ضفاير - مقال كلاود
 إدعم المنصة
makalcloud
تسجيل الدخول

ضفاير

نص مسرحي قصير

  نشر في 31 أكتوبر 2018 .

ضفاير

( المسرح شبه خال . به بعض المستويات التي من الممكن أن تحيلك لشكل المتاهة أو سباق فئران التجارب ؛ حيث ستدور بها معظم الحركة المسرحية ؛ ويراعي أيضا أن تكون تلك المستويات قريبة من شكل الدائرة )

أربعة من الفتيات كل منها له سمته المختلف ؛ الفتاة الأولى بوجه رقيق تبدو عليه البراءة وملابسها توحي بالطفولة . كما أنها الوحيدة التي تملك ضفيرتين كبيرتين؛ الثانية ؛ مهتمة بنفسها . تحاول ان تبرز أنها تمتلك صفات الأنوثة الطاغية ؛ وتستعمل الملابس لإبراز هذا؛ الثالثة تحمل سمات الجدية والتفكير ومن الممكن أن ترتدي نظارة وملابس عملية أنيقة جدا ؛ وملاحظ أن لديها في وجهها مايشكل قبحا ما ... شامة كبيرة ... أثار جرح .. الخ؛ الرابعة لها بسطة في الجسم عنهن ودائما على استعداد للشجار والمواجهة. الثلاث كل منهن شعرها على شكل ضفيرة واحدة.

يبدأ العرض والفتاة الأولى وحدها في منتصف أعلى المسرح ترقص بشكل تعبيري . عمن يود الانطلاق والطيران . وتؤدي الحركات بنعومة وحالة حالمة ؛ مع موسيقى مناسبة .. فجأة تتغير الموسيقى . فتقف 1 مذعورة ومندهشة . يدخل 2؛3؛4 من أركان المسرح . الدخول بشكل ضبابي عن طريق الإضاءة أو أي شيء آخر . يحيطون ب 1

1 جيتوا ليه؟ خير؟ عاوزين إيه مني؟ سيبوني في حالي

4 ( تحاول الانقضاض عليها) فتمنعها 3

2 نسيبك في حالك؟

4 ياست سيبينا انت في حالنا الله يخليك . أنا اتخنقت منك

3 بهدوء ؛ تعالوا نتكلم بالعقل

2 عقل إيه ياست انت ؛ خلاص الواد سلم النمر وطب خلاص ؛ تقوم بسلامتها تطلع لي ( ل 4)

1 انت بتتكلمي عن إيه؟ هو انا قربت لك؟

4 تاني هتقولي هو أنا قربت لكم ؟ ياست حلي عنا وخليك في حالك واحنا في حالنا

1 أنا؟ ما انا طول عمري سايباكم في حالكم ؛ عمري مافرضت رأيي على واحدة منكم .. ل(2) . أنت عارفة ان انا مابحبش طريقتك في اللبس ولا محاولة التقرب للرجالة ولمهم حواليك . ومع كدا سايباك تعملي اللي تعمليه, ( ل3) وانت كمان عارفة رأيي فيك . ياما قلت لك بالراحة ع الناس شوية ة. والصراحة مش لازم تكون وش . يعني مش لدرجة الوقاحة يعني . ياما قلت لك عالجي العيب اللي في وشك دا . ودا شيء سهل جدا .. تردي على بكل هدوء

3 لالا أنا سايباه كدا عشان اثبت للعالم كلها إن اللي بيقرب مني بيقرب عشان جوهري وما امتلكه من علم وصفات ونظرة ثاقبة للأمور

2 والله وانا كمان قلت لها

1 ( ل4) وانت ياما قلت لك غيري طريقتك في التعامل مع الناس. انت بتدوري ع الخناق ؛ مع اني عارفاك كويس . قلبك أبيض وطيبة

4 أنا مابدورش ع الخناق .. خناقي مجرد رد فعل للتفاهة والغباء عند شوية الناس اللي يستاهلوا

1 وماطلبتش حد منكم يغير طريقته مع انكم بتتعبوني قوي

4 سيبوني عليها ( تتحرك نحو 1 يمنعها 2؛3)

أنا عاوز أعرف أنت عاملة لنا إيه

2 بتجيبينا لعندك جري بمجرد الاستدعاء

3 حتى لما بناخد راحتنا بعيد عنها .. بنلاقيها طالعة لنا وتهد كل المشاريع

4و2و3 بصراحة غلبنا .. مش عارفين نعيش .. لا بيك عارفين ولا من غيرك عارفين

3 وبما ان دي لحظة نادرة جدا

2 أيوه عمرنا مابنتتجمع كلنا كتير

4 ومع اني مخنوقة منكم كلكم . لكن وحشتني لمتنا

3 نرجع للموضوع لو سمحتم. ماتبقوش عاملين زي المثقفين المصريين يفتحوا موضوع وفجأة تلاقيهم بيتكلموا في موضوع تاني خالص

4 نرجع ياختي ( تحرك نحو الخلف مثل عملية ترجيع الشرائط المصورة)

3 باقول إن دي لحظة نادرة

4و2و3 جدا . اننا نتجمع مع بعض ففرصة نتناقش ونسوي كل خلافتنا (ل1 موافقة)

1 ( تعود من بعيد الموسيقى الي كانت تتراقص عليها أول المشهد فتأخذ نفس الحركات .. الباقيات يحاولن أن يقلدنها تنجح 2 ويفشل 4,3)

3 باقول نرجع لموضوعنا

1 ( وهي مستمرة في الرقص) ارجعوا

4 أولا تبطلي انك تستدعينا بمزاجك في أي وقت انت عاوزاه

3و4 بنبقى مشغولين في حاجات تانية مهمة

1و2 ( 2 مازالت ترقص مع 1) أولا انا ما استدعيتش حد . انتم اللي بتيجوا لوحدكم . وكمان بتفسدوا وقتي

