كوروموتو.. يا وحشة!! يا بطة!!؟

تأليف/مجدي الحمزاوي

عند تنفيذ هذا النص يجب أن يراعى بصورة تامة تمكن الكواليس ومديري خشبة المسرح . بحيث يدخل الممثلون في أوقاتهم تماما بدون أي فاصل زمني ولو يسير . حيث أن السرعة وتعاقب الأجداث مهمة جدا للوصول للمعنى العام. فلا يمكن للمشاهد أن بطرف بعينه أو ذهنه عما يدور وإلا فاته شيء. حتى لو تمت الاستعانة بمقاطع مصورة مسبقا في بعض المناطق التي من الممكن أن يكون هذا مقبولا فيها . ستكون السرعة والدقة واجبة.

كما أنه أيضا لا داعي لديكور ثقيل ، من الممكن أن يكون هناك تصورا للجو العام للنص مطابقا للرسالة التي سيؤكد عليها المخرج. أما لو حاول أن يؤكد على كل مايعنيه النص . فعليه هنا التعامل مع التصور العام الجامع. ويتم التركيز على بعض الأدوات المستخدمة فقط . بالطبع سيكون هناك مقاعد.

بالطبع سيكون التعامل مع أسلوب الفوتومونتاج وتقسيم المسرح لمناطق تمثيلية تدور فيها الأحداث . ولايسمح أبدا بالإظلام التام . ما ستكون هناك مستويات يتم التمثيل عليها

طفل أو شاب في أعلى منتصف المسرح؛ تبدو عليه البلادة والغلظة وأمامه مجموعة من الكرات الأرضية ( من الممكن أن تصنع من الفوم أو أي مادة مشابهة) يقوم بتكسيرها ومحاولة تجميعها من جديد بما يتراءي له. بحيث يبدو عليه بعض أمارات الغضب حينا؛ والرضا حينا آخر ومن الممكن استبدال الطفل بشخص بالغ أنيق ؛ وهنا لايكون الأمر تحطيم للأشياء بل إعادة بناء ولعب .. كل اختيار له مدلوله . ولو تعثر يمكن الاستغناء عنه( لا يأخذ هذا المشهد أكثر من ثوان؛ وحيدا على المسرح. سيكون على المسرح بشكل دائم . والمخرج سيتعامل مع تسليط الضوء عليه وفقا لرؤيته)

ينير منتصف وسط المسرح؛ لنجد مجموعة مكونة من ثلاثة أفراد منهم رجل كبيروإثنان من الشاب . الرجل جالسا ؛ والشابان واقفان أمامه)

الرجل - واضح إنكم مابتفهموش , وما بتبصوش إلا تحت رجليكم. مين اللي قال لكم تدوا أوامر شرا للبترول؟

شاب1- ياريس سعره نازل جدا. وقلنا نشتري لمدة شهور قدام بالسعر النازل

الرجل – غبي( يلتفت لشاب2) لو سمعتم كلامي وقلتم إن الخزانات عندنا اتملت ومافيش مكان ولو لبرميل واحد؛ إيه اللي هيحصل؟

شاب1 - كارثة. هتحصل كارثة

الرجل - أنا سألتك؟. (ل2) رد

شاب2 - زي ماقال بالظبط .. هتحصل كارثة. السعر هينزل خالص . ولنا شركات بتشتغل ويمكن تفلس

الرجل - شركاتنا مافيش خوف عليها. هنقول إنها خسرت ونهرب شوية من الضرايب ؛ وممكن ناخد معونة حكومية .

شاب1 - أصدقائنا من الدول المنتجة هتزعل . هيخسروا كتير

الرجل - مش أنا قلت ما تتكلمش. ثم الشغل مافيش فيه زعل؛(ل2) وحتى لما يزعلوا يافالح هيحصل إيه؟

شاب2 - في الأول هيكلمونا

الرجل - ولما يكلمونا؟

شاب 1 - هنقول لهم الشغل مافيش فيه زعل

الرجل - مصر انت على درجة الامتياز في الغباء. طبعا مش هنقول لهم كدا هنواسيهم ونقف جنبهم. ونقول ياريت في مكان نخزن فيه كنا اشترينا لكن المخازن مليانة لسنين قدام. لكن عشان إحنا أصدقاء هنعرض عليهم المساعدة ونشتري منهم بسعر أقل من سعر دا الوقت . وكمية كبيرة جدا كمان

شاب 2- يعني هنشتري البترول تقريبا بسعر أرخص من التراب.. ممكن نمضي عقود سنة قدام عشان هم هيحتاجوا فلوس

الرجل - ولما يعلنوا إننا اشترينا لسنة قدام يحصل إيه؟

شاب1 - السعر هيطلع فوق لكن مش قوي

الرجل - وهم ضامنين سعر اللي اشتريناه لسنة صح؟. فلما ننصحهم بتخفيض الإنتاج عشان مصلحتهم؛ يحصل إيه ؟

شاب2- طبعا هيخفضوا

شاب1- والسعر يطلع أكتر ويتضاعف

الرجل - وبكدا؟

شاب-2 بكدا نكون كسبنا أكتر منهم بأضعاف

الرجل - تاني مرة تنفذوا التعليمات بالحرف لغاية ما تتعلموا.. ودي أنا اللي هاقررها. دا الوقت يالا عندنا اجتماع في البيت الكبير( ينهض؛ وإظلام على منطقته. إضاءة على المنطقة العليا؛ إضاءة على أسفل يمين المسرح حيث هناك مذيع يقرأ نشرة الأخبار)

المذيع - هذا وقد حذرت منظمة الصحة العالمية من خطورة الوضع . وطالبت معظم الدول لعدم التعامل مع الأمر كأنه لا يخصهم. أما بالنسبة لمنبع الفيروس فقد امتد لللإغلاق العام؛ وساد الشلل معظم البلاد بعدما أغلقت الحدود والمطارات . والآن مع مراسلنا هناك ( يدخل المراسل وما أن يبدأ في الكلام. خفوت على جانبه وهو يمثل أنه يتكلم؛ وإضاءة على منتصف يسار المسرح حيث الأشخاص الثلاثة السابقين يدخلون على المسئول الذي يهرع لاستقبالهم؛ وخفوت أو إظلام في الأعلى)

المسئول- عالجت المشكلة؟

الرجل - تمام يابوس...

شاب1 - تقارير امتلاء الخزانات طلعت

شاب2 - والسعر نزل والمنتجين كلمونا

المسئول- خلاص فهمت الباقي( للرجل) رأيك إيه في الفيروس اللي طالع دا؟

الرجل - (ما أن يبدأ في الكلام حتى يتجمد المشهد وخفوت على تلك المنطقة . وسطوع في منطقة المذيع حيث المراسل ومعه أحد الضيوف)

الضيف - طبعا هم الغلطانين . ليه ياكلوا خفافيش؟ ياكلوا هامبورجر وبيتزا. إحنا كل يوم بنفتح فرع جديد للبيتزا والهامبورجر. وماحدش يقول لي أن أسعار البيتزا والهامبورجر مرتفع شوية عن دخل العامل العادي.. دا إحنا عاملين لهم اللالي اسألني عملنا لهم إيه.. ما تسألني

المراسل - عملتوا إيه يافندم عشان يكون الهامبورجر والبيتزا في متناول العامل العادي؟

الضيف- دا إحنا عاملين كتير قوي انطلاقا من طيبتنا .. أولا علمنا بيتزا وهامبوجر بالتقسيط . ثم عملنا مشروع كل وادفع بعدين

المراسل- يعني أي واحد لو مامعاهوش فلوس ييجي ياكل ويمشي؟ دا عظيم جدا

الضيف- أيوا هو بس إجراء بسيط لحفظ الحقوق إننا بناخد العجلة بتاعته رهن

المراسل- والنتيجة؟

الضيف- النتيجة مبهرة.. إحنا بعون الله بقينا بنافس أكبر الشركات في تصدير العجل للخارج.. سيبك من الموضوع دا. تعرف إحنا عملنا إيه كمان عشان نخلصهم من عاداتهم الغير متحضرة دي؟

المراسل- أسألك؟

الضيف- من غير ما تسأل. إحنا عملنا مشروع كل ووصل . وإن شئت الدقة هو مشروع وصل وكل

المراسل- ودا عبارة عن إيه؟

الضيف- الجعان من دول ييجي يوصل كام أوردر دليفري.وطبقا لانتاجه وتوصيله بياخد البيتزا والهامبورجر.. وطبعا عاملين احتياطاتنا عشان ماياخدش الأوردر ويخلع(خفوت على المراسل وتجميد المشهد ثم يتحول لإظلام بعد ثانية أو اتنين من السطوع على جانب المسئول وضيوفه)

الرجل - يا افندم اللي بتقوله دا مش ممكن؟ يعني إيه نرجع المصانع بتاعتنا اللي هناك تشتغل هنا؟

المسئول- ماهو الحال واقف هناك أهو

شاب2 - أزمة وهتعدي يا افندم

الرجل - ثم إيه الي خلانا أصلا نودي المصانع هناك.. مش جشع العمال اللي هنا؟ اللي سيادتك عمال تدافع عنهم ليل ونهار

المسئول- انا عارف إنهم يستاهلوا الحرق .. بس لازم نقول كدا عشان الانتخابات أنت عارف.. المهم انا عاوز رأيك نطلع من أزمة الفيروس دي هنا وهناك إزاي؟

الرجل - لو كان حد من الأغبيا دول هو اللي سأل السؤال دا كنت عذرته.. لكن مايصحش السؤال دا يطلع منك

المسئول- ليه؟

الرجل - عشان السؤال الصح هو نستفيد من الأزمة دي إزاي؟ صحيح هي هتساعدك في الحرب التجارية معاهم.. خصوصا ان بعدما الانتاج تقريبا وقف هناك

المسئول- لكن الفيروس اتحرك وصل إيران وبعدها أوربا وعندنا حالات ظهرت. وحالات أكتر هتظهر خصوصا من الناس اللي راجعين من هناك .. أنا باقول ناخد إجراء احتياطي اليومين

الرجل - إجراء إيه وإحنا داخلين على موسم الأعياد .. وأنت عارف الننوس بتاعنا بيحب يعمل إيه في الأعياد دي( سطوع على المنطقة العليا)

المسئول - ياسيدي يمارس هوايته في أي وقت وأي مكان حد هيمنعه؟

الرجل - لا أنت عارف هو قبل الأعياد بيومين تلاتة وبعدها بيومين؛ بيحب يطلع يصطاد بني آدمين

المسئول- هو حد منعه؟ ماكفاية بنغطي عليه .. وبنخلي المسئولية على اللي اصطادهم

الرجل - يعني أبلغه بكلامك؟

المسئول- (صامتا حائرا)

الرجل - ثم انت نسيت شيء مهم

المسئول- إيه اللي نسيته.

الرجل - نسيت الآيس كريم والمشروبات بتاعة الأعياد؟ انت عارف إحنا عاملين حسابنا وأنتجنا. انت عارف ممكن تخسر كام لو مشيت ورا دماغك؟

( يدخل أحدهم)

المساعد- ميعاد المؤتمر الصحفي سعادتك(للمسئول . من الممكن مناداة المسئول ب "ابو حنان" أو الإبقاء عليه كما هو )

الرجل - أسيبك للمؤتمر بتاعك. وزي ما اتفقنا

ابو حنان- ما تحضر معايا

الرجل - لا؛ ورايا شغل ؛ وكمان مابحبش الناس دول .

