أنا فاكره جدا الوقت اللي انتشر فيه علي السوشيال ميديا فيلم Gone girl  ولأني مش من محبي الموضه و الطلعات و بكره جدا فكره اني اعمل حاجه لمجرد ان كل الناس بتعملها في وقت معين تحديدا .. طنشت جدا و متفرجتش عليه

بس لفت انتباهي حاجه بقي .. ان البطله انتقمت ابشع انتقام من البطل و لففته حوالين نفسه علشان خانها .. طبعا أنا قولت good girl .. جدعه يا بت و ميجبهاش الا حريمها و الاكليشيهات العنصريه الغريبه دي كانت بتتردد في سري و انا مبتسمه ابتسامه بلهاء .. كل ده عادي .. !

امبارح بقي بما اني في فتره غريبه الشكل و المعاني و مستسلمه و مستمتعه في نفس ذات الوقت لفجوه زمنيه مبعملش فيها أي حاجه خالص و ده المفروض يتعبني نفسيا و عقليا بس تقريبا استهلكت نفسيا لدرجه اني متنحه جدا و مش فارق معايا .. شوفت gone girl ..

الفيلم ساعتين و نص .. طويل أوي هاا ؟ انا بردو قولت كده و ياريته قفل قفله عدله علي الطول ده كله !

مش هحرق الفيلم .. بس مفيش ست بتأذي كده .. الست لما بتتخان .. لما بتتهجر .. لما بتنزل من منزله الكل حاجه الي منزله الولا حاجه .. بتبقي أكبر طموحاتها رد الألم باللام ألم باللام .. فكره العين بالعين و السن بالسن و البادي أظلم  .. بس كده ! مفيش واحده بتقلب الدنيا أوي كده .. أكيد مفيش ست  هتبقي مخططه تموت نفسها علشان تأذي راجل .. حتي لو الخطه مش هتتنفذ .. مفيش كده ..

طبعا انا معنديش اي منهج منطقي تجريبي يخليني متأكده كده .. بس فرضا اني بقول رأيي الشخصي حتي لو كان غلط .. رأيي اللي مش مبني غير علي اني في خانه النساء بقالي مده .. و بشوف في الحياه و بتعلم يمكن !

اللي انتشر علي السوشيال ميديا من عبارات زي احذروا كيد النسا .. و اللي بتتخان مبتفكرش .. و أنا هعمل كده و أكتر لو اتخانت .. و الواحد بعد كده يحرص علي نور عينيه وهو قاعد مع مراته .. بعد ما الفيلم اتشاف أو متشافش تقريبا .. انطبع في دماغي بشكل غريب و خلي عندي رؤيه مسبقه "مغلوطه طبعا" بنيت عليها رأيي في الفيلم ..  أو بمعني اصح خلتني ركزت في الفيلم و كل التفاصيل أكتر

الناس ماخدتش بالها ان البطله طالعه في دور سايكوباتيه ؟! ولا انها ساديه ؟! و لا ان الفيلم اساسا قايل ان عندها سوابق نفسيه مع ناس تانيه ؟! طيب ازاي ؟!

فهمني ازاي بتبني رأي كامل عن المرأه من حدوته فيلم عن مرأه معرفك فيها ان عندها مشاكل ! مش دي مغالطه منطقيه بردو ؟! 

عارف انت في المجتمعات الجاهله  الناس بتعمل ايه ؟!  .. بتمشي علي الموضه و بتستمد أفكارها من القصص و الاساطير  .. و بتتشحن نفسيا من الافكار المغلوطه .. عادي لو هنطبق القاعده كده يبقي كل المجتمعات جاهله .. لكن التمييز بين الجهل القوي و الجهل النص نص في الارهاص و التمييز و الافكار العنصريه ! ..

الجمله اللي عايزه اختم بيها الكلام اللي مالوش اخر و الافكار اللي متعبرش عنها كلها .. الجمله اللي جايه متأخره زمنيا و نفسيا للناس !
اطمن ياخويا علي نور عينيك .. وانتي اتلهي يا حبيبتي لا هتعملي كده ولا حتي ربع كده ! لأن الستات يوم ما بتنتقم بتحب توجع من جوا مش من برا   ! ! !