4 أبدا انت اللي بتجيبينا على ملا وشنا .. طيب دانا مثلا كنت ناوية اسوي حسابي مع واحدة قالت علي كلام مش ولابد

1 ( تترك الرقص وتتجه ل 4) وكنت ناوية تعملي إيه؟

4 كنت هاكشف المستور قدام الناس كلها

1و3 يعني كنت ناوية تكشفي سر كبير؟

4 ايوة

3 وعرفت السر منين؟

2 عملت شرلوك هولمز؟

4 هي اللي كانت قالته لي

3 يعني كانت مآمناك على سرها؟

1 وانت بكل بساطة عاوزة تخوني الأمانة؟

4 هي افترت علي

1 ولو

3 ماخلاص الموضوع دا

2 ( تشير ل 3) أيوا أنا وهي جينا واتصرفنا

4 فكرتوني .. أنا كنت نسيت لما اتشديت لهنا.. ازاي يابنت منك لها تطردوني من معركتي وتتصرفوا بدالي؟

2و3 عملنا الصح .. حميناك من خيانة الأمانة وأخدنا بحقك

4 ( بانفعال ل 1 وهي تحاول ان تفتك ب 2و3) والله ماحصل . دول كلموها كلمة ماحدش سمعها وخدوا نفسهم ومشوا . اخدتوا حقي؟ طب إزاي؟ قلتوا لها إيه

2 كلمة زغنطوطة

4 إيه

2و3 مش هارد عليك عارفة ليه ( للجمهور)

1و2و3 عمري ماهنزل لمستواكم . مش هاقول لكم إيه هو الصح. انتم عارفين ان انا صح وانت غلط ( للجمهور)

2و4 جايز سامعكم ناس كتير , وجايز معاكم ناس كتير

1 بس هم وانت جوه نفسهم عارفين

4 أيوا عارفين انك شرموطة باختصار

3 انا مش هناقش شوية شراميط في معنى الفضيلة , على فكرة الشرمطة في التصرفات الجسدية .. دي ابسط الأنواع . لكن العقل الشرموط الي متغلغل مابينكم هو الأسوأ

1 ( تعود الموسيقى فتنسل 1 من بينهم وترقص . ويحاولن ان يتراقصن معها وهذه المرة تفشل 4,2)

2 (ل 1) ممكن أفهم بتعملي إيه؟

1 بافكر

4 في إيه؟

1 موضوع شاغلني من زمان

2و4 ( في غيظ) قولي جايز نساعدك

1 ياترى القمر يبقى شكله أحسن في إيه؟

3 لما يكون بدر طبعا

1 ( في غضب طفولي) إخص عليكم مش دا قصدي

2و4 قصدك إيه

1 يعني القمر لما انزله . أحسن اعمله ساعة في ايد حبيبي والا اخليه عروة في الجاكت بتاعه؟

2 ( تهيم مع الكلمات)

3 ( تبتعد محاولة ان تجعل الأمر كأنه لا عنيها)

4 ودا وقته؟

2 أيوا وقته

4 ولما تنزلي القمر بسلامتك .. مين اللي ينور للناس بالليل

3 أعتقد دا سؤال غير منطقي لأنه في العصر الحديث اصبحت وسائل الانارة متوفرة

1 لا .. ماهو لما القمر يلمس حبيبي هينور الدنيا كلها وهو في مكانه .. وكمان مش هايغيب أبدا

4 يارايق انت

2 شوفي كل الوقت دا وماعرفناش مين هو حبيبك

1 ولا أنا

3 جالك كلامي؟ بتحبي وهم

1 أبدا مش وهم .. انا بارسم كل تفصيلة فيه

4 حبيب تفصيل يعني

1 ( بنفس الغضب الطفولي) لالا مش كدا. حبيبي موجود فعلا . وبما انه حبيبي إذن هيكون متوافق معايا من جهة . ويكملني من جهة تانية .

1و3 احتاج له وفي نفس الوقت يحتاجني عشان الواحد مننا يشعر انه واحد صحيح , ومافيش حد فينا يخلي التاني يشعر باحتياجه

2 يعني باختصار بتفصلي أمان دافي

1 حاجة قريبة من كدا

4 ولقتيه ياختي والا القماش ماكفاش التفصيل بتاعك؟ انزل اشتري لك؟

2 ساعات كنت بالاقي حد في شبه كبير منه . لكنها نسخ بتطلع معيوبة في الآخر

3 مش هاينفع الكلام دا.. نرجع لموضوعنا

2 جايز هو دا موضوعنا وأنت مش واخدة بالك

3 أنا مش واخدة بالي .. يابنت انا مشهور عني ان انا باشوف كل التفاصيل اللي الناس مابتاخدش بالها منها

4 ماهي دي المصيبة.. امتى ياختي تشوفي اللي بيشوفه الناس وبس.. ترتاحي وتريحي ومايبقاش دا حالك

2 يا جماعة نرجع لموضوعنا

3 ايوا .. موضوعنا الأساسي

2 لا مش قصدي .. نرجع نتكلم عن حبيبها

4 ماهي مش لاقياه

1 بالعكس باشوفه دايما

4 في الحلم بس

4 وفي الواقع ياست؟

1 طبعا ماهو موجود مافي الواقع

2 أيوا زي ماقلت قبل كدا كنت بالاقي شبه منه كتير مابيصمدوش مع الزمن

3 لالالا مافيش غيرنا هنا فلازم الكلام يكون بجد

2 انا باتكلم بجد

3 فاكرة أول واحد قلت انك بتحبيه؟

2 فاكراه

4 راح فين

2 كان في مصاعب كتير لكنه ماكانش بيحب الانتصار ... بعدت عنه شويتين لاجل الظروف .. رضخ لكلام أهله واتجوز واحدة تانية حسب المقام

