لما امتحان الثانوية يتسرب قبل الامتحان يبقى لازم الوزير يعرف أنه فاشل وان الدولة فشلت فى ادارة أهم وزارة فى مصر وبقى مافيش فرق بين اللى ذاكر من أول السنه واللى مذاكرش خالص بل يمكن اللي مذاكرش خالص حل أحسن وبالتالى هيجيب مجموع أعلي , أنا بقول ممكن لأن فى الغالب ده ما بيحصلش وأتذكر اني لما كنت فى الثانوية كان معايا واحد معاه سماعة بلوتوث وبيغش كل المواد وفى الآ خرأعتقد انه جاب 80% .
كلامى هنا للناس الطموحة اللى ذاكرت اللى ربنا ابتلاهم انهم يعيشوا فى فترة من أسوء الفترات اللى بتعيشها مصر .. بص يابنى ربنا بيقول " انا لانضيع أجر من أحسن عملا " وطالما انت أحسنت عملك يبقى حتماً هتاخد أجرك ولكن ازاى وامتى ده خليه على ربنا هو اعلم , فمتزعلش انك غلطت فى سؤال وصاحبك اللى مقضيها طول السنه حل أحسن .
هو ده الطبيعي عندنا أن حقك بياخده غيرك ولكن الطرق بتختلف قد تكون عن طريق تسريب أو واسطة أو رشوة ..... أوعي تفتكر ان موضوع التسريبات ده جديد ؟ الموضوع ده موجود من زمان بس الامتحان كان بيروح لناس معينه لحد البيت قبل ما تحصل ثورة الاتصالات والانترنت .
ركز فى بقية المواد اللى عليك وأحسن نيتك وتوكل على الله ولا تحزن لما حدث .
ونصيحتى ليك أول ما تخلص الثانوية لو معاك فلوس سافر ادرس بره ولو مش معاك زى حالاتى كده يبقى تصبر وتتحمل الكلية لحد ما تخلص وتسافر تكمل بره وتلحق تتعلم حاجه كويسه فى حياتك , بدل العك اللى احنا بنشوفه .
واوعي تدخل كلية خاصه فى مصر!!
كله بيزنس ومصاريف على الفاضى , بأٌقل من الفلوس دى تقدر تدرس بره .
بالتوفيق
-
محمود رشوانكاتب مصرى اعشق القصص الصغيرة والكتابة وهواياتى المفضلة القراءه والكتابة . أتحدث العربية والانجليزية والألمانية