أبو حنان- خليك على اتصال( ينصرف الرجل ؛ ويقوم ابو حنان ويتوجه لمنتصف المسرح؛ وفي لحظات تحركه يدخل مجموعة من المعاونين من الجانبين وينضمان إليه؛ بحيث يقفون في مواجهة الجمهور)

أبو حنان- طبعا انا عامل المؤتمر دا. عشان اقول لكم إننا في التمام( ينظر فجأة للمساعد) فين البتاعة الي باسند إيدي عليها؟ مش عارف آخد راحتي والا اتمنظر ع الخلق دول. مايصحش كدا

المساعد- حاضر يا افندم ( لأحد المعاونين) إيدك معايا ياحضرة( يجذبه ويتحركان للكالوس ثم يدخلان ومعهما منصة صغيرة مرسوم عليها بشكل لايبين الشخصية صورة أحد أفلام الويسترن أو رامبو أو البورنو. ويضعانها أمام ابو حنان الذي يربت عليها ثم يتكيء)

أبو حنان- إحنا جامدين ومستعدين . ومافيش داعي للقلق.. ولو جد شيء هنتخذ الاجراءات المناسبة والفعالة . ثم ماتنسوش إن بسكوت ابو جني ثبت إنه بيقوي المناعة. ( خفوت على المنطقة ؛ وإضاءة على يمين المسرح حيث هناك مذيعة )

المذيعة- وهناك ارتفاع في عدد الإصابات التي تعدت الدولة المنشأ . كما أن عدم وضوه الرؤية وإدراك درجة الخطورة . جعلت معظم الدول في أول الأمر تتغاضى عن الكثير من الإجراءات .. بما ادى لزيادة درجات الإصابة وبالتالي ارتفاع معدلات الوفاة ( خفوت مع سطوع لركن الشخص الأعلى ؛ وهو يقوم بتجميع بعض الأشياء التي أمامه ؛ خفوت على الرجل وسطوع لمنطقة المنتصف حيث الرجل المسيطر. هو وواحد من معاونيه)

شاب2- الوبا انتشر .. واتقفلت المصانع والشركات بره. وضروري هنا كمان هيحصل

الرجل - وبعدين؟

شاب 2 - وفي كمية وفيات زادت كمان

الرجل - وبعدين؟

شاب 2 - كدا في احتمال خساير كبيرة بالنسبة لنا

الرجل - خساير كبيرة بالنسبة لنا؟ مش قلت لك انت غبي؟ يابني إحنا في كل الأحوال بنكسب ( يدحل اب 1 مهرولا وتبدو عليه إمارات القلق والتردد)

شاب1 - مساء الخير

الرجل - متأخر ليه

شاب1 - ( مترددا)

الرجل - انطق بسرعة . اتأخرت ليه

شاب1 - أصل في غلطة كبيرة حصلت في شركات الخشب : وكنت بتأكد منها

الرجل وشاب2 – إيه اللي حصل؟

شاب1 - (ل 2) وانت مالك أنت؟

الرجل - مش فاضي للعب العيال بتاعكم.. إيه اللي حصل؟

شاب1 - إحنا من فترة كنا اعتمدنا على الكمبيوتر في عملية تقطيع الأخشاب؛ عشان نوفر في العمالة

الرجل - وبعدين؟

شاب1 - كان المفروض الخشب يتقطع عشان طلبية مكاتب كبيرة بمقاسات محددة

شاب2 - هات من الآخر

شاب1 - ( ينظر إليه ويكاد أن يفتك به ؛ فيميل الآخر عنه)

الرجل - ما قالك هات من الآخر... يالا

شاب1 - حصلت غلطة وكل الخشب اللي عندنا اتقطع بمقاسات مش مظبوطة

الرجل - انت بتقول إيه؟

شاب1 والله دا اللي حصل .. وعملت تحقيق عشان نعرف هو عيب في البرمجة . والا عيب في الكمبيوتر

شاب 2 - كل الخشب؟

شاب 1 - ( ينظر إليه ؛ولا يرد)

الرجل - التحقيق ماشي . لكن مش معقول ان القطعيات ماتنفعش نعمل بيها حاجة؟

شاب1 - هو ممكن حسب مقاساتها دا الوقت نعمل منها توابيت

( خفوت ليهم ؛ سطوع على الشخص من أعلى وهو يجري اتصالات ويقوم بترتيب بعض الأشياء أمامه )

الرجل - يعني دا الوقت قدامنا إغلاق جاي .. وكمان منع تنقل مممممممممم (ل1) عاوز حصر باللي ماتوا سنة 45

شاب2 - ليه؟؟ إحنا في أزمة وحضرتك تطلب الطلب دا ليه؟

الرجل - انت طبعا عارف نفسك

شاب2 - ( وقد استعاد توازنه) ايوا يافندم

الرجل - عارف نفسك إنك إيه؟

شاب 2 - غبي ياافندم

الرجل - بتقول إيه؟

شاب2 - أنا غبي

شاب1 - قولها بصوت عالي

شاب 2 - أنا غبي ( يفطن للأمر فيتجه ل 1 الذي يروغ منه وهو يضحك)

الرجل - بعدما تحصر الوفيات دي وتجيب كشوف بأساميها .. عينهم في وظايف من الأجر لمتوسط في شركاتنا. سواء هنا أو برة.. وزعوهم على الشركات.. فاهمين؟

شاب1؛2- ( مدهوشين)

الرجل - ( وهو يتجه للخروج) نفذوا وبس ياغبي منك له

( شاب 2 تنفرج أساريره ويشير ل 1 على انه لحق به في الغباء.

خفوت؛ ثم الإضاءة على أبو حنان في منطقته وهو يراجع بعض الأوراق ؛ ويدخل الرجل عليه . فيهب ابو حنان واقفا مرحبا به)

أبو حنان - مافيش مفر... الفيروس انتشر .. والإصابات ضربت المدن . والوفيات زادت... هاضطر إعمل إغلاق وحظر تنقل ؛ وبقية الاجراءات اللي انتم عارفينها دي

الرجل - طبعا .. دا واجبك

أبو حنان - بس دي هتبقى كارثة

الرجل - لا كارثة ولاحاجة.. يومين ويعدوا

أبو حنان - ف اليومين دول تكون شركات الطيران والسياحة والمطاعم وشركات كتير أعلنت إفلاسها

الرجل - عادي

ابو حنان - يعني انتم مش هاممكم الخسارة دي؟

الرجل - إزاي؟ تهمنا طبعا... الشركات اللي هتفلس وتلزمنا؛هنشتريها بسعر أرخص، واللي مايلزمناش.. يخرج من السوق ويسيبه للي يقدروا عليه. فهمت؟ وطبعا لازم تاخد إجراءات عشان تخفيف الأزمة اللي هتطول الشركات . والعمالة اللي هتتسرح

ابو حنان - دا انا عامل شوية أجراءت عسل ( يدخل المساعد)

المساعد - ميعاد المؤتمر الصحفي اليومي سعادتك

أبو حنان - ( للرجل) ماتيجي معايا

الرجل - لا روح انت شوف شغلك. وماتنساش

أبو حنان - طيب... خلينا على اتصال

( يتجه أبو حنان لمكان المؤتمر الصحفي. ويشرع الرجل في الخروج)

أبو حنان - أهلا بيكم في المؤتمر اليومي.. الوضع بقى صعب. الفيروس انتشر. والناس مابتسمعش الكلام.( للكواليس) دا الوقت أنا هاركن إيدي إزاي وأبص للكاميرا زي ماعلموني؟

صوت المساعد - _ آسفين يا افندم( يدخل من الكواليس وهو يحمل المنصة سواء بمساعدة آخر أوو بمفرده)

أبو حنان - البتاعة دي ما تتشالش من هنا

المساعد - أوامرك ( يهم بالخروج)

ابو حنان - لا خليك هنا ( للجمهور) . انطلاقا من مسئولياتنا ... هنضخ شوية فلوس كتير عشان وقف الحال اللي صاب البلد . وهنساعد الشركات اللي اتوقفت عن الشغل. وهنشوف دوا قريب ... بنعمل خطة مدروسة هنوافيكم بها على وجه السرعة . أعتقد مافيش داعي للأسئلة دا الوقت... كل شيء في وقته .. سلام.. ( يتجه للخروج ويعود) وقبل ما تمشوا ماتنسوش؛ إن لبوس أبو جنا الجديد بيخلي الجسم حديد ( أظلام وهو في طريقه للخروج وإضاءة على المنتصف حيث الرجل ومعاونيه)

الرجل - خلاص كتبتوا أسماء أموات 45 في كشوف الموظفين؟

شاب1 - حصل يا افندم.. لكن

الرجل - مش لازم تفهم دا الوقت. وخليتوا مصانع الخشب تنتج التوابيت؟

شاب2 - تمام يا افندم.. لكن..

الرجل - وانت كمان مش لازم تفهم... يمسك هاتفه ويتصل ( في التليفون) تمام يالا ابتدوا( خفوت أو إظلام على منطقة المنتصف وتتوالي الإضاءات تباعا في أركان المسرح المختلفة بصورة سريعة مع دخول كل إعلان من مناطق مختلفة بما يوحي بتعدد القنوات ؛ ويراعى الأكسسوار والديكور المناسب لكل إعلان)

موديل 1- ( وهي بجوار تابوت وردي المظهر) تابوت السعادة يا أحسن تابوت

أنا لما شفتك وبإيدي لمستك عرفت نعومتك . وسحرك وقيمتك .. ودا الوقت والله بافكر اموت.

مذيع 5 - الجماعة إياهم اللي طالعين يقولوا . إنهم هيقوموا بحرق جثث المتوفين بسبب الوباء.. أحب اقول لكم دا شيء خطير.. لأن دا هيساعد على نقل الفيروس في الجو. ولو احتفظت بالرماد في البيت؟ فدا معناه إنك مربي الوبا في البيت. ولو حاولت تنشر الرماد زي مابتعملوا في الجو أو ع الأرض او في البحر. فدا معناه إنك بتنشر الوباء. احمي نفسك. واحمي أهلك . واحمي وطنك. واشتري تابوت الهنا (إظلام وإضاءة على منطقة أخرى)

2 من الموديلات- إحنا جايبين لك تابوت النعيم ؛ واسع مرحرح ومليان نسيم. احجز تابوتك واوعي يفوتك تقابل عظمته من غير نعيم

( إظلام وإضاءة على منطقة أخرى ؛ حيث يبدو مذيع وأمامه ضيف يبدو عليه ان رجل دين)

المذيع - لكن تقول إيه حضرتك في الناس اللي بتحاول تزرع اليأس في الشعب. وبدل ماتقرب لهم الشفا. وتزرع الأمل .. لا على العكس بيهيئوا الناس للموت!!

الضيف - اعترض وبشدة على مفهوم كلامك

المذيع - في إيه بس يا افندم؟

الضيف - أولا الموت حق ... وأولا برضه زي ما البنى آدم بيحاول انه يعمل كل طاقته عشان يعيش كويس.. لازم يبذل مجهود أكبر . أو على الأقل نفس المجهود؛ إنه يموت كويس. يعني لازم تعمل للموت زي ما بتعمل للحياة دا واجب

المذيع - لكن حضرتك...

