ساعات كتير بحاول افتكر كام مرة قولت فيها لنفسي وللي حواليا , انا نفسي ابقي
"كذا" او نفسي اطلع "كذا" بصراحة بتعب اوي من العد والذاكرة بتخوني اوي , فبضطر اكمل واحلم
حلم جديد واعيش فيه كأني حققته بالظبط وبعد فترة انساه واحلم بغيره كالعادة.
دورت كتير علي تفسير منطقي للافكار اللي بتبتدي وكأنها اتخلقت علشان انفذها واحقق فيها
طموحي وذاتي , وبعد شوية تتحول لمجرد فكرة سخيفة عارفة مكانها علي رف من دولاب ذكرياتي .
صحابي واهلي كان دايما ردهم علي اي حلم جديد باعتنقه اني حد مجنون فعلا , او مذبذب ومش
عارف انا عاوز ايه بالظبط ......بس انا مكنتش مقتنع بالرد ده وبقول اكيد فيه تفسير تاني لاحلامي
اللي مبتخلصش ولا بديها فرصتها حتي تتحقق .
لحد كام يوم بس كنت في الحيرة دي "انا ليه باعمل كده ؟ ماهو يا ابقي طموح يا بلاش .",
بس قبل ما اكتبلك المقالة دي عرفت ايه هي مشكلتي , ويمكن تكون مشكلتك انت كمان ومش عارفها
زي ما انا كنت مش عارفها .......الخوف من الالتزام والارتباط بشيء محدد هي دي مشكلتي ,
ولو هي دي مشكلتك احب اقولك ان الحياة كلها التزامات وارتباطات فالاولي انك لو عرفت ايه هو
حلمك الحقيقي متخفش انك تلتزم بيه وتجري وراه , حتي لو مت وانت بتحاول تحققه حتموت راضي
عن نفسك , وحياتك متبقاش راحت وانت لسه بتدور علي حلم تتشعبط فيه .
اسلام يوسف