- "رايح فين؟"

* "داخل اصلي"

- بيفتح دفتر "اسمك ايه؟"

* "يا باشا أنا هصلي وماشي على طول"

- بيرفع عينه في غضب "وهو أنت فاكرني عازم عليك على العشا؟! اسمك ايه يا أستاذ؟"

* "رضا عيسى"

- "عيـ .. عيسى ازاي؟"

* "يعني ايه عيسى ازاي!"

- "ايه اللي جايبك هنا يا عيسى؟!"

* "لا م هو أنا اسمي رضا .. عيسى دا يبقى أبويا"

- "متبنيك يعني؟"

* بابتسامة محرجة "لا لا .. هو أبويا فعلاً"

- "يبقى أنت كنت ا....؟!"

* "كنت ايه!"

- "من الجماعة اياهم"

* "جماعة مين؟؟"

- "الزُرق"

* "هي في جماعة جديدة اسمهم زُرق؟؟!"

- "يا جدع افهم .. أنت مخك قديم ولا ايه؟"

* "معلش والله أصلي مش متابع"

- "قصدي كنت مسيحي؟؟؟!"

* "ااااه لا لا .. عادي .. بس ليه زرق؟!"

- "هيا بتتقال كدا"

* "..."

- بيبص تاني في الدفتر "رضا عيسى .. رضا عيسى .. رضا .. رضا .. رضا .."

* "...."

- "امممم .. للاسف يا استاذ رضا .. اسمك مش موجود في الكشف .. مش هينفع تدخل"

* "كشف ايه؟!"

- "دي حجوزات صلاة الجمعة"

* "ايه الصلاة بقت بالحجز!"

- بيضحك " كل كورونا وانت طيب يا استاذ رضا"

* طب أنا عايز أصلي؟"

- "لازم تكون حاجز .. اسف .."

* "ازاي يا جدعاااان؟"

- "الصلاة عندنا بتتحجز قبلها بيومين .. احنا شغالين من الفجر لحد أذان الظهرية"

* "مش قصدي ازاي احجز .. أنا مستغرب بس"

- "بتحجز الصلاة من غير خطبة أو بالخطبة شوف انت عايز ايه"

* "ولو عايز أصلي السنة؟"

- "دي ليها نظام تاني يا فندم"

* " طيب .. متشكر ليك"

- "مش عايز تسمع باقي عروضنا؟؟"

* "...."

:D :D :D