الضيف - ( مقاطعا) أوعى تقاطعني ... أخلص كلامي ورد براحتك. الواحد محتاج من الدنيا إيه غير الستر؟؟والمفهوم غلط ان الستر إنك تعيش مستور ...لا الستر الأعظم إنك تموت مستور ... تموت على حسابك مش صدقة ,.. يعني مش تموت وانت مش عارف مين هيتحمل تكاليف موتك؟ وخصوصا الستر الأكبر في الموت . وهو التابوت

المذيع - يعني حضرتك مع إن فكرة إن كل بنى آدم يشتري تابوته من دا الوقت؟

الضيف - أنا عن نفسي شاري اتنين. واحد ناصبه في أوضة النوم عشان يفكرني بالحقيقة

المذيع - والتاني ليه؟

الضيف - هاقول لك.. أنا شاري التاني ياسيدي عشان لما حد من جيراني اللي أفكارهم مشوشة زيك يموت. وأسرته تدور على تابوت وماتلاقيش .. ساعتها أعمل خير ومش هانتهز فرصة احتياجهم وأعلى السعر!! أبدا ... هي بس مصاريف النقل والتخزين والاعتناء ... ( خفوت الصوت والإضاءة على المكان _ وإضاءة مقدمة المسرح حيث يدخل المساعد بالمنصةووراءه أبو حنان وعدد من الأشخاص)

أبو حنان - الوضع مش طبيعي. ولا دا فيروس طبيعي.. والبعدا خبوا علينا الحقيقة . لكن إحنا مش هنسكت.. ( صمت لثانيتين) حلو السؤال دا؛ هنعمل إيه دا الوقت في وقف الحال الدكر اللي إحنا فيه دا ... والوفيات اللي عمالة تزيد؟.. أولا هنحاول نساعد الشركات اللي اتضررت . ونخليها ماتسرحش العمال والموظفين... إحنا هنتحمل جزء كبير من مرتباتهم...هنوزع الأغذية والأدوية ع اللي مش قادر ... وهنتحمل تكاليف انتاج المزيد من الأجهزة الطبية اللي بتساعد في الحالات الحرجة .. وعارف إن تكاليف الموت زادت . فعشان كدا أخذنا قرار بأن أكبر شركات المنتجات الخشبية عندنا ؛تحول إنتاجها لتوابيت محترمة متكلفة تليق بجثة المواطن .. وكمان هنحاول ندعمها... واستنوا قرارات تانية طبقا للحالة .. وبانتهز الفرصة وأحب أقول لكم؛ إن مشروب الإخوة بيخللي المرء فتوة( إظلام عليه وسطوع على الشخص من أعلى وهو يضحك و يقوم بمهامه. ثم خفوت وعودة للإعلانات)

الموديل - لو فنان وصاحب ومزاج.. ومالكش في العادي.. يبقى تابوتك عندنا. اتفقنا مع أكبر التشكيلين والفنانين.. يعني براحتك تعمل تابوتك . بالمنظر اللي عاوزة من جوا ومن برة . كمان اتفقنا مع أكبر مصممي الأزياء عشان البدلة اللي هتلبسها وانت رايح تقابل رب كريم( أظلام وإضاءة على مذيع ومعه ضيف)

المذيع - ورأي حضرتك في القرارات الأخيرة؟

الضيف - عاوز رأيي بصراحة؟

المذيع - طبعا يا افندم

الضيف - أنا شايف ان بعض القرارات بتدل على قلة الإيمان. وقلة الإيمان دي هي السبب في الوباء اللي إحنا فيه

المذيع - ممكن توضح أكتر؟

الضيف - شوف ياسيدي لازم كلنا نؤمن أنه لما ييجي أجلك مش هينفع لادوا ولا جهاز طبي.. ثم كمان نسينا إن المعاناة اللي بيكون عليها المتوفي قبل مايموت.. بتشيل عنه ذنوبه وخطاياه... يعني المعاناة بتعمل مقاصة مع الذنوب ... في معاناة الذنوب والخطايا تقل.. مافيش معاناة؛ الذنوب تزيد والخطية تتثبت.. قل لي يا مؤمن منك له؛ تختار إيه؟ شوية ألم صغيرين في الدنيا ؟ولا العذاب الأبدي؟ على كل مواطن شراء تابوته فورا .. فكما قال القائل اعمل لآخرتك كأنك تموت الان

المذيع - ( مقاطعا) كأنك تموت غدا

الضيف - لا يا حبيبي . ماهو لو كان عايش دا الوقت كان غير كلامه

المذيع - يعني باختصار سعادتك عشان الوقت

الضيف - باختصار.. الأعمار بيد الله. والمعاناة هي الوسيلة للمغفرة.. فعلي كل المسئولين العمل وبشدة على ان يلاقي المواطن ربه كما ينبغي له؛ دون محاولة اعتراض على مشيئته. ربنا عاوزك تموت؟ هتموت.. عاوزك تعيش؟ هتعيش. انا بنادي من هنا بزيادة الدعم للتوابيت وأن يعمل الكل جاهدين على تحقيق شعار؛ تابووت لكل مواطن( خفوت وإظلام؛ وإضاءة على منطقة إعلان أخرى)

المعلن - كل بني آدم بيطمع إنه يدخل الجنة. وهيدخل الجنة إزاي؟ بالرحمة. إن ربنا يرحمه, وعشان كدا كل واحد فينا مهما كانت ديانته .. بيقرا شوية من كتابه المقدس قدام المتوفي؛ عشان ربنا يرحمه.. صح؟

قلتم صح.. طيب ليه تخلي رحمة ربنا ليك بإيد غيرك؟ مهما كانت ديانتك .. تابوت الفردوس مبرمج أنه يفضل 200 سنة يقرا لك كتابك المقدس اللي تختاره. لا وكمان في تابوت الفردوس الأعلى بيشتغل بتقنية توليد الطاقة من الهوا والشمس والمطر.. يقرالك كتابك المقدس لغاية يوم الدين.. الحق احجز ..

( خفوت وإضاءة على الرجل ومعاونيه)

شاب1 - يا افتدم في مشكلة جديدة

الرجل - إيه؟

شاب2 - التوابيت شغالة عال العال.. وكل الخشب تم التعامل معاه.. وفي طلبيات كتير . وللأسف هنضطر نرفض بعضها ؛ لغاية ما نستورد خشب

الرجل - ارفضوا كل طلبات الجملة واقبلوا طلبات الأفراد خصوصا في توابيت الفردوس والفردوس الأعلى

شاب1 - حتى دي يا افندم فيها فيها مشكلة

الرجل - لا مشكلة ولا يحزنون .. إنتم اديتم التعليمات اللي طلبتها بكميات صناديق البلاستيك الخفيفة الجديدة؟

شاب2 - طبعا نفذنا أوامرك مع إننا مش فاهمين( إضاءة على الشخص في الأعلى)

الرجل - مش لازم تفهموا...( يدخل احدهم ويعطى بطاقة تعريف للرجل. ينظر فيها . ) يدخل فورا

شاب1 - انت مدي مواعيد لحد سعادتك؟

شاب2 - مافيش عندنا ميعاد في الأجندة.

الرجل - ( يشير اليه بيده طالبا منه السكوت.. ويدخل أحدهم . فيشير الرجل لشاب 1 بإفساح المكان للقادم . ويجلس القادم

الرجل - خلاص انا باتصالاتي خليت شركتك هي الشركة الوحيدة المتعاملة في دفن جثث الناس اللي ماتت بالفيروس . وقدمنا شهادات موثقة بإن شكركتك الأكثر جاهزية والأكتر اتباع لاجراءات الحماية الطبية

الزائر - دا جميل مش هننساه لسعادتك .. رئيسي قال لي أبلغك جزيل شكره يا افندم

الرجل - لا جميل ولا حاجة .. ثم اللي انت بتتكلم عليه دا ماعادش رئيسك. أنت بتتكلم مع رئيسك دا الوقت

الزائر - ( حائرا)

الرجل - إحنا اشترينا معظم أسهم شركتكم

الزائر - مبروك يا افندم

الرجل - انت طبعا عارف إننا مابندخلش ف مشروع من غير مانعرف كل شيء عنه؛ وعن العاملين فيه

الزائر - ياريت نكون عند حسن الظن يا افندم

الرجل - دا واضح

الزائر - شكرا

الرجل واضح إن عندك تطلعات ؛ وبتحب تزود مصادر دخلك عشان كدا في المدة اللي فاتت؛ أنت ومجموعتك استغليتم ان مافيش حد بيمشي في الجنازة وسرقتم التوابيت

الزائر - أبدا يا افندم.. مين قال كدا؟

الرجل - كل شيء موجود صوت صورة .. تحب تشوف؟ مش انت بس .. أنت وكل شبكتك في كل المدن

الزائر - ( منهارا) سماح سعادتك... كان عندي ظروف صعبة... ومستعدين نرجع الفلوس اللي اخذناها .. وتبقى آخر مرة

الرجل - الشيء اللي مزعلني إنك تسرق تابوت تمنه 2000 وتبيعه ب 200 .. دا الشيء اللي كشفك... حرامي غبي

الزائر - آخر مرة يا افندم

الرجل - لا مش عاوزينها آخر مرة.. من اليوم عاوزينها كل مرة ... العربية بتاعتكم هيبقى فيها صندوق معدن كبير على عجل .... في صندوق بلاستيك.. عند الدفن تشيل الجثة من التابوت تحطها في الصندوق .. وتدفن.. التابوت تسيبه في المكان اللي هنقول لك عليه.. ولكم عمولة كويسة

الزائر - تمام سعادتك

الرجل - طبعا الكلام دا ماحصلش ولا شفتني .. على فكرة انت دا الوقت بيتعمل لك محضر سير بعربية مافيهاش انوار خلفية على بعد 200 كيلو .... ثم انت عارف إيه اللي بيحصل للي بيخرج عن كلامه معانا( سطوع على الشخص فوق وهو يمارس عملية الاصطياد بالنيشان ببندقية أو مسدس أو سهم ... الخ) يالا اتفضل على شغلك( يخرج الزائر . ويدخل شاب 1؛2 . خفوت على المنطقة وإضاءة على أبو حنان في المؤتمر الصحفي)

أبو حنان - وقررنا أن كل عامل أو موظف شركته هتسرحه هنحول له 2000 في الشهر .. وكمان هنمنح قروض طويلة الأجل بفايدة بسيطة للشركات اللي بتعاني ... وكمان الشغل ليل نهار عشان نوصل لعلاج للفيروس؛ وبرضه فوط ابو جريم سهلة في التعقيم ( خفوت على أبو حنان وسطوع على الرجل ومعاونيه والشخص في الخلفية)

الرجل - إيه اللي بيقوله البتاع دا؟؟ يحول لكل واحد 2000.. إمال إحنا وظفنا الأموات ليه؟ يمسك الهاتف ويتصل هو والشخص في وقت واحد ؛خفوت وسطوع على أبو حنان والهاتف على أذنه ويتجه للمؤتمر)

أبو حنان - ( في الهاتف) خلاص اتفقنا .... ( للجمهور) صحيح إحنا قررنا 2000 لكل شخص وكنا هنحوله له... فلقينا إن الإجراء دا مش كويس؛ ومش هيساعد على تخطي الأزمة.

