الوجع .. مين فينا متوجعش ؟ .. مين فينا محسش بإحساس الألم اللي معاه بتحس ان روحك بتطلع وكأنها في اخر نفس. بس الوجع زيه زي اي إحساس في الدنيا ليه مراحل و في مقالي المتواضع هحاول اشرحهم.

اول مرحلة هي الإنكار .. إحساس الوجع صعب عشان كده ساعات بنفضل ننكره. وأحيانا خوفنا منه بيخلينا نستمر في تصرفات تزود وجعنا زي استمرار في علاقة فاشلة أو السكوت عن تصرف غلط او عدم مواجهة أعز الناس لينا باللي حسينه. المهم ان مرحلة الإنكار دي دايما بتبقي مؤشر لدرجة خوفنا وضعفنا لمواجهة الوجع. وعلي الفكرة الضعف والخوف ده عادي لأننا بشر.

تاني مرحلة بتبقي دايما مرحلة الاكتشاف .. وهي ببساطة عبارة عن اليوم اللي هتقرر فيه مواجهة خوفك وضعفك وساعتها بيبدأ إحساس الوجع  اللي بيبقي نتيجة حقيقة واضحة شفتها بعينيك. مرحلة الاكتشاف مرحلة مركبة عشان ممكن يحصل فيها مرحلة النكسة. المرحلة دي بيتحكم فيها ضعفك اللي بخليك ترجع توهم نفسك ان الحقيقة اللي بتوجعك مش صح. بس للأسف حتي لو انتكست الوجع اللي حسيته طعمه بيغير حياتك ويفضل يزن في دماغك لحد ما تشوف الحقيقة تاني لان للأسف مفيش هروب منها او من وجعها.

وبعد مرحلة الاكتشاف المركبة تيجي مرحلة التأقلم. مهما كان ضعفك قدام وجعك لازم تعرف انك هتزهق. جايز تستسلم ليه في الأول بس رغبتك في الحياة او احساسك بالزهق اقوي منه. فيه اللي بيعافر ضد الوجع صح وفيه اللي بيعافر غلط بس في كل الحالات هي معافرة. دايما الوجع في اوله صعب أوي ومؤلم وهتاخد فترة عشان تتأقلم معاه سواء عضوي او نفسي . بس مع مرور الوقت بتعرفه وبتفهمه. احنا كده البشر اول ما نعرف ونفهم بنتعود.

عشان كده المرحلة اللي جاية هي التعود. في المرحلة دي مش شرط يكون الوجع راح. بالعكس هو جايز يكون موجود عايش معاك بس انت خلاص فهمته واتعودت عليه زي فنجان قهوتك الصبح او دش قبل النوم. بتتعود عليه عشان فهمته وعرفته عشان مبقاش بعبع انت خايف منه. المرحلة  دي تمتلك خاصية مهمة جدا وهي أرشيفية الالم. بمعني انك تحط الم الوجع ده جواك في مكان محدش يعرفه غيرك ومع اول موقف يفكرك ساعات يطلع  بنفس  شدته الاولانية او في صورة ذكري بتضحك عليها. الارشيف مهم عشان بيوصل لحقيقة انه مهما اتوجعت هتتعود وهتكمل وكله  هيتحط في الأرشيف وهيطلع وقت ما  تحب وكده بنوصل لاخر مرحلة.

مرحلة السيطرة .. دي مرحلة بتبقي مبنية علي خبراتك مع الوجع محتاجة وقت وتجارب عشان توصلها. بس كل تجربة وجع او الم في حياتك بتثقلها. واهم حاجة بنتعلمها في المرحلة دي انه مهما اتوجعنا لسه فيه وجع تاني وان حتي لو فيه وجع تاني اكيد هنعرف نسيطر عليه.