لعشران , لخوت , دريات , ليوم غنهدرو فواحد سبيد وكاين لي غادي يقول كتفلسف علينا وكدا مهيم مكين لا فلسفة لا ستدريال هدشي لي غادي نهدرو فيه باين و واضح بلاما نبقاو نزوقو فيه ونديرو ليه لمكياج لخدمتي غير عقلك وفكرتي مزيان غادي يبان ليك داكشي من لداخل ماشي من برا داكشي علاش قبل ما ندخلو فالموضوع كنبغي نقول ليكم راه ناس لولين لي كانت عندهم لحكمة قالو لينا " المزوق من برا أش خبارك من الداخل ".

             كاتجينة غريبة لسمعنا هاد الكلمة ' العدمية ' و الأغلبية معارفينهاش أش كتعني ولي عارفين المعنى ديالها كايتبرئو منها بغض نظر على ناس دبصح تاع العدمية و تحية ليهم هوما على الأقل مكينافقوش راسهم وكيعتارفو بيها , مهيم قبل ما نبدى نطلق عليكم العلم ديالي غادي نطرح أسئلة  وهاد الأسئلة هوما لي غادي ناقشوهوم باش نعرفو المعنى الحقيقي ديال " العدمية بالمكياج "  :  

-واش سلوكات ديالنا عدمية ؟ 

مغديش نقول كولشي حيت بنادم طوب و حجر و كيف كايقول الأسطورة بلال كاين و كاين ولكن كاين لأغلبية فينا عندو هاد سلوكات وكيديرهم يومين بلاما يحس بلاما يتحرك فيه والو بالعكس عند بالو راه داكشي لي دار هو صحيح و منمشيوش بعيد نمشيو غير قريب ناس لي مقودة عليهم خدامين بجوج ريالات عندهم بيت وكوزينا عيشين بسلك وعدي بقوة ديك لقوادة لي عيشين فيها مبقاوش كيحلمو كيفكرو غير كيفاش يتعشاو هد ليلة ومكيحاولو يبدلو والو فقدو الأمل فالحياة لهدرتي معاه وقلتي ليه خرج هضر على حق كيقول ليك أنا غا درويش باغي نعيش تا نكمل هاد ليامات لي بقاو ليا ممسوقش لعالم ولناس لي غادي يجيو من وراه و يقدرو يكونو ولادو ومتيقولش لمدرتش واحد لهدف قدام عيني وخرجت هضر على حقي أنا و لخر وهو وهيا باش تبدل شي حاجة ولي غايجيو من ورانا يعيشو مرتاحين بالعكس هو أصلان عيش بحال ميت كيتسناه غير لقبر معندو لهدف فحياتو مكيتسنى تا حاجة مكيعطي تا حاجة واش هدي ماشي عدمية ؟ عدمية وكنديرو ليها المكياج ملي كنقولو راه مسكين معندوش وكدا لمعندوش يخرج يهضر على حقو كيما خرجو ناس ومسكتوش حيت عندهم أهداف عندهم أحلام ....واش ملي كتمشي لصبيطار وكتريح شويا تا كيبان ليك جاي بنادم كيموت نتا مكتعرفوش وكتشدك البكية وميمتو غتسطى و كيجي طبيب بكل برودة كيقول ليهم راديو خاسر و لا تلفازة مخداماش حيت حاجة وحدة لي مكتخسرش عندنا فصبيطارات ديولنا هيا ثلاجة لي كيدخلو ليها لموتا بنادم فديك الحالة واخى يكون يهودي غادي تعاونو كيقول ليك طبيب حك ليلي جيبي ولا ديوه لصبيطار أخر واش هذا كيخاف الله ؟ واش مسوق لشي جهنم ؟ واش عندو شي قلب ؟ واش هادي ماشي عدمية ؟ واش غادي نبقاو غير نكبو على ريوسنا نعتارفو بيها كلا واحد عدمي بطريقة ديالو كولا واحد كيف كيدير ليها باقيين بعاد بزاااف على الإنسانية حنا عيشين غير العدمية بالمكياج واش لي عندو ختو خايف عليها دبصح ويموت إلا مسها شي واحد و هو كيتصاحب مع بنت كيدير داكشي لخاصو يدار مع العلم أنه متخيلش ختو فنفس الموقف و متخيلش راسو فبلاصت خو ديك البنت أشنو نسميو هادي سكيزو مجاتش معاه أنا بعدة كتبان ليا العدمية هي تعبير الوحيد لي كايفسر هد لبلان وكين بزاااف ديال البلانات لي كنديرو ليهم المكياج باش نتقبلوهوم ونكدبو على راسنا ونتيقو ومن الأحسن غير نتقبلوها ونعتارفو بيها . 

              وفالأخر كانبغي نقول ليكم تا أنا راه منكم ولكن أنا عارف راسي وكنبغي نقوليكم لي معجباتوش هدرتي يعود لراسو ويمشي يتقووود لشي بلاصة أخرى و يمارس نقد ديالو أنا مكنتسنى من تا حد شي حاجة أنا مقود أنا لي كاين فهاد العالم وهكدا كنمارس العدمية ديالي و شكغا وتا هد شكغا راه قلتها لراسي لتمشيو غالطين .