السلام عليكم ورحمة الله وبركاته

الحمد لله وكفى وصلاة وسلامة على عباده الذين إصطفى لاسيما عبده ونبيه محمد صلى الله عليه وسلم وعلى أله وأصحابه الأخيار ثم أما بعد :-

روى عن رسول الله صلى الله عليه وسلم أنه كان إذا حزبه أمر فزع إلى الصلاة .

فزع إلى الصلاة ياجماعة .. ياترى أحنا أول حاجة بنفزع ليها إيه اول مابتقابلنا مشكلة ؟ هل ياترى بنجرى على قريب ولا بنجرى على حبيب !!

مع أن المخلوق أقصى مايمكن أن يعمله أنه يقولك معلش فاللحظة دى .. فحين أن ربنا لو حكيت له أو شكيت له هيفرج عنك وهيريحك نفسياً .

لوحدك ليه ..؟

داه شعارنا النهاردة فالرسالة القصيرة دى .. ليه شايل هموم الدنيا لوحدك وليه تجدف فى بحر الدنيا لوحدك .. اما أنتا معاك إله قادر بقوته وحلمه  وعظمته يحللك أعظم مشكلة ممكن تواجهها .

المشكلة أنك تلاقى فى حياتك ناس زعلانة .. وناس مهمومة ؛ والى شايل هم فلوس والى شايل هم شقة والى شايل هم أولاده والى شايل هم شغلانة وإلى شايل هم الى بيحبها .. والى شايلة هم عريس يتقدملها قبل ماسن الجواز يفوتها وهما صحباتها كلهم عمالين يتجوزوا .. والى شايلة هم أنها مابتتحبش .

ياأخوانا مشاكلنا كلها حلها عند ربنا .. بس أنتوا أدعوه .. بس أنتوا أطلبوا منه .. داه ربك قالها صريحة "قل أدعونى " إيييه !! .. " أستجب لكم " .. تأكيد ياجماعة .

لوحدينا ليه ! .. بنشيل نفسنا فوق طاقتها ليه ؟! .. أنتا لو أبوك مليونير .. هتبقا شايل هم حاجة ؟؟ .. انتا ذات نفسك هتقول مشكلة إيه دى الى ممكن تقف قدامى وانا ماحلهاش .. هحط كل حاجة تحت رجلك .

شوف بقا أنتا معاك مالك الملك .. معاك الى معاه خزائن السموات والأرض .. معاك إلى بيقول للشىء كن فيكون .. معاك إلى بيغير من حال لحال فغمضة عين وفلحظات ؛ هتقولى أنتا بتقول إيه ؟؟ يعنى ربنا يقدر ! .. يعنى ربنا ممكن يغير حالى فى لحظات ! 

أيوا طبعاً يقدر .. أسمع .. لما ربنا بيوصف الدنيا .." وأضرب لهم مثل الحياة الدنيا كماء أنزلناه من السماء " .. ربنا مقالش كماء فجرناه من الأرض ومقالش .. كينابيع فجرناها من الأرض .. انما قالك كماء أنزلناه من السماء .. ليه ؟؟ .. عشان يعرفك أنها هتيجى من فوق مش من تحت .. هتيجى من عند ربنا من السماء فوق .. مش من أهل الدنيا والأرض من تحت ؛ وإيه الى حصل أما نزل الماء .. الماء هنا إختلف العلماء بيقول مقصود بيه رزق .. بشكل عام فلوس جاه سلطان أى حاجة .." كماء أنزلناه من السماء فإختلط بيه نبات الأرض " .. ياسلام .. يعنى الناس إتزهزهت يعنى الحال بقا فأجمل مايمكن .. أسمع !!!! .. " فأصبح هشيماً " .. يعنى إيه !!!!! .. يعنى فى غضمة عين .. فى نومة صبحوا لقوا الحال إتغير .. فأصبح يعنى الناس نامت صحيت الحال إتغير .. نفس الكلمة إتقالت فى قصة قارون .. " فأصبح الذين تمنوا مكانه بالأمس " .. يعنى الناس نامت وصحيت مالقتش قارون ! 

بعد التأكيدات البسيطة دى لسا شاكك أن ربنا مايقدرش .. لسا برضه مصمم أن الدنيا هتقدر عليها لوحدك .. لسا برضه شايف أنك فى غنى عن ربنا .. مين فينا مش محتاج ربنا .. مين فينا مانفسوش يخلص من مشكلة وجعاله دماغه ومنغصة عليه حياته .

عاوزين نقول إيه فالأخر .. قربوا من ربنا .. من كان معه الله فمن سيكون عليه .. لو أنتا كسبت ربنا لو أنتا قربت من ربنا .. مشكلة إيه دى الى ممكن تقف قدامك .. ضيقة إيه دى الى ممكن ربنا مايفرجهاش عليك .. أعرفوا ربنا فالرخاء .. قربوله بالفرائض داه أساسى .. وعلى سبيل أأقل حاجة واظب على الصلوات .. " وماتقرب عبدى إلى بشىء أحب مما أفترضته عليه " .. قيام الليل ياخوانى .. قيام الليل .. داه نقدر نقوله عليه منه بتكون نهاية الأحزان .. منه بتكون بداية جديدة .. دى الى لو حد واظب عليها صدقونى والله العظيم حياتكوا هتتغير وهتتقلب 360 درجة .. حياتنا مع الله ياخوانا هى الحل وهى المخرج .. قبل الختام أوصيكم ونفسى بتقوى الله .. سبحانك اللهم وبحمدك أشهد أن لا إله إلا أنت أستغفرك وأتوب إليك .. وجزاكم الله خيراً .