3 قولي الحقيقة

1و2 هي دي

3 لا الحقيقة هي انت .. انت كنت عارفة من الأول انه مرتبط . وحاولت وسط زمايلك تبيني قوتك وانك تاخديه من ارتباطه

1 لا مش كدا

2 يمكن دا كان في الأول لكن بعد كدا حبيته فعلا

3 إزاي ؟ وانت في كل لحظة كنت دائما تحاولي تفكريه بالفارق الثقافي بينك وبين أهله وانه لازم يبوس ايده وش وضهر عشان انت حبيته

2 ( لاترد)

3 صح؟

2 دا كان هزار

3و4 والنتيجة انه بعد الهزار , وسط الظروف اللي قلت عليها سمع لكلام أهله وماسمعش كلامك انت ... تفتكري ليه؟

2 لأنه

3 مش لأنه .. الموضوع لأنك .. لأنك انت كنت بتحبي احتياجه لك وسط غربته

2 أي انسان دايما محتاج لحد يحتاجه

1و3 بس مش بالطريقة دي ,, مش لدرجة كل لحظة تخليه يشعر باحتياجه وانه مش كفء ليك

1 (ل2) صحيح ماكانش هو هو اللي رسمته لكنه كان قريب قوي. فرحت بيك معاه لكنك طيرتيه أنت وبسلامتها اللي عاملة فيها طبيب نفسي ( تشير ل3)

3 أنا؟ وانا مالي

2 مالك إيه؟

4 كلامهم صح (ل 3).. لما كنت باراقبها كنت في اوقات كتيرة تيجي انت وتطرديها وتقعدي مكانها.. انت صاحبة المستوى واللي تعرف اللي مايعرفوش التانيين وتنقلب قعدة الحب لدرس غبي

1 ( أثناء هذا النقاش تدور في المتاهة بخطوات تعبيرية حائرة مع موسيقى خافتة)

3 (ل 2) طيب والتاني

2 .............

3 قبل ما تتكلمي وندخل في نقاش التاني كان مجرد فلاش باك للأولاني مع شوية تغييرات بسيطة

1 مازلت محتفظة بجواباته

2 كان عليه كلام .. كان شاعر بجد

3 وبرضه راح ( تأخذ مسارا بعيدا وتحدث نفسها ) لو سلمنا جدلا بأن انا كنت السبب في ضياع الأولاني وعدم تمسكه بيها .. برضه هاكون أنا السبب في التاني؟

2 رحت فين؟ انت عارفة كويس ان التاني اللي بتقولي عليه دا ماكانش بيحبني كان بيحبك انت

3 بيحبني أنا؟

1 وكان بيحبني ( بصوت خافت به تذكر وحنين)

4 وكان بيحبني ( بنفس صوت 1)

3 طيب ومادام هو كان بيحبني انا زي ما بتقولي . كنت بتقعدي معاه ليه ولوحدكم؟

2 انا كمان كنت بحبه( بنفس خفوت صوت 1. ثم في لهجة زاعقة) انا كنت باقعد معاه لوحدنا؟ يا شيخة حرام عليك , دا كان كل مايقعد معايا يسألني عنك وعن بسلامتها ( 1 تقف في شموخ ثم ترقص كراقصات الباليه على أطراف أصابع قدميها مع موسيقى مناسبة في الخلفية). هو يسأل من هنا وانت تنطي وتطرديني وتاخدي مكاني من هنا

4 لكن برضه يامتيمة منك لها كلامها صحيح .. فكروا .. هتلاقوه تقريبا تكرار للأولاني

2و3و4 شروطك المنيلة في حبيبك بتخلينا نغلط نفس الغلطة ونحتار نفس الاختيار تقريبا . وبرضه النهاية واحدة .. رحيل بدون وداع .. حرام ارحمينا

4 ايوا ارحمي أمنا ياشيخة .. عاوز سيجارة

( تمد يدها في جيب 3 تخرج علبة السجائر . وتخرج منها سيجارة.2 تخرج ولاعة وتشعلها وتتجه لنحوها)

2 اتفضلي

4 لا شكرا

3 مش قلت عاوزة سيجارة

4 هامسكها في ايدي بس مش هاولعها ... بس والنبي ماتجيبوش سيرة الثالث عشان بيفور دمي

2 ماله؟ كانت قصة حب مستعجبة لها الناس كلها

3 طلع خاين

4 على ماما ياختي ( تعود 1 للمتاهة)

2 أنت اللي اجبرتيني عليه(ل3)

3 تنكري انك حبتيه؟

2 ما انكرش لكن البداية كانت غلط

4 سيبيني لها ( تلتفت ل 3) انتي ياصاحبة الفكر والأيدولجيا اخترت ليه واحد بفكر معاكس لك؟ أقول لك؟

3 وفيها أيه ( تنضم 2 ل 1 في المتاهة )

4 فيها نفس اللي قلتيه بسلامتها بالضبط .. حاولت تثبت انك قادرة على تغيير الفكر .. وهو حبك اتظاهر قدامك بأن فكره اتغير . لكن في الحقيقة كان بنفس فكره وكان بنفس رفاقة .. ماعالجتيش الفكر بالفكر يا مثقفة .. اكتفيت بس انك تقعدي معاه الهبلة دي( تشير ل 2)

3 أنا باقول نرجع لموضوعنا الأساسي اللي هو ... اللي هو بما اننا متجمعين مع بعض ودي حاجة ما بتكررش كتير ففرصة نتناقش ونسوي خلافتنا خصوصا معاها ( تشير ل1)

