مش دايما بيكون اصرارنا علي شيء معين , ومحاولاتنا المستميتة عشان نحققه او نلاقيه بيكون قرار صح او نقطة ايجابية في حقنا ....... في بعض الامور لو اتسابت للقدر من غير اي تدخل او حتي تفكير وتدبير مننا بتكون اجمل واحلي بكتير جدا.
دي الحقيقة الاكيدة اللي وصلتلها بعد معاناة طويلة , وانا بحاول ادور علي الحب والمشاعر
في كل قلب طيب بقابله ...... لدرجة اني ساعات كتير كنت بحس نفسي عاوز احب وخلاص,
مش مهم مين , ماهو اصلا كل البنات شبه بعض بيختلفو بس في الشكل منهم البيضا والسمرا
الطويلة والقصيرة بغمازات او من غير , غير كده كنت باعتقد ان البنات كلها في شخصيتها وطباعها وميولها زي بعض تقريبا.
يمكن اي بنت كنت بتعرف عليها كانت بتحس من غير ما اتكلم بطريقة تفكيري دي ,
وده بيوصلها فكرة محددة ....... اني مش صادق في مشاعري ناحيتها واني متقلب .
للاسف خوفي من الفشل كان بيبقي اقوي من تعلقي ورغبتي اني اكمل مع بنت معينة ,
وده كان ساعات كتير بيبان عليا في رد فعلي وكلامي ...... كل ده كان ضد اني ابني العلاقة
المستقرة اللي بدور عليها وتتحول حياتي لسلسلة من التجارب والنزوات اللي كنت بدخلها وانا
متوقع نهايتها بجملة تحمل مليون معني وتفسير ........ "انت زي اخويا".