هتفضل رمز للرجولة وللكرامة..
هتفضل شمس تنور في عز الغيامة
هتفضل تاج على راسنا رغم الغياب..
تسلم إيديك تسلم عنيك مليون سلامة
**********
انت الشريف العفيف
الراجل الحر الأصيل..
مستعد عشان كرامته
يحول الأنوار ل ليل
وبعلو صوته وقت موته قام وقالها..
إيه يسوي عمري
لو عن مبادئي في يوم أميل ؟
**********
زيك أنا يا عويس
مستني في أي لحظة أموت
وقلبي مليان بالكلام
والملام رغم السكوت
يحرموني من الهوا
ومن الحياة لكن كرامتي
ما أتهاون فيها لو جوه
كفني وفي قلب التابوت
**********
علمونا ان العين بعين
والسن يتاخد بسن
وطبقوها بس على الكبار
وسابو الغلبان يئن
الغابة ليها نظام حكيم لكن غابتنا
فيها الكلاب مطلوقة
والأسود محبوسة جوه سجن
**********
فادية صقر
************