4 ما احنا بنتناقش هو يا دلعدي

3 سوقية

4 لولا السوق وقعدة الرصيف زمان ماكانش لك وجود ياهانم فيي الأساس

3 إزاي انا موجودة .. موجودة من زمان .. كنت معاها وهي عندها 6 سنين اسأليها

4 حتى لو دا صح .. برضه لولاي لكنت مت يادلعدي .. اتبطي واسكتي بلا نيلة

2 نرجع لموضعنا

3 أنا باقول كدا

2 مش قصدي موضوعك الرخم دا .. قصدي الحب ( 1 بعد أن كانت منزوية في ركن تقف رويدا وتأخذ وضع راقصة الباليه ، وتبدأ في حركاتها)

4 بلاش السيرة دي خلونا في المهم

3 أيوة

2 وهو في أهم من كدا؟

3و4 يوووووه

2 اعترفوا ان الأخير حبتوه بجد

3و4 كان تقريبا نسخة طبق الأصل من اللي كنت بتكونيه في خيالك ( ل1)

1 ( وهي في حالة الرقص ) كنت باغزل له القمر كل يوم شامة على جبينه

4 تقريبا انتم الاتنين لقيتوا بعض بعد فترة توهان كبيرة

1 هو اللي صحح صورة خيالي

3 كان بيغير كتير

4 حقه ياماما .. ما انت كمان كنت بتغيري

3 كان بارع جدا في تحويل لحظة الصفا لخناق

( تتحول حركة 1 من حركات صفا وحب . لحركة معاناة في طريق ما مع محاولة التشبث بشيء)

2 لكن قلبه دايما كان محاوطك

3 كان دايما بيختار الوقت الغلط في كل شيء

2 كان خايف

4 من إيه؟

2 ماهو قال لك على التجارب السابقة في حياته .. وكان خايف الأوضاع تتكرر

3 تتكرر إزاي ؟ ثم أنا ممكن أتفهم الخوف دا . لكن الخوف الطبيعي؛ من المفروض انه يخليك تتمسك بأي شعور بالأمان .. مش تهرب منه

4 انا مش فاهمة حاجة (ل2) لكن اللي عارفاه كويس . أنه بعد غيرته وخناقه الأخراني هانك قوي ., كنت عاوزة أجري وراه و وأعرفه إيه اللي عمله بس انتم منعتوني ( ل2و3)

(2و3و4 يكونو شبه دائرة تنحصر فيها 1 كلما تحاول ان تخرح من الدائرة تعيدها 3أو 4 ويلاحظ أن 1 مرة تحاول مساعدتها ومرة يكون منع 1 لها بمجرد الوقوف امامها وهي معطية لها ظهرها دون فعل)

2 منعتوني من الاتصال بيه

4 وهو ليه ما اتصلش

2 وفيها إيه لما اتصل أنا

3 فيها كتير

2 مافيهاش حاجة

3 افهمي يامجنونة

1 ( بصوت خافت مضطرب) كأن انا اللي كنت عاملاه بإيدي

3 لا دا كان وهمك مش حقبقتك

1 إزاي؟ والقمر اللى سافرنا معاه سوا؟

4 سافرتم على فين يا اختي

1 رحنا الجزيرة

4 جزيرة؟

1و2 أيواه جزريتنا

4 اتبطي يا ااختي ما انت هنا أهو .. سافرتم فين؟

1و2 في الخيال

3 الخيال بتاعك مالوش مكان في الواقع

افهمي

(للجمهور)

الرومانسية جميلة صحيح . لكن لازم يكون لهاحدود . احلم انطلاقا من واقع ومن الممكن. غير كدا يبقى جنون أو مرض

2 أو هروب من واقع سيء

3 حتى الهروب من الواقع دا فبيكون للحظات . لحظات ترتاحوا فيها من الضغوط . باختصار بيكون زي احلام اليقظة .. مسموح بيها لحظات .. غير كدا بيكون شيء فظيع .. تنفصل عن الآخرين .. ومهما هربت الواقع هيضربك هيضربك .. فتتجن أو أو تتجن أو تلاقي نفسك في الآخر في الحضيض واللي كان وراك سبقك، لأن انشغالك بحلم اليقظة عماك عن متطلبات الواقع

2 يعني

3 للجمهور .. الحب ممكن يعيش مع التجاهل .. مع شوية غيرة .. مع شوية ظلم .. لكن عمر الحب مايقدر يعيش مع المهانة

2 فين المهانة دي؟

( تكون 1 قد خرجت من الدائرة وتواصل الرقص المترنح في المتاهة)

4 لو ما حستيش بيها فدا عيبك

2 ماكانش في اهانة في كلامه

3 كان في

4 صحيح انه كان قاصدها من وراك

3 لكنك شفتيها

4 هتعملي نفسك عامية

2 ماكانش يقصد أشوف

2,3 لكنك شفت .. واللى شفتيه هو الواقع اللي لازم تتعاملي معاه.. فاهمة؟

3 ( للجمهور) لو قبلت الاهانة مرة , صدقني هتتعود عليها . ولو انت ما اتعودتش اللي هانك قبل كدا هيهينك تاني وتاتلث. بعد ماتكون الحياة ارتبطت بيه. وساعتها يا تكسر كل شيء وتبدأ من جديد , ودا صعب

3و4 (ل1) يا إما الأصعب انك تعتادي المهانة , ودا شيء مش هنقبله . وحتى لو قبلناه فانت هتموتي ساعتها قدامنا بالبطيئ

1 ( تخرج من حالتها في شبه اندفاع نحوهن) انتم مالكم بي؟ ليه بتمشوا حياتي زي ما انتم عاوزين .. أنا حرة .. أعمل اللي اعمله .. أحب اللي أحبه .. أقبل الإهانة .. أقبل الظلم .. أقبل التلاشي .. أنتم مالكم؟

