اسمك ايه يابني ؟؟

انا خالد الجمال

سني 29 سنه

اعزب مش عشان مش لقي بنت الحلال لا عشان مش عارف استر بنت الحلال للي لقتها هناك فرق !

خليني اقولك حكايتي ياحضره الظابط.

انت لسه هتحكي شكلنا هنتسلي عليك انهارده بس قول سمعني

حاضر ياباشا بس اسمع بس الحكايه هتعجبك

اسرتي اسره متوسطه المستوي من للي مبقاش موجود منها كتير الايام دي لانهم خلصوا ف الزمن دا تم رصفهم سعادتك يعني

دخلت ثانويه عامه و جبت مجموع كويس دخلني كليه تجاره انجلش ، طبعا سعادتك شايفني اهبل او تافه تجاره انجلش ايه اكيد كان نفسك تسمع اني قدمت ف شرطه او عسكريه عشان ابقا قد المقام بس يالا طيش شباب سعاتك و الواحد عرف غلطه .

طبعا سياتك مشوفتش بنات ف كليتك ودا لان الشرف مفيش احلي منه طبعا انما انا بقا فاسق كانوا بالنسبالي زي السجاير كل يوم علبه شكل و نوع مختلف و طعم تاني ، عارف سعادتك بتفكر دلوقتي و بتقول جواك هتعملي فيها مقطع السمكه و ديلها و عامل فيها بورم بس اديك وقعت تحت ايدي ياقفل ، لا ياباشا دا شرف ليا اني وقعت تحت ايدك الكريمه صدقني ، المهم حبيت بنت الحلال للي معرفتش اتجوزها و دا طبعا لاسباب ماديه لان سعاتك الشقق نار و العفش نار و الدهب نار الخ الخ ...

ف اهلها رفضوني بدل المره خماشر تمناشر مره يعني كانوا عايزين بنتهم تعيش عيشه كريمه مع ان لو جالها واحد بيشرب حشيش ومعاع فلوس كانوا وافقو بس العيشه الكريمه ف نظري مش فلوس بس للي بيهدي ب يرزق برده يابيه ولا انت مش معايا

معاك ياسي زفت خلصني بدل ما اخلص علي للي خلفوك

لا ياباشا ما هما خلصوا بس رباني مش بفعل فاعل

نرجع لموضوعنا اتخرجت حضرتك انسان كئيب شايف الحياه سوده دا حتي قفلت فيس بوكي كام شهر كدا بسبب الموضوع دا و بقيت كائن لا يطاق والله يابيه فتره كاروهات ف حياتي الله لا يعودها ، وانت جي تفرفش معايا بقا ولا ايه يابن المجنونه ؟؟ لا يابيه هقولك بس اسمعني وطول بالك حبه ، اتخرجت و قولت اشتغل و اعمل مستقبل مشرق و باهر كدا زي سيادتك ما شاء الله عليك يعني بس قولي ياباشا العربيه الماتركس القرموزي للي برا دي بتاعتك لو السؤال دا شخصي ياباشا متجوبش عليه انا بس شدني انها من غير نمر و متفيمه و كمان مصروف عليها كتير يالا ربنا يزيدك ياباشا ، لقيت حضرتك بقا و ما ليك عليا حلفان ان الشغل ف بلدنا هما حاجتين او تلاته بس و شهادتي للي هيا متجيش جمب شهاده حضرتك حاجه طبعا طلعت ورقه بيضه ملهاش عازه سعادتك اصل احنا ف زمن بنجمل فيه اي حاجه سعادتك مش عشان احنا زوق زيك كدا لا خالص عشان بس بؤس بعيد عنك و عن السامعين ف جربت اشتغل حبه هنا و حبه هناك لحد ما قولت لا الشغل الحر هو الحل ورفعت رأيه انا رئيس جمهوريه نفسي و فتحت مشروع كده لامواخذه ملابس حريمي بس داخليه سوري ف اللفظ يعني و فشلت مش عشان لا سمح الله ببيع حاجات اي كلام لا الماركات ياباشا كلت عقل الناس بيجيبو بوكسرات استغفر الله العظيم اتش اند ام سعادتك و بول اند بير و دايس تخيل سعاتك بكام ؟؟ عارف بكام خلصني انا هسمع الهبل دا كتير ولا ايه لا يابيه بس طول بالك بس معايا و من المحل دا ياباشا عرفت اشكال و اللوان من الناس لحد ما عرفت الواد حماده يونيون اير اه ياباشا دا واحد بتاع تكيفيات قد الدنيا و عنده ورشه بيصلح فيها تكيفيات العربيات كمان قالي ياباشا انت هاتلك تمنايه ولا توكتوك او لو مقتدر خش شرك ف مكروباص ترامكو من بتوع شارع العشرين حاجه ثابته و اخرها مصاريف بنزين مهما عملت حوادث عايشه وشغاله و بتجبلك ايراد كل يوم و تعرف تصرف علي نفسك كلامه صراحه سعاتك دخل قلبي و حسيته واد ابن حلال و خايف عليا ف جبت المكروباص ياباشا و شغلته علي خط جيزه دار السلام مش عشان في ركاب كتير لا الخط دا وشه حلو علي ناس كتير جابوا منه عربيه واتنين و تلاته بس نعمل ايه سعاتك قليل البخت يلاقي العظم ف الكرشه ، كرشه ايه يابن المبقعه ماتخلص ياض والله احبسك هنا ما اخرجك خلاص ياباشا انا خلاص هنزل بالتتر بتاع النهايه ، شغلت اللمكروباص ياباشا و من تحت لتحت انت عارف الرخص ياباشا موال وانا بصراحه كنت متخانق مع المرور عشان حبيت افيم المكروباص يعني اقرع و نزهي سعاتك وكانت ماشيه حلاوه و اي امين بصراحه كنت بوجب معاه كان بيسبني و مش بنسهاله سعاتك حتي اسأل الامين للي عند بنزينه الزهراء يوماتي العشاء كباب مع لتر بيبس مشبر و احيانا سجاير مالمستورد ف ياباشا اديك شايف للي بقدر اطلعه بطلعه خيري لغيري يعني ف العربيه ياباشا للي مسكتوها دي عليها اقساط و بتدفع منها مصاريف جامعه لاخواتي و بصرف علي نفسي البوكسرات سعادتك مبقاش يعملوا عليها سيل و انت كلك نظر و ابو المفهوميه قولي بقا هتاخد كام و تسيب العربيه ياباشا ...... !?