عيد الحب او الفلانتين زى مابيقولوا مسمى غريب ظهر فى مجتمعنا بقوه هتفتح التفلزيون هتلاقى احتفالات وجو الاغانى الرومانسيه وفى عالم السوشيال ميديا محتفلين واشعار مسروقه رومانسيه وهتشوف الى بيسخروا منه وهتلاقى السناجل الى مضايقين ان مش بيحتفلوا وفى الشوراع كمية لون احمر غريبه ودباديب وورود.

حاولت افهم يعنى ايه عيد حب وسالت ناس مرتبطه هو انتوا مثلا بتكرهوا بعض كل السنه وبس بتحبوا بعض اليوم ده بس ؟جاوبونى لا بنحب بعض كل السنه بس اليوم ده بنعبر عن حبنا لبعض اكتر لاننا ممكن ننشغل فى الحياه طول السنه وتعبيرنا عن مشاعرنا بيقل  طيب ليه بقا اليوم ده بالذات  حضرتك ممكن افهم؟!

فكرت مع نفسى شويه واتكلمت مع نفسى زى المجنونه يمكن افهم عم الفلانتين ده

اولا بتجنن لما بنت تقولى حبيبى جبلى هديه تعالى حبيبتى هنا اقولك هو يعنى ايه حبيبك ده خطيبك ولاجوزك قالتلى مش حبيبى ولاجوزى حبيبى وباذن الله هيبقا خطيبى صدمتنى وسكت سكوت الاموات اه زى مابقولكم كده بصى ياقلبى انا حبيبك هو خطيبك او جوزك غير كده لا

ثانيا انا لو مخطوبه او متجوزه انا هحبه مش طول السنه لا طول عمرى عشان روحى ارتبطت بروحه مش هستنى يوم فى السنه اعبر ليه عن حبى ولو حسيت زى مابتقولوا ان الحياه شغلتنا عن التعبير عن مشاعرنا فيه مناسبات كتير ممكن اعبر فيها لما افتكر يوم ميلاده او يوم خطوبتنا ،جوازنا ،اول يوم اتقابلنا خليكم شاطرين ايوه .

اما انتوا بقا الى بتحبوا من غير خطوبه او جواز انتوا اصلا غلط وعلاقات فاشله ولو جبلك هديه بيبقى تعبير عن الفتره الجميله الى استغلك فيها وعاش معاكى وقت جميل مش اكتر وعمره ما هيرتبط بيكى وبما انكم مصدقين انكم بتحبوا بعض ومصدقه ان هيرتبط بيكى احتفلوا انتوا بفلانتين بقا المجانين فى نعيم مع نفسكم

ثالثا وسامحونى لو طولت عليكم بس عشان نقفل الموضوع ده الفلانتين انتوا عارفين ايه حصل فى اليوم ده واحد كان بيعمل معصيه تغضب ربنا مع حبيبته وقتلوه معلش بقا انتوا بتحتفلوا بالمعصيه ولا بتحتفلوا ان مات ونفسك حبيبك او حبيتك تموت كمان ياريت نفهم ونبطل التقليد واحنا مغمضين وعلى فكره الاحفتال بالفلانتين  مش بيقول انك حد متفتح وعصرى بالعكس ده معناه انك مش فاهم اى حاجه

انا قولت اخر حاجه بس معلش سامحونى بالنسبه للدباديب ليه بتختاروها هديه وبتفرحوا بيها اقولكم سر تصفحت الانترنت فى مره كده اقرا عن عالم الدببه

لقيت ان الدب بيقعد مع الانثى شهر بس وبيطفش انت قصدك كده بقا قولتلى
 انت مقرر بقا بس قريت كمان لان الدب عنده حاسه شم قويه وحاسه سادسه ودى عند الست الى بعد الجواز بتراقب بيها جوزها انا راى تلغوا الدباديب خالص

واخيرا ربنا يجعل ايامنا كلها حب وناخد بايدين الناس الى بنحبها ونرضى ربنا مش نعصى ربنا باحتفال بمعصيه عم الفلانتين ده