تأخر سن الزواج اصبح هاجس لكل اسرة مما يدفعهم لتزويج بناتهم مبكرا لاى شاب (مقتدر ماليا ) ظنا منهم انهم كدا هيسعدوا بنتهم ويوفرولها حياة كريمة ولكن ده اكبر مشكلة ومن اهم اساب الطلاق

البنت فى مصر بتتجوز لكذا سبب منهم :

1- الخوف من شبح العنوسة وتأخر سن الزواج

2 - ضغط الاهل

3- البحث عن الحرية المفتقدة فى بيت الاهل

4- تقليد زمايلها البنات ( اللى كلهم اتجوزوا وهى لسه )

اغلب هذه الاسباب تؤدى الى الطلاق حتى الزواج عن حب واقتناع قد ينتهى بالطلاق قالزواج زى مابيقولوا ( زى البطيخة ) مفيش قواعد ولا اسباب للنجاح

- ولكن كل اللى نقدر نقوله شوية نصائح مهمة جدا

1- اوعى تتجوزى لمجرد الخوف من الجواز او الخوف من شبح العنوسة عشان مترجعيش لبيت اهلك تانى مكسورة معاكى دستة عيال مش عارفة تعملى فيهم ايه

2- اوعى تتجوزى عشان تدورى عن الحرية لان لو معرفتيش تاخديها فى بيت اهلك عمرك ماهتاخديها فى بيت جوزك لان القيود اكثر بكثير

3- اوعى تتجوزى عشان تقلدى صحابك اللى كلهم اتجوزوا خلى ليكى حياتك المميزة فيها انتى مش شبه اى حد وان مش عشان هما اتجوزوا بقوا اسعد واحسن منك الجواز هو عملية طبيعية تقوم بها اغلب الكائنات مش حاجة مميزة او جديدة الجواز مش مقدار سعادة او نجاح

4- اوعى تتجوزى عشان حاسة بفراغ او ملل او مش لاقية شغل اوحاجة تملى فراغك لان الفراغ ده حاجة جواكى انتى عمره ماهيروح بجواز بالعكس هيكبر وهتعانى من فراغ اكبر بعد الزواج

اتجوزى بعد ما تحققى ذاتك , بعد ما تعرفى انتى عايزة ايه وتحبى ايه وتكرهى ايه , بعد ماتعرفى تختارى مش تجبرى على حد , بعد ماتعرفى اولوياتك واحتياجاتك

اتجوزى عن اقتناع وعقل وحب وليس مجرد جوازة والسلام