( حوار بين عقل وقلب )

-العقل : بص بقى يا ابن الحلال ، إحنا ما ينفعش نفضل دايماً كدا ف خناق ، لازم نلاقي حل ، مش معقول يعني دا احنا عضوين في جسم واحد .

-القلب باستنكار : طبعاً .. ما انت عاوز تتحكم فيا ..

- العقل : صدقني والله مش تحكم ، أنا باحميك بس عشان انت بالذات بتبهدل الدنيا وبتقعد تتعذب وتتجرح ومش بتسمع كلامي ، إحنا ح نتعاون بس ..

- القلب : يعني انت عاوز ايه بالظبط ؟

- العقل : بص .. أنا ح اركب فيك زنبرك ، ايوه زنبرك كدا زي اللي في الألعاب بتاعة الأطفال ..

القلب بنفاد صبر : وبعدين ؟

العقل : الزنبرك دا أنا اللي ح اتحكم فيه ، هو مسئول عن العواطف والمشاعر ، بالنسبة للناس اللي بتخبط على بابك وتجري دي مش ح افتح لها ولا اعبرها ، أنت طبعاً كنت بتفتح لهم هوا ، لا أنا بقى مش ح افتح لهم ..

لو لقيت لمحة أو إشارة من لمحات الحب الحقيقي ح الف الزنبرك دا لفة ، لفة واحدة بس يادوووب تنقط كدا نقطة مشاعر صغيرة ، وبس خلاص ، لو الحب دا ابتدى يتحول لصورة صح وحب حلال ح الف الزنبرك كمان لفة ..

- القلب : طب وليه لفة واحدة بس ؟ ما تفتحه بقى ع الآخر ؟

- العقل : لا ما ينفعش ، لو فتحته كله مرة واحدة ح تلاقي مشاعرك وعواطفك كلها استنزفت وخلصت ورجعت لمرحلة الجفاف تاني ، انا ح الفه لفة بسيطة ، لمصلحتك والله انا مش عاوزك تتعب ، وكل حين وآخر ح اعلمك امتى تلف الزنبرك دا لفة واحدة ، بس ما تزودش عن لفة عشان ما تلاقيش الزنبرك باظ منك وفوّت وبدأ ينزل كل حاجة من غير تحكم ولا سيطرة ، ولما الاقي انك كبرت واتعلمت الدرس واتعودت ع الوضع دا ح اسيبك انت اللي تلف الزنبرك لوحدك بس ح اراقبك من بعيد كل حين وآخر.. ماشي اتفقنا ؟

القلب : خلاص اتفقنا .. أما نشوف

العقل : صدقني مش ح تندم دا انت ح ترتاح قوي ، لو اتعاوننا مع بعض ح ترتاح انت من التعب والألم اللي بتشوفه ، لكن لو فضل كل واحد فينا لوحده وانا مكتفي بس بالاعتراض على تصرفاتك بدون تدخل صدقني ح تضيع .

#أميرةتوفيق