صوت من الخارج – يعني هترجعوا في كلامكم ومافيش مساعدة للناس؟

ابو حنان - لا مش هنرجع في كلامنا, ثم أنت مش لابس الكمامة ليه؟ مريض وجاي تعدينا.. مؤامرة على النظام ومحاولة نشر الفيروس.. امسكوه .. ( يتجه اثنان من مساعديه للخارج) طبعا مش هنرجع .. بالعكس إحنا قررنا زيادة حصة الفرد ل 3000 مش 2000 .. لكن هيستلمهم عادي من شركته أو مصنعه.. عشان لو كان في شغل خفيف الشركة محتاجاه يقوم بيه دا أولا ... وثانيا حتى لا تنقطع العلاقة بين العامل ورب عمله.. الشركات والمصانع هتبعت كشوف بأسماء الموظفين والعمال اللي قررت تستغنى عنهم؛ لعدم قدرتها على دفع رواتبهم. وإحنا هندفع أو هنساعد ... وبكدا يبقى ساعدنا الشركة والموظف أو العامل . وشبكة تليفزيون العسل الحر؛بتخلي الوقت الصعب يمر ( خفوت ثم بالتوالي مواقع الإعلانات)

الموديل - اوعي تقلق من المستقبل... خايف الوباء يصيبك وبعد الشر تموت؟ وسايب عيال صغيرة أو أب وأم محتاجين رعاية؟ أو زوجة مزة وزي العسل ومش عاوز إنها تحتاج من بعدك وتتجوز حد تاني؟ الحل معانا في ياناصيب . ادقع لعبد الله واتكل على الله

موديل 2 - اقوى مشروع تكافلي

موديل 1 - يعني بعد ماتدفع لعبد الله.. إحنا يعني

موديل 2 - وإن شاء الله لما تتكل على الله ؛الورثة اللي انت محددهم ياخدوا 25000

موديل 1- لكن دا بشرط أن عدد المشاركين يوصلوا ل 10 مليون

موديل2 - مش بس كدا .. إحنا كمان عملنا حساب الناس التانية

موديل1 - يعني لو أبوك؟

موديل 2 - جوزك أو مراتك؟

موديل1 - سلفك .. حماتك

موديل 2 - مابيحبوكش.. ومش ناويين يدخلوا اليانصيب؟

موديل1 - او ناويين يدخلوا ومش كاتبين اسمك؟

موديل 2 - كل اللي عليك تجيب الشهادة بإنه مصاب

موديل 1 - وتشترك بنفسك لنفسك ماحدش يشاركك وتاخد لوحدك 15000

موديل 2 - ودا في يانصيب .. حقك معاك؛ لو البعيد نساك

( أظلام على منقطة الإعلانات ؛ وإضاءة على منطقة الرجل ومعاونيه. نفس الأشخاص الثلاثة بملابس مختلفة وأكسسوارت مختلفة . أو غيرهم ولكن بنفس السمت ؛ وفي الأعلى الشخص يمارس مشغولياته بتنظيم بعض الأشياء )

شاب1 - كل الناس بتطلب مننا سرعة العمل في إنتاج العلاج أو المصل

الرجل - ما الناس شغالين وفي نتايج كويسة

شاب2 - وإمتى هنعلن يا افندم؟

الرجل - مش هنعلن يا غبي( ل 1) حضرت بيان بالأدوية الراكدة في المخازن؟

شاب1 - تمام يا افندم ..( يناوله بعض الأوراق_ الرجل يتفحصها)

الرجل - أدوية علاج الهبالويا .. وأقراص منع الحمل .... مش أقراص الهبالويا دي مضادة للفيروسات؟

شاب2 - أعتقد كلامك صحيح سعادتك

الرجل - مش مهم أنت تعتقد ... أقراص منع الحمل مابتتباعش ليه؟

شاب1 - أعتقد لأن الرجالة دا الوقت هم اللي بيعملوا احتياطاتهم؛ مش الستات

( أظلام على منطقة الرجل ؛؛ إضاءة على مناطق الإعلانات ولكن هذه المرة تمثيل لأشخاص .. المنطقة الأولى مقعد متحرك عليه أحد المرضى وهو يرتدي كيس فوق رأسه نازل منه أنبوب. بجواره أحد الممرضات )

المريض - يابنت أنا تعبت من البتاعة اللي حاطينها فوق راسي دي أكتر من الأول

الممرضة - استحمل يا أستاذ؛ كلها أيام إن شاء الله

المريض - يعني انتم لو شايفين إن الحالة شديدة ؛ خلاص .. سيبوني اموت أحسن

الممرضة - إحنا ماشيين في اإجراءات يا أستاذ

المريض - بتقولي إيه؟

الممرضة - قصدي ماشيين في إجراءات العلاج ( يتجمد مشهد المريض)

( على الجهة المقابلة إعلان الموديل)

الموديل - ادفع لعبد الله واتكل على الله .. يانصيب يأمن حياة اللي بتحبهم من بعدك

( تعود الحركة لمشهد المريض . والممرضة تهم بدفع المقعد. يقتحم عليهم المشهد أحد الأشخاص ؛ وهو يرتدي الكمامة والقفاز وعلى وجهه نظارة مثل التي يستعملونها في السباحة)

الممرضة - ( للمقتحم) انت مين؟ وإيه اللي جابك هنا؟ مش باين عليك لا دكتور ولاعيان

المقتحم - ( يتجه للمريض) بابا .. أزيك يابابا؟

المريض - بابا مين؟ أنت مين ياولد؟

المقتحم - أنا أبنك .. مش معقول العيا خلاك نسيت ابنك حبيبك؟

الممرضة - يا أستاذ مايصحش كدا

المقتحم - دقيقة واحدة يا دكتورة

الممرضة - دكتورة؟ وهي الدكاترة بتعمل حاجة؟ إحنا بس اللي متبهدلين في بلاويكم

المقتحم - ربنا معاك ياست الكل

المريض - انت مين ياله؟

الممرضة - اتفضل امشي بدل ما انادي ع الأمن

المقتحم - ( ينزع النظارة) أنا ابنك حبيبك... نسيتني( يتجمد المشهد. وإضاءة على ركن الإعلان المقابل والمويل يكرر نفس الكلمات السابقة عن يانصيب ادفع لعبد الله... ثم اظلام على الإعلان وتحريك مشهد المريض)

المقتحم - عرفتني يابابا؟

المريض - عرفتك يا بن الكلب

الممرضة - ممنوع التواجد هنا يا أستاذ.. اتفضل امشي

المريض - أيوا مشوا ابن الكلب دا من هنا

المقتحم - دا انا ابنك حبيبك

المريض - حبيبي؟؟ دا انا لما كحيت يا ابن الكلب ... خفت على نفسك وطردتني من البيت وبلغت الإسعاف ييجيوا ياخدوني من الشارع؟

المقتحم - كنت خايف عليك وعاوزك تتعالج

المريض - ( يحاول أن يفتك بالابن) دا انت يابن الكلب زقيتني بالمقشة والمساحة... مش هاين عليك تلمسني بإيدك .. ولاحتى تمسك قماشة .. بالمقشة يابن الكلب

الممرضة - والمساحة

المريض - وكانت وسخة

المقتحم - لا كانت نضيفة

الممرضة - هاضطر اجيب لك الأمن( تنصرف)

المريض - عاوز إيه يابن الكلب؟ غور من هنا.. محروم من الميراث يابن الكلب

المقتحم - ميراث إيه.. هو أنت لو حيلتك حاجة كنت جيت لك؟

المريض - أمال جاي ليه؟

المقتحم - أطمن عليك. وأشوف أخبارك.. وبالمرة أقول لك إن أنا بعت شوية حاجات في البيت .. وجبت تمنهم وجاي لك عشان تشترك في يانصيب ادفع لعبد الله واتكل على الله

المريض - آه سمعت عنه ... عاوز تستفيد من موتي يابن الكلب؟

المقتحم - مش أنا إبنك ومسئول منك برضه

المريض - تزقني بالمقشة والمساحة؟ قلبي وربي مش راضيين عليك .. غور يابن الكلب( المريض يمد يده تجاه كمامة المقتحم فتنخلع؛ وتدخل الممرضة وإثنان آخران؛ يتجمد المشهد على جانب الإعلان تظهر المويدل)

الموديل - ياناصيب حقك معاك لو البعيد نساك... كل اللي عليك تجيب شهادة بأن قريبك مصاب وتكسب لوحدك 15000( إظلام على الموديل وتعود الحركة لجانب المريض)

المقتحم - أنا ابنه وعاوز شهادة إنه مصاب من الفيروس .. أجيبها منين؟

الممرضة - اسأل السكرتارية برة .. ودا الوقت يالا امشي

المقتحم - حاضر( يهم بالخروج .فيمسك به الإثنان)

خلاص هاخرج

ش1 - لالالالا ماعادش ينفع.. حضرتك خالطت المريض وانت مش لابس الكمامة( ينتبه لإن الكمامة وقعت فيعدلها) دي ثواني بس(( يحاول التخلص)

ش2 - ولو ثانية . دا إجراء وقائي ... هنكشف عليك وتمشي على طول ( يدفعانه معهما. إظلام على المشهد وإضاءة على الجانب الرئيسي في الإعلانات . مع سطوع على الشخص في الأعلى)

موديل - للأسف الشديد في حالات وفاة كتير. وطبقا للاجراءات الاحترازية ممنوع حد يقرب من المتوفي .. دول تقريبا منعوا الجنازات.. طيب إيه العمل.. يعني مانودعش حبايبنا لمثواهم الأخير؟

موديل 2 - ( يقفز) لا طبعا إحنا فكرنا لك ولقينا الحل... شركة نصبو ميديا .عن طريق أكبر شبكة من الكاميرات في البلاد هتخليك تعيش مع الجنازة لحظة بلحظة.. وتوصل لك صوت وصورة كل اللي بيحصل عشان تقدر تعيط براحتك... مش بس كدا ..في مكان الدفنة هتكون فيه شاشات كبيرة .. تنقل صوركم عشان يحس بيها المرحوم.. وعشان الناس ماتقولش إن البعيد ماكانش له أهل .. ماتفوتش الفرصة والحق اتصل بيننا واحجز لدفنة حبايبك

موديل1 - ومش بس كدا بفضل احدث التقنيات فإحنا حسب طلبك ممكن يكون النقل على طريقة الثري دي .. يعني كأنك وسط الجنازة بالضبط ( يدخل شخص بلحية ويتصنع الورع)

صاحب اللحية _ اللهم احفظنا. يا أحبائي .. يقولون في الأثر ان المتوفي يشعر ويرى كل من حوله.. ويعلم جيدا من حضر جنازته ومن اهتم .. بل ويسمع الدعاء له.. ويرد عليهم بمثله

موديل2 - وعشان كدا قررنا إضافة الخدمة الجديدة لمن يطلبها . شركة نصبو ميديا ستضع شاشة داخل التابوت ومكبر صوت .. ينقل للمرحوم إن شاء الله صور من حضروا جنازته . بل وينقل أيضا أصواتهم له( إظلام وإضاءة على جانب المريض والمستشفى. نفس المريض السابق على مقعده ولكن في الجانب للمعاكس للاتجاه الأول ونفس الممرضة)

