : " كفاية إنك ليكي وطن "، كافية توجعنا 😓 كلنا كعرب مليون سنة وتحسسنا أد ايه احنا مذنبين 😞في حقك يا فلسطين 🇵🇸….بس لكل عملة وجهين وبعد ما يرجع إحساس القومية للبيات الشتوي😉 تاني لازم ماننساش نحمد ربنا 🤲 إن العين صابتنا ورب العرش نجانا… وإلا كنا بقينا ذي سوريا والعراق 😅 ( جملة أحمق من قائلها)

احنا برضو عندنا وطن اهم إنجازاته اول كام سطر في البوست ☝️بس هو الوطن محسود وتعبان شوية 😉😁

" حاسديني عليكي يا مصر 🇪🇬 "

#amira_ibrahim_neues_leben