4 إحنا مالنا؟

1 أيوا أنتوا مالكم .. ابعدوا عني شوية خلوني أتنفس

2 صدقيني مش هنقدر

3 ( مقاطعة) ههههههه أنت ذكية جدا. .. حولت الكلام الأساسي .. كنا عاوزين نخلص منك دلوقت انت اللي بتطلبي دا .. عاوزاه يبقى قرارك يعني ؟؟ ولا يهمك نخليه قرارنا المشترك .. تعالوا نشوف أزاي احنا نخلص منها وبسلامتها تخلص مننا

2 يا جماعة ماكانش قصدها .. دي كانت شوية نرفزة بس

3 كل واحدة تتحمل تصرفاتها .., وتوفي بالكلمة اللي قالتها

2 حتى لو كان في لحظة انفعال؟

4 ياما لحظات الانفعال دي والتعامل معاها هي اللي بتحدد مصير البشر ... زي ما البنت دي ما قالت ( تشير ل 3)

1 ( تتجه للأعلى في لحظات تفكير . وحركات كأنها تدافع عن نفسها ضد شيء ما )

مش محتاجة حاجة منكم اللي تقدر فيكم تعيش من غيري تعيش, مش هامنع حد

3 وانت عارفة كويس ان دا مش ممكن يحصل من غير ما تغيري انت من نفسك أولا

1 أتغير إزاي؟

3 تسيبك من الخيال شوية

2 تسيبك من رغباتك ىالقديمة اللي بتزرعيها فينا ومش ممكن نحقهها

1 مادام مش عاوزينها خلاص

3 المصيبة إننا زيك هنموت ونعملها .. انت زرعتيها فينا .. بس دلوقت مانقدرش نعملها مانقدرش

4 مش ذنبنا أن أهلك زمان ماكانوش يقدروا يجيبوا لك بالونات في العيد

3 يعني انا دلوقت مش ممكن بمكانتي انزل اشتري بالونات وامشي بيها في الشارع من الأساس

2 أنا أقدر اشتريها واشتريتها كم مرة . لكن ما اقدرتش اتنطط بيها زي ما انت عاوزة

4 بالونات؟؟ عاوزة تضيعي هيبتي بين البشر يا دلعدي

2و3و4 مع اني هاموت والعب بيها

1 آخدها في حضني

2 وأطيرهم لفوق

3 شوفي ألوانهم مبهجة ومتناسقة أزاي؟.

4 عشان الحاجة البسيطة دي ذالانا في عيشتنا

2 لازم نعمل حاجات غيرنا ماعادش بيعملها

3 بيقولوا علينا أغبياء وغير مدركين للفرص

4 المجنونة دي فعلا قارفاني في عيشتي

2و3و4 أطلعي مني ونسيني كل اللي اخذته منك

1 اطلعي وانسي ( لحظة صمت وحيرة)

3 برضه بتاخدونا في حاجات فرعية مش هي الأساس

1 الأساس هو الرضا ...

3 وال

1 (مقاطغة) والرضا مابيتعارضش مع الطموح .. ولا الأحلام

و4 إزاي يعني؟ لو رضينا كفاية لا هيكون في طموح ولا أحلام

3 (ل4) استنى انت مش فاهمة . (ل1) انت بتقولي ايه؟

1 باقول ان الرضا لا يتعارض مع الطموح ولا الأحلام

3 لا. الجملة اللي قبلها

1 الأساس هو الرضا

2و4 (ل3) في إيه يا ام العريف؟

1 هي بتدينا طريقة للتخلص منها

2ة4 أزاي؟

3 مش هي قارفانا دايما بأمنياتها وأحلامها اللي ماقدرتش تحققها زمان وبتدفعنا إحنا لتحقيقها . وساعات بيكون بالرغم منا. وساعات أكتر بيكون ضد الاتجاه الطبيعي للمسار اللي اخترناه في حياتنا؟

4 مع اني مش فاهمة .. لكن ماشي

3 خلاص لو حصل رضا بالحال اللي إحنا فيها .. وخصوصا هي لو رضت بالحالة اللي هي فيها فدا معناه أننا مش مجبرين على تحقيق حلم فات ميعاده أو حلم بعيد.. صح؟

2 أكبر صح

1 خلاص .. ما تعملوش حاجة انا عاوزاها .. اعملي اللي انتم شايفينه صح

4 ( مقاطعة) ايوا نعمل اللي عاوزينه وما لكيش دعوة ساعتها ان كنا شايفينه صح أو غلط

1 معنى كدا انكم ممكن تعملوا شيء وانتم عارفين انه غلط؟

2و3 نفسنا والله.. لكن مش هي المشكلة

4و1 وإيه يه المشكلة؟

3 المشكلة في تعريف الصح والغلط نفسه

4 مش فاهمة

2 يعني الصح بيكون صح بالنسبة لمين؟

3 والغلط بيكون غلط بالنسبة لمين؟

1 الصح اللي انت جواك عارفة ومتأكدة أنه صح والعكس صحيح

2 المشكلة ان انا ساعات كتير باعمل اللي شايفاه صح لكن الناس بتقول غلط

3 وساعات كتير أحجم عن فعل شيء بدعوى انه غلط . والناس تقول لي لو كنت عملتيه .. كنت عملت الصح

4 الناس... الناس .... وأنا مالي بالناس؟ انا أعمل اللي شايفاه وخلاص. صح أو غلط .. ماحدش له دعوة مادام ماباخدش حق حد