المريض - انا مش عاوز جلسة العلاج دي تاني

الممرضة- - ليه بس؟

المريض - أنت مش شفت الدكتور اللي كان بيعالجني؟ طب فجأة ساكت.. وقالوا مات من الفيروس

الممرضة - قدره كدا .. وأنت بكرة ان شاء الله تخف وت

المريض - (مقاطعا) يابنتي ان كنتوا مش عارفين تعالجوا الدكاترة بتاعكم هتعالجوني أنا؟ ( يدخل عليهم الابن المقتحم ومعه ممرض رجل)

المريض - مامشتش ليه يابن الكلب؟

الممرض - يمشي فين؟ فحصناه لقيناه حامل للفيروس

الممرضة - مش معقولة... صابته العدوى في ثانية؟

الممرض - نتيجة الفحص لقت نسبة كبيرة من الفيروس

الممرضة - معنى كدا إنه حامل للفيروس من زمان؛ ومش باين عليك

المريض - ( ينهض من مقعده ويعدو وراء ابنه الذي يفر منه) انت اللي عديتني يابن الكلب .. انت اللي عديتني يابن الكلب (إظلام ؛ سطوع على الشخص ومنطقة المؤتمر الصحفي . ابو حنان ومعاونيه والرجل يتخذون أماكنهم. أبو حنان أمام المنصة والباقين وراءه)

أبو حنان - إحنا مش ساكتين... بنعمل حاجات كتير كويسة. وهناخد حقنا م الناس الوحشة اللي بعتت لنا الفيروس؛ إحنا أمة قوية.. وهنعدي الأزمة لو سمعتم الكلام .. بنعمل كل مافي طاقتنا... ومعانا رجال أعمال ورجال بنوك وطنيين .. وأنا مش عاوز أنسب الفضل لنفسي .. أقدم لكم أستاذي وصديقي ومعلمي وشريكي؛ يقول لكم هو ومجموعته عملوا إيه( أبو حنان يدفع بالرجل للمنصة ويقف هو وراءه)

الرجل - شركاتنا ومعاملنا كلها إديناهم أوامر بسرعة الوصول لدوا للفيروس دا. ثانيا كل شركائنا قرروا يساعدوا الحكومة؛ واتخذنا اجراءات كتير لمساعدة. مثلا الحكومة قررت مساعدة الشركات بإنها تساهم ب 3000 من أجر الموظف أو العامل اللي ممكن يتم الإستغناء عنه بسبب الوضع الصعب.وإحنا فكرنا في طريقة نساعد الناس دي أكتر .. ماعلى المستفيد من المشروع دا . غير إنه يبعت رسالة لبنوكنا يطلب فيها تحويل مرتبه على بنوكنا. وإحنا بمساعدة فروعنا التجارية وبعض الأصدقاء الآخرين قررنا إنه ممكن يشتري حاجات ب 4000 بدل 3000؛ الحاجات دي تشمل كل شيء بيساعد على الحياة بصورة كريمة ؛ زي المواد الغذائية وأدوات النضافة... لكن لما استعملنا استبيان على شريحة كبيرة من المنتفعين؛ لقيناهم عاوزين التخفيض يشمل كل شيء . فقررنا دا استجابة لمتطلبات الشعب( يأخذ جانبا ويفسح المكان لأبو حنان)

أبو حنان - بصراحة أنا زيكم أول مرة اسمع دا .. وطبعا باسم كل الشعب باوجه له لشكر. وباطمع كمان إنه يتم جميله معانا

الرجل - ( إشارة من يده تدل على التساؤل)

أبو حنان - إحنا كنا فكرنا في الناس اللي وقف حالها وماتشغلش اي وظيفة في شركة كبيرة . زي سواقين التاكسيات وأصحاب الورش الصغيرة وعمالهم الى آخره.. وكنا قررنا نعاملهم بنفش الشكل أي نصرف لكل واحد 3000 في الشهر لغاية ما الأزمة تعدي. فياريت يستفدوا بعرضكم الكريم

الرجل - دا هيكلفنا كتير قوي سعادتك

أبو حنان - الشعب والناس الغلابة والحكومة طمعانين فيكم

الرجل - ( مفكرا) خلاص سعادتك . حول ع البنوك بتاعتنا الفلوس واسماء المستفيدين. وإحنا هندي لكل واحد منهم بطاقة يقدر يتشري بيها حاجات ب 4000(صوت تصفيق حاد)

أبو حنان - عشان تعرفوا ان كلنا بنحاول نساعد

صوت من الخارج - _ أخبار الدوا والعلاج إيه؟

أبو حنان - انتم عارفين ان مسألة الوصول لعلاج بتاخد وقت وإجراءات كتير. الدكتور يتكلم أحسن مني _ يدفع باحد الواقفين وراءه للحديث. ويتبين أنه أحد معاوني الرجل)

الدكتور - زي ماقال سعادته الدوا الجديد بياخد وقت... عشان كدا حاولنا ندور في الأدوية الموجودة والمصرح بيها بالفعل.. ولقينا دوا بيستخدم في علاج الفيروسات .. كان معمول عشان مرض الهبالويا.. وثبتت نتائجه الإيجابية.. يعني جربناه على بعض المرضى وجاب مفعول كويس .. وكمان على بعض الأصحاء اللي ممكن يتعرضوا للإصابة بالفيروس ... ونسبة الإصابة مابينهم انعدمت تقريبا

أبو حنان - ( يصفق له) أظن كفاية كدا اليوم؛ وطبعا كلكم عارفين إن هامبورجر؛ كل لغاية ماتعدي الأزمة؛ هيضرب الفيروس بالجزمة( إظلام وإضاءة منطقة الإعلانات)

المذيع - ( للضيف الذي أمامه ويضع نظارة ويتخذ سمت العلماء بشكل مبالغ فيه) إيه رأي حضرتك في موضوع دوا الهبالويا ؟

الضيف - شوف سعادتك.. دوا الهبالويا دا عشان الفيروس اللي ظهر السنة اللي قبل اللي فاتت. وأثبت نجاحه. لكن للأسف الفيروس انتهى بسرعة

المذيع - ( ينبهه لما قال بإشارة)

الضيف - آسف... زي ماقلت الدوا دا قضا ع الفيروس بسرعة مع إنه مالحقش ينتشر بالصورة اللي كنا متوقعينها

المذيع - ( ينبهه ثانية)

الضيف - وثبت عليما إن الفيروس اللي معانا دا الوقت وفيروس السنة اللي قبل اللي فاتت ؛ من عيلة واحدة..وقرابتهم لصيقة .. يعني مش زي ولاد العم كدا. لا ممكن يبقوا زي الأخوات. فالمنطق بيقول ؛ إن اللي نفع مع واحد؛ ممكن ينفع مع أخوه

المذيع - والخلاصة يا افندم؟

الضيف - زي مابقول لك.. هو أن جايب حاجة من عندي.. دا بالمنطق( إظلام على تلك المنطقة ؛ وإضاءة على منطقة الإعلانات الأخرى)

مذيعة - ( معها ضيف يبدو عليه أنه من رجال الدين من حيث اللحية وطريقة التحدث) إيه رأي حضرتك في موضوع دوا الهبالويا

الضيف - ( وهو يتفحص صدر المذيعة) شوفي يابنت... ربنا بيحث البني آدم إنه مايستسلمش ودايما يدور على حل.. ولازم البني آدم يؤمن إن ربنا كريم وخلق دوا لكل شيء . بس إحنا اللي مش واخدين بالنا.. الأمل دا الوقت في دوا الهبالويا.. وربنا رب الأمل

المذيعة - يعني حضرتك شايف إننا نتمسك بالأمل دا؟

الضيف - طبعا ... شوفي يابنت أنا لوجه الله باعمل جلسات عن كيفية الاستمتاع بالحياة والتمسك بالأمل.. يسعدني إنك تشرفيني( يعطيها الكارت)

المذيعة - ( تتفحص الكارت) حاضر هاجي لك... وأجيب كل صاحباتي كمان

الضيف - ( وهو ينهض) يستحسن المرة الأولى تيجي لوحدك (إظلام وإضاءة على منطقة الإعلان الثالثة . حيث أحدهم يقف وكأنه يخطب في الناس)

المعلن - أنا مستعجب من الناس اللي مش عاوزة تاخد دوا الهبالويا.. دا مش وقت تفكير... أي حاجة يتقال عليها إنها بتنفع تتجرب... حتى اللي عامل فيها مستسلم وتقي ومذعن لقضاء الله ومستني الموت... هتموت إزاي يا عمنا منك لله؟ في أزمة في التوابيت. حتى التوابيت الناس خزنوها ... دا أنا عن نفسي وبالرغم من معرفتي بكبار المسئولين عن صناعة التوابيت . لما طلبت تابوت قالوا تستلمه بعد أربع شهور!! يعني إيه ؟؟ أقول لك أ،ا حتى لو عاوز تقابل ربنا جنابك وتموت؟ اتفضل اتنيل خد الدوا لمدة أربع شهور لغاية لما تابوتك ييجي لك.

(إظلام على منطقة اإعلانات وإضاءة منطفة الرجل حيث يجلس وحده. ثم يدحل معاوناه ومعهم سيدة بالملابس الداخلية وشعرها منكوش . تحاول ان تسوى شعرها بيدها ؛ووجهها في الأرض)

الرجل - مين دي؟

شاب1 - دي الننوسة؛ المدير التنفيذي للبنك سعادتك

شاب2 - وسعادتك طلبت إننا نجيبهالك فورا

الرجل - وعملتم فيها إيه؟

شاب1؛2- يا خسارة مش إحنا دا .. ( يقترب شاب 1 من الرجل ويسر إليه وهو يشير بيده؛ فيتغير وجه الرجل)

الرجل - إزاي دا؟ في المكتب وفي وقت العمل الرسمي؟!!

