المشهد دا من فيلم هاري بوتر الجزء قبل الأخير ، لما( هرميوني ) قررت تسيب أهلها وتروح مع ( هاري ) و(رون ) يدوروا على الهوركروكس بتاعة سيد الظلام ، المشهد دا بالذات كل ما ييجي الجزء دا افضل اعيد وازيد فيه ، هي فضلت ان أهلها ينسوها وتمحي وجودها وذكرياتها من كل حاجة حتى من الصور بأمر واحد للعصا السحرية بتاعتها ..

دايماً المشهد دا بيشدني قوي .. احنا فعلاً محتاجين عصا سحرية بأمر واحد منا ننسى كل حاجة ..

ننسى ناس اتعلقنا بيهم وكان نفسنا يبقوا جزء من حياتنا بس ربنا ما أرادش ، فنكتفي اننا نراقبهم من بعيد أو نفتكرهم وعينينا تدمع ..

ننسى ذنوب عملناها وقلبنا اتقطع بسببها وبنتعب كل ما نفتكرها ..

ننسى ناس دخلت حياتنا واما اديناها الأمان كانت الطعنة الكبيرة ، وطعنات القلب مش بتروح بسهولة زي طعنات الجسم ، دي بتفضل تنزف مدة طووويلة قوي ، وحتى مع شفاءها بتسيب أثر

...........................................

الذكريات مش بتوجع ولا بتؤلم .. دي بتقطع القلب ، بتعمل فيه جروح كدا زي سكينة بالظبط ، بالذات لو انت فاكر حاجة بالتواريخ .. بالأماكن .. تروح مكان تشوف ذكرياتك فيه تحس انها قريبة قووي ولسه موجودة ، ولما تفوق تكتشف انك كنت بتحلم ..

لما تكون عاوز حاجة قوي ومن كتر ما انت نفسك فيها بتصدق انها حصلت وممكن تحلم بكدا كمان ، بس لما ما تحصلش بتبقى واقف مش مصدق .. ، زي واحد كان فاكر اسمه بين الناجحين وواقف مبتسم وخلاص هو ناجح ، وفجاة ما سمعش اسمه ..

مش معقول .. هو انا بجد عشت الكلام دا مع الناس دي !! هو انا كنت باحلم والا كان بيتهيألي ! هو الكلام دا أنا مريت فيه حقيقي ؟!!

ناس كتير بييجيلها خيالات بسبب الذكريات دي ، وتشوف حاجات مش موجودة ، وفيه اللي بيصيبهم كوابيس وأمراض نفسية وساعات بتؤدي بيهم للجنون بجد ..

وفيه ناس يتتعايش وبصعوبة - تحط الذكريات دي ف جزء مظلم من قلبها ، جزء دايمًا تحط فيه كل حاجة عاوز تنساها .. أو تمثل انك نسيتها

................................................

بجد كل ما اشوف المشهد دا عيني تدمع وانا بافتكر كل حاجة عاوزه انساها ، ياريت عندي عصا سحرية زي بتاعتك يا ( هرميوني ) كنت اصدرت لها أمر النسيان بلا تردد حتى لو نسيت اسمي وحياتي كلها ...

( أوبليفيات )