هي اللحظة دي اللي بتبتسم فيها من جواك وبتبقي عارف ان السبب فيها رضاك عن نفسك عن اللي وصلتله واللي لسه عايز توصله.. اللحظة دي بكنوز الدنيا إحساس الشبع اللي جواك لا يقارن بأي حاجة تانية .. إحساسك باتساق شديد مع ذاتك هيولد فيك إحساس بالاكتفاء عمرك ما حسيته لدرجة انك هتبقي حاسس انك لو شرحته لحد مش هيفهمه. طبعا كل اللي هيقرأ الكلام ده هيقول الست دي عايزاني أوصل لايه ؟! عايزاك/عايزاكي توصلي لأنا اللي جواكم تسمعوها وتفهموها ومتخافوش منها. فهم النفس اول طريق السعادة وأول طريق مساعدة الذات. لو فهمت نفسك ده هيبقي اكبر استثمار انت هتدخله في حياتك. وارد فيه تكسب او تخسر بس حتي لو خسرت حاول تاني وتالت لحد ما توصل للمكسب الأخير نفسك!

الحياة ساعات بتسرقنا من نفسنا وساعات كتير بنسمح لتجاربنا ومخاوفنا انها تشوه ذاتنا وتحبسها وترمي المفتاح في بير غويط متكتف بعادات وتقاليد ومفاهيم كل علاقتنا بيها ان احنا اتربينا عليها وملهاش علاقة بالمنطق. بنتكلم كتير عن الناس اللي في السجون واد ايه فكرة السجن صعبة بس في الحقيقة ان في كتير فينا او معظمنا مساجين. في خيط بيربطهم ومكتفهم بميت سلسلة. فك السلاسل صعب بس الأصعب فكرة الاستسلام ليها !الحياة حلوة ربنا خلقنا فيها عشان نعيشها عشان نأثر فيها بالإيجاب مش عشان نعيش نعشم نفسنا بالجنة عشان نقبل نص عيشة في الوقت اللي احنا ممكن نخلق جنتنا علي الارض. متخافش انك تكون اناني ساعات وتفكر في نفسك وازاي تبسطها . ما هو عشان تسعد لازم تبقي سعيد.. عشان كده هختم واقول القليل من الأنانية لايضر اذا كان من أجل اسعاد نفسك ☺