الننوسة - ماهو كان عمل سعادتك.. واستاهل عليه علاوة إخلاص وتفاني

الرجل - (مندهشا)

الننوسة - شوف سعادتك. في شاب طول وعرض وحليوة كان مقدم على قرض عشان ينفذ مشروعه من البنك

الرجل - (يشير بيده علامة طلب مابعده)

الننوسة- - موظفين الاجتماع عاكسوه. طلب إنه يشوف المدير: جالي وكلمني عن مشروعه . إنه توصل لتوليفة أقراص منشطة بدون أثار جانبية ومفعولها فوري . وبتخلي الواحد يشتغل 3 ساعات متواصلة في الحال

شاب 2 - ياااه 3 ساعات

الننوسة - وطبعا زي ماعلمتنا ساعتك؛ لازم نتأكد من المشاريع اللي بنمولها. والواد حليوة وطول وعرض؛ فلما عرض المنتج . قلت له نجرب.. يعني كنت بتأكد سعادتك

شاب1 - وقعد 3 ساعات؟ كويس إن إحنا جينا ع الآخر

الننوسة - لا ساعتين بس وحياتك... عشان كدا قلت له يطور المنتج ويرجع بعد يومين

الرجل - أنت متأكدة إنه قعد ساعتين؟

الننوسة - حاسباهم بالستوب ووتش وحياتك.. أمال دا شغل

الرجل - (لشاب 1) لما يرجع بسلامته اشتروا منه الحقوق أو ندخل شركاء بنسبة 80 في المية

شاب1 - بعد مايجرب التطوير والا قبله يا افندم

الننوسة - بعده طبعا.. دي سمعة منتاجاتنا ومصداقيتنا(يضحك 1؛2 وسطوع على الشحص في الأعلى) إلا سعادتك جايبني هنا ليه؟

الرجل - عشان التقرير اللي انت عاملاه عن نسبة أرباحنا المتوقعة . والي بتخالفي بيه كلامي

الننوسة - حضرتك طالبت بزيادة الأرباح بنسبة 30 في المية.. وأنا شايفة يا افندم أن مجرد إننا مانخسرش كتير دا إنجاز.. حصوصا بعد ما اشترينا شركات الطيران والسياحة اللي كانت هتفلس لولا دعم الحكومة اللي انقذها

الرجل - يعني مش عاجبك نسبة زيادة في الأرباح بنسبة 30 في المية؟

الننوسة - مش ممكن سعادتك

الرجل - خلاص ياست المطلوب منك زيادة في الأرباح ب 35 في المية

الننوسة - إزاي يا افندم؟ حضرتك ناسي أننا عاملين عروض على الفيزا بتاعتنا في مساعدات الشركات والعمال؟ مع الركود في عمليات السفر والسياحة؟

الرجل - لا مش ناسي يا ننوسة. بالعكس دا هو السبب اللي خلاني أرفع النسبة.. شوفي الفلوس اللي هتتحول لنا من الحكومة عشان المساعدات مش هتخرج من البنك أساسا

شاب1- إزاي؟

الرجل - أفهمك يا غبي( للننوسة) وحاولي تفهمي معاه.. أولا أي سوبر ماركت تابع لنا ... البضايع اللي كان عليها خصم 50 في المية هترجع لأسعارها العادية .. وإحنا عاملين تخفيض حوالي 35 في المية.. يبقى كسبنا كام؟

شاب 2 - 15 في المية

الرجل ثانيا البضايع اللي اوشكت مدى صلاحيتها تنتهي وكنا هنعدمها؛ هتتسحب. يبقى كسبنا كم من ثمنها؟

الننوسة - 100 في المية من تمنها

الرجل - لا 120 في المية عشان كنا هنعدمها بفلوس

الننوسة - طيب دا بالنسبة للسوبر ماركت اللي تبعنا.. اللي مش تبعنا

الرجل - السوبر ماركت اللي مش تبعنا هتعملي معاه صفقة عشان نسمح لحامل الكارت إنه يشتري من عنده. يعني يخصم لنا نفس النسبة اللي مديينها تخفيض.. ولو النسبة دي هتخسر معاهم بالنسبة للأسعار الحقيقية . فنتفق نرفع الأسعار بنسبة تعوض الخسارة .. يبقى كسبنا فرق السعر في محلاتنا وماخسرناش حاجة مع التانيين

شاب1 - ياسلام ع العبقرية

الننوسة - ( تشير بعلامة الأو كي : وسطوع على الشحص في الأعلى)

الرجل - وهو دا مش المكسب بس. المكسب الحقيقي . المكسب الحقيقي بيتمثل في أن المحلات اللي مش تبعنا ؛ هتحول الفلوس للمنتجين عن طريقنا. معظم المنتجين مديونين لنا فهنعمل مقاصة وناخد الأقساط اللي عليهم.. وهم أغبيا ؛ الفايض من الأقساط هيبقى في حسابهم بالفايدة الجديدة اللي هي 7 في المية.. مع إن الفلوس اللي عليهم فايدتها 20 في المية. يبقى لما اطلب منك 35 زيادة في الأرباح صح والا غلط؟

الننوسة - أكبر صح يا افندم . تسمح لي؟

الرجل - (يشير برأسه موافقا. تنهض الننوسة وتتجه للخروج ؛ أظلام على الرجل؛ والمتحرك معها هي وشاب؛ تقع منها علبة صغيرة ينحنى شاب 1 ويلتقطها وينظر فيها)

شاب1 - إيه دا؟

الننوسة - دول شوية حبوب من المشروع

شاب1 - بتاع ال 3 ساعات؟

الننوسة - ( ضحكة عالية مع إيماءة تحمل معنى الموافقة)

شاب1 - دي لازم يتعمل عليها اختبار تاني.. احتمال القرص اللي أخده كان مكسور أو ناقص

الننوسة - ابقي تعالى راجع معايا المستهدف بالليل ) إظلام وإضاءة على منطقة إعلانات مع سطوع للشخص)

الموديل - ( من الممكن أن يوزع هذا الإعلان على أكثر من موديل ) فرصتك الأكيدة معانا. مش فرصة الدنيا بس. لا فرصة الدنيا والآخرة مع بعض؛ شركة الإعمار الأبدي بتعلن عن توافر أعداد محدودة من مقابر الفردوس.. بتطل ع البحر مباشرة. ومكيفة الهواء . وأبواب معزولة عن العالم الخارجي/ فرصتك في مقابر النعيم. مقابر الفردوس اول خطوة ليك في الجنة... الحق واحجز ( إظلام وإضاءة على منطقة إعلانية ثانية)

الموديل - الحالة صعبة. ومتضايق من الكمامة اللي لازم نلبسها كلنا؛ عشان الأزمة تعدي؟

موديل2 - فكرنا.. ولقينا الحل

موديل1 - عملنا لك كمامات ب 100 عطر مختلف.. إختار اللي يناسبك

موديل 2 - بمزاجك... براحتك..

موديل1 - وانتي كمان.. اوعي الحالة تنسيك أنوثتك

موديل 2 - عملنا لك كمامات شفافة. وكمامات برسومات

موديل1 - بكل الألوان والأحجام.. والمرة دي عشانك أنت عملناها بعطرك المفضل ..

موديل 2 - عطرها هيفوح منك طول مانت لابساها.. يعني هتشمي

موديل1 - وتتشمي( أظلام على مناطق الإعلان.. وسطوع للشخص والرجل وهو يمسك هاتفه . وفي المقدمة أبو حنان مع أعوانه وهو يمسك بالتليفون أيضا؛ ومتجهون لمكان انعقاد المؤتمر اليومي)

أبو حنان - لالالا مش معقول اقول اسم الدوا اللي بتقول عليه دا.. كفاية دوا الهبالويا

الرجل - خلاص دوا الهبالويا خلص؛ وماعادش فاضل في المخازن غير دا وصنف تاني كمان

أبو حنان - قدر موقفي...

الرجل - طيب حليناها.. قول انك بتاخد دوا تاني كمان وماتقولش اسمه

أبو حنان - حلو دا ( يتجه للمنصة ويرتكن عليها؛ للجمهور) الوضع صعب. والناس مابتسمعش الكلام... لكن في نفس الوقت عاوزين الحال يمشي... وقدرنا في فترة صغيرة نوفر كل ماتحتاجه الأزمة. كنا بنستورد كمامات . بقينا بنصنعها؛ في منها فايض؛ وعملناها طبقا لنوعية كل زبون.. وفرنا التوابيت. والمقابر.. وكله عمال يشتغل ع الدوا؛ وهييجي قريب .. في نتائج إيجابية كتيرة

صوت من الخارج – بالنسبة للدوا يا افندم في ناس كتير بتشكك في جدوى دوا الهبالويا

أبو حنان - سيبهم يشككوا... اتعودنا منهم على كدا. لكن النتايج بتقول إيه؟

صوت من الخارج- يعني سعادتك بتوصي بدوا الهبالويا؟

أبو حنان - الدوا دا مش تأثيره الأصلي العلاج ؛ مع إن في نتايج كويسة زي ما قلت .. لكن كما أكد لي العلماء؛ إنه بيساعد على عدم الإصابة بالفيروس

صوت من الخارج – يعني سعادتك بتاخده؟

أبو حنان - احترم نفسك

صوت من الخارج – يا افندم سعادتك بتاخد دوا الهبالويا؟

أبو حنان - إن شا الله أعدمًكم كلكم .. كل يوم باخد دوا الهبالويا وقرص تاني كمان

صوت لجمهرة – إيه هو؟

أبو حنان - مش دا الوقت. لكن افتكروا كويس بضرورة البعد عن الزحام أو المخالطة. وعشان كدا برفان شم شمة واجري بعيد؛ هيخلي الكل عنك يحيد( إظلام تدريجي على أبو حنان؛ وسطوع للشخص ثواني؛ ثم البدء في مناطق الإعلانات)

مذيع - وفي تصريح جديد أدلى السيد بأنه ربما يوجد عقار آخر لدرء مخاطر الفيروس . ولكن لم يفصح عنه. ولا ندري لماذا؟( تجميد وإضاءة لمنطقة أخرى)

مذيع 2 - هذا وقد تضاربت الأنباء عن ماهية الدواء الذي لم يفصح عنه بمؤتمره الأخير وأيضا الغرض منه . فمن قائل بأنه لا شيء هناك؛ وأن التصريح لمجرد لفت الأنظار عن الكارثة.. وقول آخر بأن العقار ربما لم تتوافر فيه الشروط بعد أو تتضح نتائجه بعد. ولكن العلماء المحيطين نصحوا بتناوله ( يتجمد المشهد وإضاءة لمنطفة أخرى)

مذيعة3 - وهناك انفراد جديد لمحطتنا بفضل براعة وتمكن العاملين بها.. استنوا الخبر المفاجأة بعد ثواني... الخبر الحصري اللي انفردت بيه محطتنا... يالا هاتوا وكلموا أصحابكم وقرايبكم عشان يعرفوا خبر الساعة( تجميد وإضاءة على مذيع 1)

المذيع - ربما هناك جديدا في هذا الأمر ؛ فتقول محطة زميلة أنها بصدد الكشف عن ماهية هذا العقار .... والآن إلى هناك

المذيعة3 - بعد عمل كبير وشاق من فريق التحقيقات بالمحطة ... ومقدرتهم على الوصول لأدق التفاصيل وأكثرها سرية.. تبين بشكل كبير إفى أن يكون قاطع؛ أن العقار الجديد هو أقراص منع الحمل للسيدات ( هنا سيحدث التناوب بين المناطق الثلاث بشكل الفوتو مونتاج؛؛ وإن اعذرت الدقة فيه . فيمكن الإبقاء على أسلوب الخفوت وتجميد الحركة والسطوع بالمكان الآخر)

مذيع2 - هذا وقد أثار الكشف عن تناول أقراص منع الحمل للسيدات كعلاج أو وقاية من الفيروس العديد من الأسئلة .. ويسعدنا أن يكون معنا عبر الاتصال العالم الجليل بهذا الشأن( يدخل أحدهم من مقدمة المسرح في بقعة ضوء خاصة به أو يسير ومعه المتحرك) مساء الخير يا افندم معاك محطة

العالم - (مقاطعا) ياسيدي عارف.. قول عاوز إيه بسرعة لو سمحت عشان في 30 قناة وموقع ع الويتنج

المذيع - عاوزين نعرف رأي سعادتك في موضوع أقراص منع الحمل وتأثيرها ع الفيروس

العالم - شوف ياسيدي.. أقراص منع الحمل بتعمل على تثبيط ماهو نشط أو ماقد ينشط . بالتعامل بشكل دائري بأضلاع ثلاث مع المكونات. فنظرا لكل الأشياء اللوجية اللي الناس بتتكلم عنها ؛ ربما يحدث وبشكل كبير أن يتعامل هذا المثبط مع النشاط المتزايد للفيروس . وربما كون هناك حالة من الصدام أو الارتباط بما يكون عنصرا جديدا غير ضار أو ضرره هين يمكن التعامل معه...