2 ولا أظلم حد

3 ولا أجامل حد

2 لكن بيفضل السؤال الملح

3 معقولة انا صح ومعظم الناس غلط؟

4 وفيهم اللي أكبر مني واللي يعرف عني

1 اعملوا اللي ترتاحو له .. اللي تعرفوا انه صح اعملوه

3 مافيش حد في الدنيا بيحتكر الصواب

2 ومافيش حد في الدنيا بيحتكر الخطأ

4 والمشكلة هنا .. ساعات كتير بيكون الكلام الصح مقدمة لشيء غلط

1 إزاي

3 انت اللي بتقولي ازاي؟

2 نسيت دروسك القديمة

3 الشيطان نفسه ساعات بيقول أو بيعمل الصح

2و3و4 لكن لازم نسأل نفسنا .. دا هيودي فين؟ آآآآآآآآآآآآآآآآه دماغي

( هذه الأثناء تكون 1 دخلت في المتاهة وتقوم بحركاتها) وهن كل واحدة فيهن تتمايل ولا تستطيع ان تقف على قدميها . وفي حركة لا إرادية ..هكذا تبدو.. يعدن جميعا للالتصاق بظهور بعضهن البعض ،فيقفن)

3 أنا مش فاضية لكم .. مش هنقعد نتكلم كتير

2 ما احنا خلاص وصلنا كل واحدة تعمل اللي عاوزاه ، واللي شايفاه صح

4 تاني؟؟ أم الصح بتاعكم دا... انا عن نفسي هاعمل اللي عاوزاه وخلاص

3 يالا ياست اعملي اللي انت عاوزاه ، وأنت ( تنظر ل (2و تنظر لساعتها) أول ماجيت هنا وجعت دماغنا بالواد اللي طب خلاص.. ميعادك معاه قرب.. روحي له

2 طبعا هاروح له .. بعد إذنكم( تتجه في طريقها للخارج ولكنها تقف شبه حائرة ( 1 في هذه الأثناء في منطقة أعلى ... كمن تبني شيئا ما من المكعبات التي يلعب بها الأطفال .. أو ترسم شيئا في الفضاء .. الخ)

3 خير؟ نسيت حاجة

4 ما تيلا .. هتتأخري

2 بصراحة؟

1 ( وهي في مكانها) طبعا بصراحة

2 يعني مش عاوزة أسيبكم

1 مش قلنا بصراحة؟

4 وهيحصل لنا ايه لما تسيبينا .. كل واحدة مننا هتشوف حالها وهي تفضل مع اللي بتعمله

2 يعني قلت اشوفكم هتعملوا ايه الأول .. وبعدين أروح

1 قلنا بصراحة

2 انت هتعرفي أسبابي أكتر مني

1 ( تترك ما تصنعه وتنزل اليها)

1ز3 للأسف آه .. عارفين أسبابك لكن مش أكتر منك

3 ويلا خلي عندك شجاعة وقولي السبب الحقيقي

2 يووووووووووووه انتم هتوحعوا دماغي ليه؟ خلاص غيرت رأيي ومش هاروح

4 ومش عيب انك تدي ميعاد وماتوفيش بيه

2 يعني؟

3 يعني مادام وعدت لازم توفي.. الصح كدا

4 لكن

1و4و3 لكن إيه؟

4 الواد مز وكل البنات هتموت عليه

3 وزي ما بتقولي .. بترتاحي كثير وانت معاه وساعات بتنسينا خالص

2 أيوه لكن....

4 لكن إيه؟

2 ( تشير ل 1) مش عاوزة تطلع مني

1 لا أنا طلعت ( ترفع ذراعيها وترفرف بهما مثل الجناح .. وتعود للأعلى وهي تؤدي حركات رشيقة فيها ثقة وسمو)

4 هو في إيه؟ ( تحاول أن تقلد 1 وتأخذ متجها نحو أعلى المسرح)

3 مش عاوزة تروحي عشان البيه متجوز.. صح

2 المسألة مش كدا

1و4و3 ( كل في مكانه) طيب إيه؟

2 يعني غيرت رأيي وخلاص

4 وتغيير الراي صح والا علط؟

2 ( ثائرة) انتم لسه قايلين ان الشيطان نفسه ساعات بيقول ويعمل حاجات صح

4 وانت خايفة لو عملت الصح ورحت في ميعادك انك تعملي الغلط؟

2 أبدا الموضوع مش كدا

3و1 ( كلامهما بنبرة مختلفة عن الأخرى) الموضوع... ان الموضوع من أساسه غلط

2 ليه غلط؟

4 شوقي البجحة... ادخلي في عبي يابنت على ماما؟

3 معناه ايه انك تروحي تقابلي واحد مرتبط؟

1 خيانة

2 خيانة أيه ولمين؟

4و3 خيانة المرتبط بيها

2 أنا ماعرفهاش

1و3و4 ودا سبب الإباحة؟

2 يا جماعة هو مش مرتاح معاها

3 ماسابهاش ليه قبل ما تعرفيه

4 وياترى قال الكلام دا لكام واحدة غيرك؟

2 انتم مش عارفين حاجة خالص

1و3و4 عرفينا

2 ماجربتوش احساس ان حد محتاج لكم ومش لاقي غيركم يكلمه

4 ( تضحك ضحكة مبالغ فيها)

1و3 أهه ردت عليك

2 انتم بتضحكوا على احساسي وشعوري

3و4 لا بنضحك على هبلك

4 أوعي يابنت تكوني مفكرة اننا ممكن ناكل م الكلام دا

3 بصي لنفسك كويس وقولي الحقيقة

2 وإيه هي الحقيقة

3 الحقيقة انك بتاخدي منظر بيه . بتثبتي أنك مرغوبة من الكل

4 كبار .ز صغيرين . مرتبطين سناجل .. كله يعني

2 لا أنا مش كدا

1 ( بصوت خافت وهي في طريقها للمتاهة ) أمال إيه

1,2 ( كلا منهما له طريقته في الأداء) بادور على أي حاجة تشغل فراغي وخلاص .. باقتل احساس الوحدة اللي بحاول اهرب منه بالحاجات دي .. حتى الهرب بالطريقة دي ماينقعش

