"أما السفينة 🛳 فكانت لمساكين "... ربهم علي الدرب معين!

متأكدة إن في ظواهر طبيعية مالهاش تفسير علمي، بس لما تكون الظاهرة إنسانية يبقي لازم يكون لربنا حكمة منها.

مافيش حياة بدون ضغوطات أو مشاكل، ممكن جدا تصحي من النوم تلاقي عندك مشكلة من حيث لا تدري😯.

المشكلة دي مش عيب عندك ولا فيك دي حياة الدنيا كلها ابتلاءات، وسبحان الله ذي ما بيبتلينا برضو بيلطف بينا...

لما نفتكر قصة سيدنا موسي عليه السلام والخضر والسفينة 🛳، هنفهم الحكمة من وجود عيب أو مشكلة أو نقص في حياتك:

" وأما السفينة فكانت لمساكين يعملون في البحر فأردت أن أعيبها وكان ورائهم ملك يأخذ كل سفينة غصبا "

◀️ يمكن تصاب بمرض أو تحصل لك مشكلة عشان حكمة ربنا انه يرضيك ويراضيك بس في وقت ما هو شايفه الأنسب...

◀️ يمكن تخسر حاجة أو حد بتحبه وروحك متعلقة به وربنا يرزقك بحب تاني قلبك يستاهله...

◀️ يمكن تحس شوية ضيق مادي أو عراقيل في الشغل وربنا يبعت لك تساهيل في باب رزق تاني...

◀️◀️ يمكن الابتلاء يرفع عنك بلاء أعظم!

في #موقف_لا_ينسي اشتريت تذكرة قطار عن طريق App DB وبعدين اكتشفنا انها باسم صديقتي الصدوقة لخطأ ما في تدوين البيانات سابقا، حاولت أغيرها فشلت، اتجهت لخدمة العملاء في السكة الحديد والموظفة حسمت الأمر بأنها ماتتغيرش🚫، وتدخل زميلها وقال نفس الكلام😔. أنا كنت متضايقة جدا لاني ما صدقت حجزت و عاوزة أبدأ أركز في حاجة تانية 😔، بس ربنا ابتلاني بالمشكلة دي وعكرت يومي وضايقتني جدا 😥.

بعد مناقشة طويلة أعطاني رقم تليفون☎️ إداري في الهيئة عشان أكلمهم وأتواصل معاهم وهو كان الحقيقة بيبعتني مش أكتر ورفض يساعد أو يقترح أي حل😡، كمان قال لي مافيش حل ومش هترجع، يعني إحباط آخر حاجة 😭

كلمتهم والموظفة ردت بأنها فعلا ماتتغيرش 🚫 و التذكرة مش ممكن ترجع أو تتعدل... طلبت منها تحولني علي رئيسهم أكلمه وحصل ، بعد ما حكيت لها القصة وإن التذكرة بسبب خطأ ما غير ملحوظ اتدونت بإسم حد تاني قالت لي برضو مش ممكن يكون في حل🚫

ساعتها سبت الموبايل ٣ ثواني وهي بتتكلم بالقوانين والذي منه وقلت: " عليك يا رب، أنا متأكدة ان لك حكمة من كل ده " أنا حقيقي تعبت وريقي نشف😓 اتكلمت كتير وحاولت كتير🤕 والخطأ مش من عندي ...

رجعت قلت لها: شوفي أنا مش متخيلة إنه مافيش حل ومش من الشخصيات اللي بتقبل التفكير ده، انا هشتري تذكرة تانية وانا مجبرة لكن المنطق بيقول ان مافيش حد مستفاد غيركم، وفي تذكرة ذهاب وعودة هتضيع عليا وفعلا خسارة...

قالت لي: هاتي رقم الكارت وحاولت شوية، مش قادرة أفهم🤔 إيه اللي شافته، أو إيه اللي حصل بعد ما أخدت الرقم 🤔 بس رجعت قالت لي عندي حل 🤨وبالفعل اتضح انه في حل يرضي جميع الأطراف وده كان عشمي برضو...

✔ في لحظة، المشكلة اللي خلتني ألف حوالين نفسي🤒 بدأت تتحل...

✔ شايفه الموظف وهو بيقول لي مش ممكن...

✔ شايفة زميلته وهي بتقول لي keine Chance

✔ شايفة نفسي وأنا بقول لهم مش متخيلة dass ich Pech habe

بس شايفة ربنا أد إيه مركز معايا وسامع دعائي 😇

وقفت في وسط المكان وأنا ببص حواليا 😳 وشايفة ناس كتيييير اوي وبقول ياه يا رب:

انت معانا كلنا في وقت واحد؟

متطلع علي حاجة كل واحد فينا؟

مراعينا ٢٤ ساعة في اليوم؟

مش ناسي حد فينا؟

⛔ جوا كل واحد فينا مخاوف ... ربه شايفها

⛔ عند كل واحد فينا مشكلة... ربه عارفها

⛔ لكل واحد فينا دعوة... ربه سامعها

🚫 اوعي تخاف وربك موجود بس إعمل اللي عليك ذي ما بتضيق هتفرج!

🚫 لما تحصل لك أي مشكلة افتكر إن لك رب اسمه المعين بيخاف عليك أكتر من أي حد ومراعيك وعينه عليك!

السفينة 🛳 المعيوبة دي مش فضلت باب رزق لأصحابها🤔؟

مش اللي عمله الخضر كان في صالحهم🤔؟

مش بعد كده فضلت ملكهم🤔؟

انا مشكلتي اتحلت واشتريت تذكرة جديدة وأخدت كمان Gutschein ومعايا لسه رصيد فيه ...

✔ #وجهة_نظري

" ليست كل العواصف تأتي لتعكر حياتك؛ بعضها يأتي لتطهير دربك!

„ أما السفينة فكانت لمساكين "... ربهم علي الدرب معين "

Amira