نظرت له نظره اشتياق ، نظره العوده للوطن بعد الغربه ، وتنهدت ثم همست"وحشتني " ! وحشني التفاصيل اللي كانت م بنا احنا بس ، واحشني صوتك اخر الليل بعد تعب يوم طويل وانت بتقولي قد ايه انت تعبان، واحشني ضحكتك اللي بتخليني مش علي بعضي كدا وببقا نفسي اقولك انها اللي بتعيشني ، واحشني اشوفك مركز ف كل حاجه ، واحشني وانت بتقولي ذاكري انتي قدها، ولما ابقي مضايقه فجأه تخرج عن وقارك وتقلب ارجوز عشان بس تشوفني بضحك ، وحشني رخمتك عليا ولما تحس اني اضايقت تقولي بحب ارخم عليكي لو مرخمتش عليكي هرخم علي مين بس، واحشني اكلمك بعد الامتحان واقولك انا قد ايه حليت حلو ، ولما يومي يبقي وحش اجري اكلمك عشان يقلب لاحلي يوم ، واحشني تقولي يلا جيبلك سينبون عارفك بتحبيه ، بس نسيت تقول اني بحبك اكتر منه، او هو مش منه بس انا بحبك اكتر حاجه ف العالم ، واحشني احضنك جامد اوي واقولك دا مكاني انا ، انا وبس ، واحشني تقولي انتي اميرتي وبنتي ، عرفت معاكي أكون أب، عرفت معاكي أكون راجل ، قدمتيلي كل حاجه ف انا النهارده جاي اديكي حاجه واحده يمكن مش قد مقامك .. "انا قلبي كله ليكي " واحشني اسمع حواديتك وتقولي بعرف احكي حواديت ، واضحك واقولك اوي ، واحشني صوت نفسك وانت مخنوق واقولك عشاني روق ، واحشني كل تفصالنا اللي متعشتش ، ...

ساد الصمت قليلا وربما طويلا لا أدرى ولكن حينها العيون كانت تقول ما لا يقال ..

لينطق اخيرا..

انا جاي اقولك النهارده اني عاوزاك معايا طول حياتي ، مش هوحشك بعد النهارده ، تتجوزيني