4 ليه ماينفعش

2,1 ما اقبلش ان حد يخونني

4 وهو مش بيخونك انت

2و1 باتخيل نفسي مكانها . ولو قبلت دا لغيري ازاي ارفضه لنفسي؟

3 اللي قارقني منك أنك ساعات بتكوني عنصر مساعد للخيانة . لكن دا قليل قوي .. لكن الللي قارفني اكتر عارفة ايه؟

1و2 إيه؟

3 إنك ما تخيلتيش للحظة ان يكون بيعمل زي ما انت بتعملي بالضبط . يعني لو كنت بتتسلي . فهو كمان بينسلى . بتقتلي الفراغ .. هو كذلك .. بتاخدي منظر بيه ؟ ايه يمنع يكون هو اللي بياخد المنظر بصورة أكبر .. خصوصا ان

2 خصوصا أيه

3 ولا حاجة

2 الحقيقة ان كل كلامكم تقريبا غلط .. ماقربش من الحقيقة .. هو محتاجني .. وانا ما انكرش ساعات بحس اني محتاجه له .. وأن الأمر عادي لافيه خيانة ولا أي شيء يشين

4و3 ( يضحكن)

1 ( تزداد حركتها الدالة على التوهان في المتاهة)

2 بتضحكوا ؟؟ طيب انا هاثبت لكم دا

4 إزاي؟

2 هاخد نفسي واروح له حالا

3 اتفضلي

4 لو قدرت جايز احنا كمان نقدر

2 أيوه رايحة له سلام ((( تمشي ولكنها تتكاسل) وفجأة تنهار مش قادرة مش قادرة ... ( تبكي... 1 تنصلح خطواتها وترتفع الموسيقي في سمو وتحاول ان تشاركها 3)

3 أخيرا رجعت لكلام العقل

2 ( تقوم من انهيارها) لا عقل ولا غيره

1 طيب إيه؟

2 ( تندفع نحو 1) عشانك انت

4 وهي مالها؟

2 لازقة لي دايما... كل ما أكون معاه الاقيها قاعدة جنبنا.. جنبنا إيه لآ .. في وسطنا .. قاعدة في وسطنا . والنتيجة يابقعد ساكتة يابتخانق معاها ويفكرني اتجنيت .. يا اتخانق معاه.. حلي عني بقى .. ارحميني .. انت مالكيش شغلة غيري؟ روحي شوفي نفسك يالا

(1 تتلقي الكلمات في صدمة وعلى إيقاع موسيقى خافتة تقوم بحركات اشبه محاولة الوقوف ضد الأمواج بشكل بطيء)

4 واضح ان القعدة باظت.. يالا كل واحدة تشوف وراها إيه

3 أنا ورايا مواعيد مهمة

4 وأنا كمان يالا بينا ( تقوم بجذب 2 التي مازالت في محاولة مع نفسها للانقضاض على 1؛ التي تتركهن وترجع مكانها الأولى وتقوم بحركاتها ،، يسرن خطوة أو خطوتين على المستوى الأدني ثم إظلام عليهن و1 مازالت في حركاتها . تخفت الإضاءة تدريجيا على 1 وتتوقف الموسيقى لحظات . ثم انبعاث موسيقى يغلب عليها الشعور بالحزن ولو كانت بعض التنويعات من الصوت البشري ؛ ربما يكون أفضل؛ يتزامن مع الموسيقى بزوغ الضوء رويدا رويدا على 2و3و4 ثم انبعاث 1 من الوضع نائمة أو جالسة لتتراقص بما يعبر عن حالة الموسيقى).

4 شكلكم يقرف والله

2و3 ( ينظران إليها بلا تعقيب)

4 ما تبصوش كدا.. قولوا اللي في نفسكم

3 هو إحنا مانعرفش نتجمع من غير خناق؟

2 ماكل واحدة تقعد في حالها وتكفي غيرها شرها

3 واضح إننا مانعرفش نعمل دا

4 ما تيجوا نجرب

2و3 يالا

( فترة صمت لثوان منهن فيها تخفت عليهن الإضاءة وتتركز على 1 التي تمارس حركاتها الواهنة)

2و3و4 لكن أنا عاوزة أعرف ( تنظرن لبعضهن في دهشة ثم ضحكة عالية)

3 مش قلت لكم مش هنعرف

2و4 واضح

3 من يوم ما البنت دي ( تشير 1) بطلت تبص لقدام وإحنا حالتنا كلها اتغيرت تقريبا

4 قصدك إيه؟

3 ولاحاجة (ل1) انت ياست انت ماتعبرينا

1 بتكلميني؟

3 ومين غيرك؟

1 عندك اتنين تانيين

2 لا.. بتكلمك انت

1 أأمروا( تتوقف عن حركاتها وتنزل إليهن في نفس الوقت تتحرك 3 لتأخذ مكان 1 السابق)

3 حالك اتغير ليه؟

1 أنا ؟ ما أعتقدش

3 لا .. اعتقدي يا أختي .. حركتك أصبحت بطيئة وبقيت بتبصي لفوق دايما

1 الوقت بيمر

2 بتقول إيه دي؟

3 ماتقاطعيهاش.. خليها تتكلم ( ل 1) الوقت بيمر؟؟ياسلام

1 أو تقريبا مر خلاص

4 رجعنا للألغاز؟

3 عاوزين نعرف في إيه. حالتك اللي بتأثر علي . والا أنا اللي بأثر على حالتك؟؟ ليه دا الوقت حركتك بقت لتحت مع أن راسك بتبص لفوق؟ ليه إيقاعك اتغير؟