المذيع - مع إني تقريبا مش فاهم كلام سعادتك

العالم - ولا أنا

المذيع - بتقول إيه سعادتك؟

العالم - ( متداركا) اولا . يعني ماقلته يعتبر اولا

المذيع - وثانيا؟

العالم - ثانيا في نظرية علمية جديدة بتقول إن الفيروس بيأذينا ليه؟ عشان بيتكاثر.. يعني هو لو فيروس واحد دخل الجسم أو حتى عشرة وفضلوا زي ماهم / مش هيأثروا. إنما المشكلة إن الفيروس من دول بيدخل عند سيادتك ؛ وفي لخظات يتكاثر ويصبح ملايين ؛والملايين يعملوا مليارات. فعشان كدا النظرية الجديدة بتقول إن كل مايمنع التكاثر هو ضد الفيروس .. ووقتك كدا خلص أعذرني ...( إظلام على العالم أو خفوت وخروج .. وإضاءة على المذيعة ومعها ضيف)

المذيعة - ويسعدنا أن يكون معنا الأستاذ؛ لإلقاء الضوء على مايثار هذه الأونة من تأثير أقراص منع الحمل على الفيروس ( للضيف) تقول إيه سعادتك عن الموضوع دا؟

الضيف - أولا في هناك قولين بالنسبة للفيروس.. الأول إن دا فيروس طبيعي؛ يعني خلقة ربنا.. صح؟

المذيعة - صح؟

الضيف - لو كان الفيروس خلقة ربنا.. وأقراص منع الحمل ؛ لكن بإرداة ربنا برضه.. بتساعدنا في منع الحمل اللي هو خلقة ربنا . إذن بمساعدة ربنا اللي خلانا نعمل الأقراص دي؛ نقدر نمنع الفروس اللي هو خلقة ربنا بمساعدته

المذيعة - ولكن...

الضيف - ( مقاطعا) أما القول الثاني بالنسبة للفيروس.. فبيقولوا ان دا فيروس من نتاج البشر .. صح؟

المذيعة - صح

الضيف - لو كان الفيروس من إنتاج البشر.. وأقراص منع الحمل برضه من إنتاج البشر . فاللي عمله البشر . من الممكن أن يقف ضده ما أنتجه البشر .. ولكن بمساعدة ربنا.اللي خلانا نعمل الأقراص دي

المذيعة - ولكن يا افندم

الضيف - ( مقاطعا) لكن إيه انت هتعترضي على مساعدة ربنا؟ هتكفري؟

المذيعة - حاشا لله ( خفوت أو أظلام وإضاءة على مذيع 2)

مذيع2 - وبالنسبة لحديث الساعة عن أثر أقراص منع الحمل في التعامل مع الفيروس كان للمحطة هذا التحقيق الميداني( تجميد أو إظلام وسطوع على مقدمة المسرح حيث عدة أشخاص سيتحدثون بالتناوب بما يوحي أنهم في لقاءات تليفزيونية ميدانية بينهم مسافات ؛ والتعامل معهم بنظام اللقطات المتتابعة)

1 - لالالا أقراص منع الحمل دي طلعت كويسة خالص. من ساعة ما أخدتها وأنا حاسس إن صدري بيكبر. قصدي عضلاتي بقت كويسة

2 - دي كويسة خالص. ومن يوم ما اخدتها وأنا حاسس بالأمان .. عيبها بس ان انا ومراتي بقينا بنتخانق عليها

3 - أقراص منع الحمل دي كمان لها تأثير كبير في تحسين سلوكياتنا والإدراك بما يشعر به الآخر... أقول لك إزاي... زمان لما كان بيحصل خناقة وصوت عالي بيني وبين مراتي... كانت بتقول لي دايما ..حط نفسك مكاني.. وماكنتش عارف دا يعني إيه... دا الوقت بعد ما أخدت الأقراص عرفت المعنى دا كويس وبقينا إحنا الاتنين واحد

4 - زي ما عملوا في دوا الهبالويا وخلوا الشركات تنتج كميات كبيرة منه ... لازم يعملوا دا مع أقراص منع الحمل

5 - لالالا أنا بطالب ان أقراص منع الحمل تتوزع بصورة عادلة على كل المواطنين بلا استثناء ... مش يسبوه يتباع في السوق السودا!!(إظلام على المنطقة الأمامية ؛ وإضاءة على المذيعة)

المذيعة - هناك انفراد آخر خطير تنفرد به محطتنا الرائدة بفضل فريق التحقيقات الخاص بها .. فبعد التساؤل عن جدوي أقراص منع الحمل للجنسين؟ وهل هو للرجال فقط أم للرجال والنساء ؟ خاصة وإن كثيرا من السيدات اللاتي كن يتعاطين هذه الأقراص أصبن بالفيروس.. اتضحت لنا الحقيقة المطلقة.. فبعد أن راقب أفراد تحقيقاتنا مشتريات البيت الكبير, لاحظوا أن هناك شراء لنوع شعبي من كريمات البشرة بكثرة .. وهو كريم... ب 5 دهنات تخلص من الأشف. وبعد البحث اتضح أن السيدات في البيت هن من يستعملن هذا الكريم(تجميد أو إظلام )

مذيع2 وضيفه – الفيروس بروتين. بينجذب للبروتين اللي هو إحنا.. بدهان الكريم دا على الشفايف وحوالين العين فالبروتين اللي في الكريم بيجذب الفيروس. ومضاد الأشف بيقضي عليه( ثم لقطات سريعة على المذيعين الآخرين متتابعة بدون حديث مع رأي الشارع أيضا.. ويراعي في اللوحات السابقة ان تكون هناك لحظات سطوع للشخص في بعض الأحيان. ثم إضاءة في المنتصف على منطقة الرجل . إظلام ثم إضاءة على المنطقة الوسطى؛ وهذه المرة أيضا إما الإتيان بثلاث أشخاص جدد يتخذون نفس السمت السابق. أو هم نفس الأشخاص ولكن بملابس واكسسوارت مختلفة . الرجل جالس ومعه شاب 1 . ثم يدخل عليهما شاب 2)

الرجل - (ل2) اتأخرت ليه؟

2 - في مشكلة صغيرة وباحاول أحلها

1 - مشكلة إيه؟

2 - وانت مالك؟

الرجل - انطق. مشكلة إيه؟

2 - سعادتك انت عارف بيقولوا الفيروس انتشر في منطقة الاسطبلات. عشان كدا . عمال رفع مخلفات الأحصنة .. ماجوش من يومين

الرجل - هي شركة كنا متعاقدين معاها؟

1 - لا؛ الشركة كانت بتكلف كتير .. فقلت نوفر واتفقت مع عمال يومية

الرجل - غبي (ل2) ماشفتش الاسطبلات التانية واتفقت مع الشركة اللي هناك أو العمال ليه؟

2 اتصلت ولقيتهم نفس الحال سعادتك( سطوع على الشخص ممسكا بهاتفه؛ صوت التليفون للرجل الذي يجيب بإيماءات من رأسه سريعة ؛ ثم يضع الهاتف؛ والشخص يبتسم في نشوى)

الرجل - طيب روح للاسطبلات التانية واعمل معاهم عقد إننا نرفع مخلفاتهم لمدة ست شهور.. إديلهم سعر منخفض.. لكن مع شرط جزائي كبير .. قول 100 مليون للي يخل بالاتفاق

2 - كدا هندخل على كارثة سعادتك

الرجل - نفذ وخلاص

1 - مع احترامنا لسعادتك .. ممكن نفهم ل

الرجل - ( مقاطعا) أنا نفسي مش فاهم.. يالا غور انت وهو من هنا. نفذوا اللي قلت عليه ( يخطون خطوات للانصراف) استنوا( يتجمدان ويرجعان بهدوء) الأول شوفوا أحوالهم المادية . لو تعبانة عشان من مدة مافيش سباقا للخيل ومافيش دخل. اعرضوا عليهم اننا نشتري الاسطبلات .. بأرخص سعر ممكن . بعقد بيع نهائي بأقساط على مدة طويلة .. يالا ( في طريقهما للانصراف ؛ خفوت وإضاءة على أبو حنان وهو يتجه لمؤتمره ومعه معاونيه)

أبو حنان - لالا باقول للشعب مايصحش كدا.. مش عشان إحنا وقفنا جنبهم وصرفنا لهم فلوس ووفرنا كل شيء... يقوموا يستحلوها ومايروحوش الشغل.. لا الشغل لازم يرجع تاني.. نعمل احتياطاتنا ونروح الشغل والأعمار بيد الله... الخدمات تتعطل ماشي.. لكن الإنتاج يتعطل في خطر على مصالحنا.. ناخد الأدوية ؛ ونقوي المناعة ونتكل على الله ؛ ولبان سوزان يديك الأمان ( إظلام على أبو حنان وإضاءة على مناطقة الإعلانات)

المذيعة - وقد انتشرت على مواقع التواصل بسرعة رهيبة . فكرة أن روث الخيول من الممكن أن يقضي على الفيروس .. فقد حقق مقطع مصور لأحدهم وهو يروي تجربته أكثر من عشرة ملايين مشاهدة في ساعتين .. نشاهد معا .. ( يدخل أحدهم في بورة ضوء أو متحرك, لو كان المخرج استعان بالمقاطع المصورة ؛ فليكن هذا أيضا)

- - الحقيقة أنا نفسي مش مصدق اللي حصل لي. وكنت خايف أقوله. لكن قلت إن دا حرام وعيب .. وجايز دا يكون طريق للشفا لناس كتير؟ باختصار أنا عايش أنا ومراتي لوحدنا ... مراتي وقعت في الشغل وخدوها ع المستشفى ؛ وطلع الفيروس عندها؛ وإحنا ليلتها كنا .... انتم فاهمين طبعا . الجيران لما عرفوا بخبر مراتي .. بلغوا عني ؛ عشان ياخدوني الحجر الصحي.. الحقيقة ساعتها كنت حاسس بكل أعراض الفيروس اللي بيقولوا عليها.. لما جم بتوع الإسعاف ياخدوني . مش عارف ليه خفت وهربت... مشيت كتير وتعبت.. وصدري بقى نار . وباكح كتير .. لقيت نفسي جنب اسطبل لخيول السباق ..ولقيت كمية من روث الخيول قدامي.. ربنا الهمني ان أدجهن صدري بالروث دا.. ومن تعبي رحت في نومة . كبيرة.. صحيت لقيت الكحة تقريبا راحت .. وصدري بقى أحسن( قطع هنا وإضاءة على موديل في الطرف الآخر)

الموديل - تعلن شركة إف إف آه بمناسبة أنها أصبحت المالكة الوحيدة لكل خيول السبق في البلاد . أنها على استعداد تام لتوصيل الروث الأصلي لكل من يطلبه. واحذروا التقليد ( إظلام عليه؛ وإضاءة على مذيع آخر)

المذيع - وينتشر الآن السؤال الأهم ألا وهو. هل روث خيول السباق هو الذي له تأثيره؟ أم روث كل الخيول( يتجمد المشهد ؛ وإضاءة على سيدة في نفس ركن صاحب الفيديو . أو المقطع المصور)

