من مدير مكتب الرئيس عبد الناصر لجاسوس اسرائيلى........

فى ظل أحتفاظ أجهزه ألامن بقضية أشرف مروان تظل القضية عباره عن أقاويل وروايات اسرائيليه لا نملك تكذيبها أو اليقين بصحتها 

الحاجات المؤكده 100% حسب الوثائق المنشورة للعامة حسب القواعد والبروتوكولات  اشرف بعد نكسة 1967 ولاسباب مركبة أهمها الفلوس ومنها الميل انه يكون مع الطرف الكسبان والاقوي ومنها مشروع جوازه من منى -بنت الرئيس عبد الناصر-لم تحقق أحلامه لان عبد الناصر همشه ، قرر يتصل باسرائيل ويعرض خدماته

فى البدايه خلينا متفقين ‏أن مروان قدم لاسرائيل خدمات لاتعد ولا تحصي منها خطة حرب اكتوبر بالتفصيل قبل وبعد تعديلات الشاذلي من اول جرانيت لحد الماذن العالية,  منها انه قدم لاسرائيل اكبر خدمة فى التاريخ كله من اوله لاخره وهي التحذير بيوم الهجوم , واللي لو ماحصلش وقوات الاحتياط متجمعتش كان مسار الحرب هيبقا فى طريق مختلف ؛‏أما سبب مشكلة مروان مع اسرائيل فى فترة ما وسبب افتراض انه كان جاسس مزدوج واننا ضحكنا على اسرائيل هو حاجة واحدة بس , الحاجة ديمتعلقة بجنون السادات والحظ مش اكتر ولا اقل ‏كان في خطة ما للحرب ومتطلبات من اسلحة وغيره الخطة دي اتغيرت والمتطلبات اتغيرت مع الوقت السادات قرر فى مرتين يحارب خلاص وحدد معاد تقريبي ولأسباب مركبة متعلقه بجنون السادات ورجوعه فى ارائه فى الاخر, او اسباب متعلقة باطراف أخرى كان بيتراجع فى اخر لحظة

‏‏اسرائيل بلد قواتها الاحتياطية هما دول الشباب اللى مشغلين البلد كلها , لما يجمعوهم البلد بتقف وبتنهار تماما , اشرف فى مرتين حذر اسرائيل ان الحرب جاية وماحصلتش  هو مكانش بيتلاعب بيهم  بس ده خلي جهة بيمثلها ايلي عيزرا بتاع الاستخبارات العسكرية تقتنع ان الواد بيتلاعب بيهم وبيخونهم ‏ايلي عيزرا لولا تاريخه هناك كبطل لايمكن الشك فيه كان ممكن يتحاكم بعد الحرب بسبب كم غلطاته وتجاهله لحاجات صريحه وفبركته لتقارير وغيره عشان يقنع الناس هناك ان مافيش حرب جاية , فايلي عيزرا عشان يهرب من كل ده وينقذ تاريخه واسمه وسمعته انه يحارب المنطق والعقل فى موضوع اشرف مروان……

‏فيه نقطة مهمه برضو الكاتب فى الكتاب بيتسائل عن اسباب خيانة مروان , فبيقول حاجات كتير اهمها الفلوس , بس هو مش شايفها السبب الوحيد وانا معاه, هو شايف فيه سبب تاني مهم وانا متفق معاه فى ان اشرف بطبعه بيحب يبقى مع الطرف الكسبان , شاف اسرائيل أقوى من مصر وقف معاها بيحب يشجع الاقوي

‏فيه حاجة برضه ضحكتني فى الكتاب , بتوع الموساد كان عندهم مشكلة ارهقتهم فى اول تجنيد مروان ان مروان شخص مسرف جدا ومش بيقدر يسيطر علي نفسه فى الفلوس والتبذير , وهو هياخد منهم مبالغ كبيرة , وخافوا الناس فى مصر تبدأ تتسائل جاب الفلوس دي منين ويشكوا فيه فيكتشفوا خيانته ‏بس ضابط محنك قالهم ماتقلقوش فى مصر ده مش مشكلة  ماحدش حيسال السؤال ده , لان طبيعي حد فى مكان ومنصب وعلاقات مروان فى مصر يكون فاسد , ويبقي معاه فلوس مالهاش اول من اخر مش معروف مصدرها ماحدش هيدور وكله هيفترض انها فلوس جاية من فساد ورشوة بس ماحدش هيفترض الخيانة وده اللى حصل

وفى حاجه عايز اضيفها ‏:

في حياة اشرف مروان في نقطة مهمة جدا وغريبة جدا ان كل الكتب والوثائق عنه انه لم يخون مني ابدا رغم انه كان فيه فرص لاتعد ولاتحصي ورغم انهم قضوا سنين منفصلين  ورغم ان فيه اجماع انه ماتجوزهاش عشان حب هو اتجوزها عشان كان مخطط يستفيد من منصب والدها 

‏بس هو الواضح ان اشرف مروان رغم ان كل حياته فساد وخيانة وسرقة  قعد طول حياته شايل لمني جميل انها وقفت ضد ابوها واجبرته يوافق عالجوازة ووقفت ضده لما كان عايز يطلقها منه اد ايه الانسان كائن صعب ممكن يخون بلده عشان الفلوس بس مايرضاش يخون مراته اللى مش بيحبها عشان شايلها جميلة

‏عيب الكتاب فى حاجات قليلة , مثلا المؤلف الاسرائيلي اي حاجة مصر عملتها جيده مش بيعتبرها ذكاء او حنكة مننا اي حاجة عملناها صح كانت واضحة من الاول لاسرائيل بس هي غلطات فردية منهم بس لكن هما اذكي فى كل حاجة واحنا ماعملناش اي حاجة فيها فكرة او ابتكار  بس الحظ والعشوائية خدمونا

‏تقييمي للكتاب 8 من 10 الكتاب جيد الراجل فعلا قرا كتير جدا عن اشرف مروان سواء الكتب او المقالات اللى اتكتبت عنه فى مصر او اسرائيل او اوروبا بالأضافه انه تعب عشان يدور علي كل الوثائق الاستخباراتية اللى بقت متاحة للعامة 

اخيرا قائمة المصادر والمراجع والوثائق فى اخر الكتاب ممتازة.