1 جايز عشان تقريبا اتأكدت

4 اتأكدت من إيه؟

1 إنكم مش هتقدروا تجيبوا البالونات ... خلاص الفرصة مرت

2و4 البالونات البالونات .. قرفتينا بالبالونات دي

3 إن كان ع البالونات خلاص هاخرج أجيبها لك وأرجع

1 خلاص ماعادش ينفع

3 ما ينفعش ليه؟

1 خلاص ماعادش في عيد جاي

2 انت خلاص

4 العيد بعد أسبوع

1 مافيش عيد خلاص

2 يخرب بيت كدا.. أنا خلاص ماعدتش مستحملة الهبل دا .. فوقي من أوهامك وشوفي الحقيقة .. كبرنا خلاص .. كبرنا خالص .. تعرفي إيع الكلمة الوحيدة الصح اللي انت قلتيها؟ إن الوقت عدا خلاص.. صح؟ وبما ان الوقت عدا؛ فارحمينا بقى ارحمينا

1 أنا عملت لكم إيه؟ قبل كدا اتجمعتم وطلبتوا مني أسيبكم في حالكم .. ومن يومها وأنا باعمل دا أو بحاول أعمل دا .. صح؟

2 لازم أعترف إنك فعلا بتعملي دا .. لكن الحالة ما بتتصلحش .. للأسف بتسوء

1 ليه؟

4 مش عارفة .. من مدة وأنا حاسة ان خلاص ماعادش لي رغبة في المواجهة .والمصيبة أن انا في أوقات باحس اني فقدت القدرة أساسا على كدا

2 وأنا.. أنا كمان معادش لي نفس اروح وآجي وأتنطط وأكلم دا وأشاغل دا .. باقيت بازهد في الحاجات دي ... وباكتفي بالقدرة على التذكر.. أيوه باتذكر اللي فات وأعيشه في أحلام يقظة لسرقة لحظات مستعادة .. وساعات باعيد ترتيب اللحظات بحيث انها تتوافق مع اللي كنت عاوزاه أو عاوزاه دا الوقت . باختصار بقيت باعيش في أحلام القظة أو بتعبير أدق .. باقيت باعيش في الوهم .. وبخاف أخرج أشوف شيء جديد

3 وأنا بيمكلني احساس فظيع باللاجدوي.. فقدت الأمل انه يحصل أي تغير سواء على المستوى العام أو الخاص ... الأشكال اللي بتبرق بس بقت هي الأساس مهما كانت مزيفة .. وأنا مش واخدة ع الزيف . ولما بحاول إني بأتقلم معاه بافشل بسرعة وبيبقى منظر مش كويس لا قدام نفسي ولا الآخرين

1 يعني أعمل لكم إيه؟ أو إيه أقدر أعمله؟

3 بصراحة؟

1 أيوه بصراحة

3 عاوزينك تفضلي معانا زي الأول

1 ( يبدو عليها علامات الإندهاش)

2 بصراحة آه

1 ( تزداد حيرتها)

4 وأنا معاهم

1 ( تمر من بينهم)

2و3و4 لو عاوزانا نتأسف لك خلاص آسفين

1 انتم عارفين ان انا مش ممكن أزعل منكم

2 يعني خلاص هتفضلي معانا وهتقرفينا في عيستنا الأول عشان نحس إننا عايشين

3 ونخرج من حالة التوهة واللا جدوى دي

1 الحقيقة ان الوقت فات.. خلاص

2 إزاي؟

1 دي الحقيقة

4 بس كدا

1 (مقاطعة) أقول لكم؟ حاولوا انتم الثلاثة تكونوا مع بعض دايما.. مافيش واحدة فيكم تنفصل عن التانية .. صدقوني بتكونوا سعدا جدا لما تكونوا مع بعض

2 أيوا لما باكون معاكم باتباهي بيك (ل 3) وآخد أماني منك ل(4)

3 وأنا لما باكون معاكم بافرح قوي بيك ل(2) وزيها باحس بالأمان معاك ل (4)

4 وانا مابخافش من أي مصيبة باعملها وانا معاك ل(3) اعتمد على تقدير الناس لك وعلى عقلك اللي يقدر يتصرف بسرعة ويخرجني منها. وكمان ل (2) كنت انت بتخففي من الوضع بضحكك وقبولك من الناس

1 يبقى خلاص .. خليكم مع بعض

3 ما إحنا أهو مع بعض ومش حاسة غير بالإحباط واليأس تقريبا ... كل الحاجات الحلوة اللي اتكلمنا عنها دي ما بتكونش غير وأنت مع معانا .. في دماغنا وعقلنا على الأقل.. وانت دا الوقت لا بتبقي معانا ولا بتنطي لنا في أي حالة زي الأول

1 ( تعود لمكانها في الأعلى) ما اعتقدش انكم محتاجين لي دا الوقت.. لما كنت محتاجة لكم وأنتم لما كنتم محتاجيني كنتم بتاخدوا موقف مني وبتحاولوا تنسوني خالص آآآ لا وساعات كنتم بتطردوني من معاكم

2و3و4 آسفين معادش هيحصل تاني

1 خلاص الوقت فات لا أنا هاقدر ولا انتم هتقدروا( تعود 1 لحركاتها الحزينة المنكسرة)

4 انت هتذلينا؟ أيوا مش عاوزينك وهنقدر نتصرف من غيرك

3 ما اعتقدش

2 نحاول ونسيبنا منها .. يالا بينا ( تمسك يد 3و4 وتحاول أن تخطو بهما للأمام في هذه الأثناء يعلو صوت الموسيقى وتشرع 1 وجهها للأعلى حيث تقوم بحركة وثوب للأعلى تهبط البالونات من السماء . وتتهاوي 2و3 4 5ي أماكنهن)

إظلام

انتهت مجدي الحمزاوي



   نشر في 31 أكتوبر 2018 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !


مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا