المفهوم دا انتشر جدا الفترة اللي فاتت يعني اية توكسيك يعني انت في علاقة بشخص مؤذي

ومؤذي هنا مش معاناها مؤذي جسديا 

لأ مؤذي نفسيا ومعنويا وجسديا كمان شخص بيدمرك وبيدمر علاقتك بنفسك 

#التوكسيك 

هو اقرب ما يكون للنرجسي اللي بيخليك في علاقة مش مفهومة بيحبك ولا بيكرهك قريب منك ولا بعيد

انت مالي حياته ومهم بالنسباله ولا مجرد شخص عادي وعابر سبيل

انت شخص بيثق فيك ولا بيشك فيك ومحتاج تبرر كل خطوة وكل تصرف

هو طيب وحنين وبيسامح ولا قاسي والغلطة عنده لا تغتفر مهما كانت بسيطة ولازم تتعامل معاه بحذر احسن تقول كلمة ممك مش علي مزاجة أو هو يفسرها بطريقتة لمجرد انه يزعل ويغضب ويبعد وتفضل تحايل فيه وتراضي فيه

بيضحكك ودمه خفيف وقعدته حلوه ولا كئيب وعايز الوقت يخلص بسرعه

بيخليك تبقي مش عارف انت عايز ايه فعلا

دماغك هتنفجر من التفكير 

انت مش عارف انت عايز ايه انت حلو ولا وحش

انت تستاهل تتحب ولا متستاهلش 

انت بالشكل اللي بيقوله دا ولا هو فاهمك غلط

انت مين انت هتحارب في علاقة. من طرف واحد ولا هو معاك 

هو جمبك وقريب وهيرتبط بيك رسمي ولا انت مش في دماغة من الأساس

ولو مخطوبين طيب خطبني ليه لو بيحاول يهز ثقتي بنفسي لو مش انا الشخص اللي كان بيحلم بيه 

هو ارتبط بيا ليه لو مش بيحبني وعايزني 

طيب ليه بيعمل كدا وعايز ايه

هو بذات نفسة ممكن يبقي مش عارف هو عايز ايه هو طلع كدا واتعود علي كدا وتلاقيه اتربي كدا بيكون عايز الكل يهتم بيه ويفكر فيه ويخلي باله منه ويبقي كل اللي حواليه مناهم رضاه والقرب منه وطلباتك أوامر

حتي شوبيك لوبيك مش بتبقي كافيه هو طول الوقت عايز اكتر وعايز زياده 

ومبيقدمش اي حاجة في المقابل إلا لهدف وبيكون عايز يثبت انه كويس وانت اللي وحش

وممكن يكون فعلا قاصد كل تصرف وكل موقف ودارسة كويس ودا بيكون أخطر لأن هدفه يدمرك فعلياً لسبب ما سبب خفي اما يكون يقصدك انتي بالذات بشخصك 

او تكوني مجرد نموذج مجرد شخص وقع في طريقة بيطبق عليه الخطة عشان يثبت حاجة معينة

يعني بيكون في حرب وصراع من طرف واحد هو عايز ينتصر ويفوز مهما كانت النتايج أو الخساير

حرب انتي لا تدري عنها اي شئ

طار قديم في دماغة بياخد حقة منك

ايا كان سواء يقصد او ميقصدكيش

اي حد في علاقة زي دي يهرب فورااااا

وبدون تفكير وبدون تبرير اسوء ما في علاقة التوكسيك هو التبرير طول الوقت بدوري علي مبرر علشان تستمري علشان تسامحي

طول الوقت بدوري ليه علي فرصة تانية علي أمل جديد من غير حتي ما يطلب منك انتي االي عايزة تكملي

لإنه بيشوهك قدام نفسك لحد ما تقتنعي أن العيب فيك انتي  

وفرضاً انتي العيب فيك وانتي السئ في رواية أحدهم اهربي وانقذية وانقذي نفسك

بلاش تبرير ولا اعذار ولا تبصي وراك

اي حد بيوصلك تشوفي نفسك قليلة أو غلطانه أو بدافعي عن نفسك او وظيفتك تراضي وتصالحي اخلعي اخلعي بلوك بلوك

اما اللي اتجوزت وخلاص فدي محتاجة رواية تانية وفصل جديد

#گاميليا_محمد 

#مستشار_اسري