حميد خريج كلية التربيه يلقبونه ( بالعربنچي) حمّال في شارع السنك أستشهد في أنفجار شارع السنك وترك والدته وهذه واحده من مذكراته

عشر سنوات واني ادفع بالعربانة صارت نصفي الثاني من كملت كلية التربية وملكيت تعيين كلت يلة اشتغل عربنجي بالشورجة بين ما الكي تعيين ويوم يجر يوم وشهر يجر شهر واني علة نفس الموال اكعد الصبح اطلع بالعربانة يوم اشتغل ويوم ماكو شغل

اهم شي والدتي متحتاج وادفع فلوس الايجار

اني مثقف عادي مبيهة شي طز اهم شي اطلع فلوس العلاكة شكد انقهر من اشوف عماد صديقي الي مكمل ابتدائية يداوم بالمنطقة الخضراء يلة عادي كلمن وقسمتة

شكد انقهر من اذكر حبيبتي مروة الي تقدمت الهة قبل سنتين وكالو شنو عملك كلتلهم دا اشتغل عربنجي بشكل مؤقت بين ما الكي تعيين ابوهة كلي احنة نردلك جواب شفت زفتهة قبل شهر ومشفت الجواب

يلة عادي اهم شي اهلي ميحتاجون وندفع الايجار والمولد

شكد انقهر من اخوية حمودي الصغير الي كمل حقوق واتعيين وجنت اني انطي فلوس الكروة واشتريلة ملابس من شغلي يعيرني يكلي عربنجي

يلة عادي اهم شي ندفع فلوس الايجار والمولد ونكدر نشتري نفط بالشتاء

ابو العربانة تعال شيل هاي الكراتين وصلهن للسيارة

ادلل اخوية

اخوك شنو لدكول اخوية انتة خلك عربنجي

يلة عادي اهم شي ينطيني خمس الاف اشتري بيهن مسواك من ارجع لان اليوم ممشتغل

اصبر نفسي من افكر انو مااكدر اجمع فلوس غرفة اخشاب لان ايجارنة خمسمية ومصرفنة ستمية بالشهر هم يلة لو اكدر اجمعهن لو لا

استحي اطلع وية جماعتي بالليل لان همة متفقين كل اسبوع العزيمة بالمطعم علة واحد واني مااصور اكدر اتحمل التكلفة مال مطعم اعتذر اكلهم تعبان لو عندي شغلة بالبيت

صديقي يشتغل بالمتنبي كل يوم استعير من عندة كتاب واضل اقرة بية واعيش وية البطل احداث مشوقة مابيهة تكلفة هواي مجرد اغمض عيني واعيش هاي الاحداث

من اشوف السيارات الحديثة الي يصعدوهة الشباب اكول لا اني اصلا مااعرف اسوق

من ادفع حمل ثكيل اخلي امي بين عيوني ماريدهة تحتاج العمامي الي من والدي توفه ماكو احد دك علينة الباب ترة الي يسئل مو ضروري يخسر فلوس الكلمة الحلوة والسؤال مرات يكفي

ادفع حميد ادفع هاي حياتك لتفكر بشي ثاني تعيينات صارت بالدفاتر وبس للعرف ادفع لتكول تعبت اهم شي اهلك يعيشون ادفع حميد لازم اتصير اقوة من الزمن لتضعف تنداس بالرجلين ادفع حب شغلتك حتة شغلتك تحبك

ادفع حميد لتصير ادفع بالشتاء بالصيف خلي ايدك والعربانة تصير قطعة وحدة حميد ادفع

الله يساعدك ابو العربانة

هلو اغاتي

تروح للسنك عندي هاي الغراض

يلة توكل اخوية

ادفع حميد اليوم راس السنة حوراء اختي الصغيرة تريد كيكة خطية

وعبوسي يريد ملابس مال بابا نؤيل اليوم من اوصل هذا الدرب للسنك اروح اشتريلهم ادفع حميد

--------

صوت انفجار ودخان وناس تركض عبوة انفجرت بالسنك حميد جثة الناس خلتة بنفس العربانة ودفعتة

العربانة الي قضى بيهة اجمل ايام شبابة