مقتنعة جدا بأن ربنا سبحانه وتعالى ذي مابيبتلينا بيعوضنا، يمكن مابين الابتلاء والعوض يمر وقت طويل لكن واثقة جدا ومقتنعة أوي إنه بيعوضنا. ع الاغلب بيعوضك بأفضل و بأحسن كتير من اللي خسرته ( أو اللي وقتها كنت بتسميه خسارة).
بمرور الوقت ⏰ وبعد ما ربك بيعوضك🙂، بتنسي حتي إنت خسرت إيه🙄 وبتندم إنك في يوم كنت ناقم ع الدنيا وحاسس أد إيه هي ضيقة عليك، يمكن كمان تندم 😞 إنك زعلت ونقمت علي قدرك وتقول لنفسك يا ريتني ما اتضايقت ده ربنا فعلا كبير ورحيم .
في وقت الابتلاء، سبحانه متطلع عليك وعلي كل تفاصيل المرحلة دي وعارف امتي صبرك هينفذ 😤 وامتي هتبكي😭 وامتي هتصرخ 😖وامتي هتقول يارب🤲 .
اللي انا واثقة منه اوي ومن خلال تجربتي، انه كل مابيكون الابتلاء كبير وكل ما بكيت أكتر وصرخت بأعلي صوتك من خنقتك😲 وقلبك وجعك💔 كل ما الانفراجة بتكون اجمل🎁.
وهنا نفتكر صبر أيوب عليه السلام:
وانه كان صاحب رزق واسع: عنده مال كتير، عنده أبناء كتير وعنده زوجات كتير؛ وفي لحظة خسر كل حاجة بمعني الكلمة كل حاااااجة😞، وبقت معاه زوجة واحدة ومش بس كده اصابه مرض انهي علي جسمه كاملا ماعدا قلبه. ورغم كده كان بيدعي ربنا مش يصيبه في لسانه عشان يفضل يذكره ويدعيه. ابتلاء أيوب كان عظيم بس عليه السلام صبر ورضي😇 واحتسب.
كانت كل الظروف ضده ووصل به الحال يعيش في خيمة⛺ بعيد عن أهله اللي نبذوه بسبب مرضه وأكيد ابليس👹 كان بيوسوس له في اليوم ١٠٠ مرة:
"اذاي تكون نبي وربك يبتليك" ،
حتي ان زوجته بكت يوم جنب رأسه ولما سألها قالت له انها بتبكي علي حاله وعلي ايام العز والرخاء فقال لها اصبري، كلها عوامل كان ممكن تضعف إيمانه وتقلل صبره، لكنه صبر وأحسن الظن بالله ودعا بقلب سليم💖 راضي بقضاء ربنا يوم ماسمع اتنين🧔🧔 بيتكلموا عنه ويقولوا اكيد ربنا ابتلي أيوب بسبب ذنب أو معصية، وقتها بكي ونادي ربه:
" ربي اني مسني الضر وانت أرحم الراحمين "
وربنا رفع عنه الابتلاء 👍
#وجهة_نظري اقبل قدرك بنفس راضية😇 وقلب مؤمن في رب رحيم وكمل:
Accept the situation and move on!
ربنا بيسبب الأسباب وكل شيء في الدنيا دي بيحصل لازم يكون له سبب بس اللي يعلمه هو ربنا، واللي متطلع علي الحكمة منه هو ربنا يمكن وقت الابتلاء عيونك بتكون مليانة دموع 😭 بس يوم ما تتضح ادامك الاسباب وتعرف الحكمة من الابتلاء وربنا يعوضك عنه خير عيونك هتدمع من جمال وحكمة ربنا في تدبير أمورك.
"صبر أيوب: من رضي بقضاء الله، أرضاه الله بجميل قدره"
-
أميرة أحمدطالبة دكتوراة في تخصص اللغة الفرنسية وآدابها