اثناء قرأتى لكتاب زنزانه لد/ سلمان العودة

 فى جملة قرأتها واستوقفتنى وهى 

نزهد فى المتاح لانه متاح

الجملة دى معناها قوى جدا احنا فعلا كده الحاجة موجودة فبنزهد فيها بنزهد فى حاجات كتير اوى و اول ماتبقى مش متاحه بنتصدم ونعيط عليها اجبلك مثال لا دى امثلة حضرتك

--------------------------

انت بكل بساطة بتزهد فى علاقتك بربنا ايوة معلش كلام يخض بتزهد فى الصلاة لانك ممكن تصلى فى اى وقت بتزهد فى قرأة القرآن لانه متاح تزهد انك تتوب لان ابواب التوبة مفتوحة ممكن تتوب فى اى وقت بس اما ابواب التوبة تتقفل هتعمل ايه

بتزهد فى ذكر الله رغم انك عارف ان اللى ماتوا بيندموا ع كل ساعة عدت عليهم مذكروش فيها ربنا وعارف انهم يتمنوا يرجعوا عشان يصلوا ....

--------------------------

بتزهد انك تعمل حاجة مفيدة فى حياتك زى انك تشتغل مثلا يعنى مع ان الصحة دلوقتى متاحة اما تبقى كهل هتندم ع الوقت اللى ضاع ومستخدمتش فيه صحتك

--------------------------

بتزهد انك تشتغل عشان تبنى مستقبلك لانك عارف ان بابى ومامى متاحين هيوفروا كل حاجه عشان دراستك و شغلك وجوازتك

---------------------------

بتزهد فى الوقت لانه متاح انت دلوقتى فاضى مش بتعمل حاجة ومش بتستغل وقتك ده بعد كام سنة هتبقى شغال ومش لاقى وقت تطور من نفسك ولا حتى تاخد كورس او تحضر مؤتمر وهتندم ع الوقت اللى كان متاح وانت زهدت فيه

----------------------------

الزهد فى علاقتنا بالناس اللى حوالينا عشان هما متاحين موجودين دلوقتى مش عاجبينك عشان هما جنبك بتطلع فيهم عيوب وبلاوى ونفسك تعرف ناس احسن منهم بس لو تعرف ان دول احسن ناس مش هتعمل كده زى بيت الشعر ده

عتبت على عمرو فلما فقدته         وجربت أقواما بكيت على عمرو

هتلاقى واحد يعيب فى مراته و انها مش عجباه او واحدة بتعيب فى جوزها وكلام ...... ولو الشخص ده مات او اختفى او مشى لاى سبب هتلاقيهم قعدين يندبوا حظهم ويقولوا كانوا احسن ناس

او تلاقى واحد بيعامل ولاده وحش ومهملهم او بيقلل من شأنهم او ..او.... لانه عارفه انهم موجودين متاحين مش هيمشوا محتاجينه مش هيسيبوه لكن اول ما يكبروا ويبقوا مش محتاجينه ويسيبوه يستغرب هما ازاى كده .... حضرتك انت اللى ازاى كده انت اللى عارف انهم كانوا متاحين فمحاولتش تحافظ عليهم او تقدرهم ....

هتقيس ع ده علاقات كتييير قرايب وصحاب وزملاء علاقات كتيييير اوى

----------------------------

الموضوع بكل اختصار ان الحاجة دى او الشخص ده متاحين دلوقتى فحضرتك بتزهد فيهم او مش بتهتم مش بتقدرهم مش بتديلهم قيمتهم مش عارف انهم متاحين لفترة معينة او لو مهتمتش بيهم هيروحوا ومش هيرجعوا وهتندب حظك ساعتها

بص حواليك كده شوف عندك كام نعمة ربنا رزقك بيها وانت بتزهد فيها

شوف عندك كام فرصة سبتها ومجرتش وراها لانها متاحه وتقدر تاخدها فى اى وقت وابقى قابلنى

شوف كام شخص مهم فى حياتك وانت بتزهد فيه او مش شايف ان دوره مهم وبتقلل منه لانه متاح ومتوفر ولسه معاك مش سايبك ...هو دلوقتى موجود لكن لحد امتى هيفضل موجود

لحد امتى هيفضل المتاح متاح ولحد امتى هتفضل تزهد فيه :-( :-(

حط الجملة دى ادامك وبالخط العريض

نزهد فى المتاح لانه متاح

اخرج من الزنرانه اللى انت ساجن نفسك فيها واستثمر كل ماهو متاح وقدر قيمته واشكر ربنا كل يوم ع ما هو متاح ♡♡♡

#استثمر_كل_ما_هو_متاح