سيدة - لا يا أختي.. أنا لما جوزي حصل اللي حصل وخف بفضل روث خيول السباق .. جاني المستشفى... اتسحب زي الحرامية لغاية مادخل لي .. وخدني ونططني من ع السور . وقال لي ع اللي حصل. وخدني البيت وقال لي انه هيروح يجيب لي شوية من اللي شفاه من اسطبل خيول السباق.. قلت له علي إيه تتعب نفسك؟ الجيران عندهم حصان اتسحب وروح له وهات شوية من هناك.. اتسحي وجاب لي شوية حطيتهم على صدري؛ وعاديك يا اختي .. تقوليش اتكب مية نار علي؟ وقعدت اصرخ.. فجوزي الله يستره قام شاله من علي بسرعة . وراح اتسحب وجاب لي شوية من روث خيل السباق مطرح ماكان.. وحطه على صدري.. تقوليش بلسم يا ختي. ارتحت ونمت. والدهنة التانية .. اهو قدامكم وزي الفل... اوعي ياختي انت وهي تجيبوا أي روث .. هو روث خيول السباق وبس( إظلام وإضاءة على منطقة أخرى_ والشخص في الأعلى يضحك بشدة )

موديل - ومازال الاخصائيون يعكفون على تبيان الفرق بين روث خيول السباق والخيول العادية. وقد لاحظوا اختلافات كثيرة تعود إلى ...( إظم إضاءة على منطقة أخرى حيث المذيعة والضيف)

الضيف - الكلام عن روث خيول السباق دا مش حقيقي.. أنا أمي تعبت .. جبت لها الروث دا.. ماعملش حاجة بالعكس دا حالتها زادت وأنا باطالب

المذيعة - ( مقاطعة) لحظة واحدة معانا مداخلة مهمة سعادتك .. الو ؛ يضيء نفس مكان السيدة السابق ؛ وأحدهم يمسك هاتفه ويدخل في حوار مع المذيعة والضيف)

- الضيف اللي عندك دا بيقول كلام مش حقيقي .. وإحنا هنرفع عليه وعلى محطتكم قضية تعويض للتشهير

المذيعة - انتم مين؟ ممكن تعرفنا بنفسك

- أنا مدير التسويق لشركة إف إف آه المالكة الوحيدة في البلاد لكل اسطبلات خيول السباق ؛ والمستوردين الوحيدين لروث خيول السباق من دول العالم المتقدمة

الضيف - إزاي كلامي مش حقيقي؟

المذيعة - نفهم منه يا افندم ولسيادتك الرد في الآخر

- شوفي سيادتك لا أنا ولا الشركة اللي بامثلها لنا رأي في عملية قدرة الروث في القضاء على الفيروس . المسألة دي بتاعة ناس متخصصة

الضيف - يعني كلامي

- ( يرفع صوته) سيبني أكمل

المذيعة - ( للضيف) أرجوك يا افندم( للجمهور) كمل سعادتك

- - شوفي يا افندم من ساعة ما اشتد الطلب على روث خيول السباق.. ومن اللحظة الأولى ارتفعت الأصوات اللي بتحذر من الغش. فإحنا قررنا نبيع منتجنا بشكل خاص للأفراد عن طريق الاتصال التليفوني وتسجيل اسم العميل في قاعدة بيانات محترمة والتأكد منها. منعا من أن أي شخص ياخد اكثر من اتنين كيلو ويحرم الآخرين منها. إحنا رفعنا شعار أن لكل مواطن الحق في أخذ حصته من الروث.. وللأسف يا افندم الضيف اللي عندك بييقول انه اشتري من عندنا. واسمه مش موجود في قاعدة البيانات .. يعني ببساطة كلامه غلط.. ما اشتراش من عندنا

الضيف - إزاي؟ الكيس معايا أهو

- شوف سعادتك الكيس الأصلي بتاعنا له رقم سري مخفي تحت العلامة.. وبنطلب من العميل الكشط وإظهار الرقم إرساله لنا أولا للتأكد وثانيا للدخول في سحب على توابيت ومقابر .. ممكن تقول لي الرقم سعادتك؟

الضيف - مافيش أرقام

- - يبقى حضرتك اتعرضت لعملية نصب. والمنتج مش من عندنا.. وعشان المسئولين عننا طالبين مننا حسن التصرف مع وسائل الإعلام فأنا باطلب من حضرتك توضيح الرقم الأصلي للمواطنين اللي يمكن من خلاله طلب المنتج

المذيعة - لكن دا يبقى إعلان يا افندم

- - كدا هنضطر لاتخاذ الاجراءات القانونية ضدكم

المذيعة - طيب سعادتك إحنا هندي الرقم الحقيقي لكل من يرغب عن طريق الاتصال او صفحتنا على مواقع التواصل

- أوك

الضيف - طيب ممكن سعادتك تبعت لي المنتج الأصلي .. أمي عيانة

- - خد الرقم من المذيعة واتصل ( لقطات متتابعة على مقدمة المسرح بما يوحي بأشخاص يجرى معهم تحقيق تليفزيوني عن الروث كل واحد يدخل من جهة يقول جملته في المنتصف ويخرج من الآخرى)

- قادر كريم يودع سره في أي شيء

- ممتاز أنا جربته على أبوبا وبقى زي الحصان

- أنا مش لاقيه.. بيبعوه في السوق السودا.. والشركة قالت انها هتبعت لي بعد خمس أيام(إظلام على المقدمة وإضاءة المنتصف حيث السمت الأول للثلاثة الرجل وشاب 1و2 والشخص في الأعلى سعيد ويلعب بشيء ما)

1 - سعادتك إحنا مش ملاحقين على طلبات أقراص الهبالويا ومنع الحمل وكريم الأشف

2 - وروث الأحصنة .. طبعا كل التوابيت بكل أنواعها اتباعت وبنفكر نصنع غيرها

1 - والمقابر بكل انواعها اتباعت

2 - واشترينا شركات الطيران والسياحة والمصانع اللي أمرت بيها

الرجل - شركات السياحة ( يفكر _ ثم يخرج هاتفه؛ يتجمد المشهد ؛ وإضاءة على بقعة إعلانات)

الموديل - راجع من برة. أو حد من معارفك مصاب؟ وزهقان من الحجر المنزلي؟ تعالى اعمل الحجر معانا .. على كيفك وبراحتك.. حجرات من الزجاج تشوف من خلالها اللي انت عاوزه وتعيش معاه.. ستات هاواي . ترابيزات قمار فيجاس.. تقدر تلعب وانت في مكانك.

موديل2 - وتداعب وتلاعب .. واختار نوعية وعمر الأطباء والممرضين اللي هيكشفوا عليك ويتابعوك.. حتى اختار لبسهم كمان ... انت بس تكتب مواصفاتك في الحجر اللي انت عاوزه ؛ وإحنا هنرتبه لك.. شركة سرك في بير للسياحة هنخلي الحجر كأنه نعيم (اظلام على الإعلان وعودة للمشهد الأصلي)

1 - وبيدفعوا لنا بانتظام رواتب اموات 45

2 - كل رجالتنا الصغيرين كمان استفادت سعادتك

1 - الركود الوحيد كان في السلع المعمرة .. وأجلنا تجديد المحلات اللي بتسوق المنتجات دي( سطوع شديد على الشخص .. وهو يفكر ثم يقوم بعملية اصطياد)

الرجل - هاتولي الننوسة

1؛2 - حاضر يا افندم ( في طريقهما للخروج تجميد أو إظلام وإضاءة على ابو حنان في المؤتمر)

أبو حنان - طبعا هم المسئولين. ولازم يدفعوا تعويضات عن انتشار الفيروس عندنا . وف كل بلاد العالم اللي صابها الفيروس . وكل واحد من الشعب كإجراء احترازي لازم يكتب وصيته من دا الوقت .. صحيح ان الفيروس دا الوقت بقى أخف من الأول . وسمحنا بعودة الحياة الطبيعية في كتير من المناطق.. لكن برضه مانضمنش... لازم نمضي للأمام دائما برغم كل المعوقات والفيروسات. وبإذن الله بوكسر الأمانة هيديك حصانة(إظلام على أبو حنان وعودة للمشهد السابق حيث الرجل ويدخل عليه 1؛2 والننوسة بملابس داخلية أخرى)

الرجل - المرة دي في إيه تاني؟

الننوسة - نفس الأولاني سعادتك . حقق المستهدف 3 ساعات كاملة لما كنت هاموت.

الرجل - وعملت إيه؟

الننوسة - اشترينا الحقوق يا افندم ؛ وأهو طلع ب10 في المية من الأسهم .. بشرط أن تكون التجربة الثالثة زي التانية

الرجل - ( يضحك) والتجربة دي امتى؟

الننوسة - مافيش وقت يا افندم .. بكره.. ماقلت لك الواد حليوة وطول وعرض

الرجل - المهم الشغل ماشي زي ماطلبنا؟

الننوسة - عال العال. وهنحقق أكبر من المستهدف

الرجل - في شركة تامين منافسة لشركتنا وحسابها عندنا في البنك.. أخبارها إيه؟

الننوسة - متعثرة اليومين دول. وباعتين لي تتفاوض معايا على جدولة واحدة ست ماتسواش 3 مليم في سوق النسوان

الرجل - كدا جميل. تخرجي من هنا تطلبي اجتماع معاها.. وتقولي لها اننا من باب المساعدة هنأمن على محلاتنا ومحطات الخدمة بتاعتنا عندها .. وبملغ كبير جداا.. فاهمة

الننوسة - ضروري يعني؟

الرجل - أيوا وبسرعة

الننوسة - اهي متلقحة عندي في المكتب .. أروح أخلص منها( تنهض وتسير خطوة ثم تعود وتشير لشاب2) ماتجيب الننوس دا معايا يا افندم

الرجل - إيييه؟

الننوسة - أصلهم وهم بسلامتهم جايين وواخديني لسعادتك .. لمحتها في الانتظار وهي بتبص له بصة أنا فاهماها كويس.. ومادام سيادتك عاوز الأمر بسرعة .. هو هيخلص بسرعة

الرجل - (يضحك ويشير ل2) روح معاها

الننوسة - ( تجذب 2 من يده وفي طريقهما للخروج)

2 - ماتجيبي لي قرص

الننوسة - لا كفاية عليها الطبيعي.. القرص لما تخلص وتيجي لي( تجميد وإضاءة على مناطق الإعلانات)

مذيع1 - هذا وقد أثار مقطع القتل المتداول على وسائل التواصل الاجتماعي الكثير من الاحتجاجات .. ووصف بالعنصري .. وهناك حركة كبيرة للاحتجاج

مذيع 2 - وقد امتدت الاحتجاجات للعديد من المدن وهناك خوف من أن تتسم هذه الاحتجاجات بالعنف ( عودة للمشهد السابق)

الرجل - خليهم ينزلوا الرجالة الاحتجاحات .. وبتوع حقوق الانسان والعنصرية يشتغلوا... خلوها تكبر وركزوا على المناطق دي ( يناوله ورقة)

1 - ( يتصل بالتليفون و يتفحص الورقة) اعتبره حصل يا افندم... لكن... لكن دي محلاتنا ومحطات خدمتنا؟ ( تجميد و عودة للمذيع)

المذيع - وقد اتسمت الاحتجاجات بالعنف ..وبعض الفوضويين اشعلوا النار في محطات الخدمة والكثير من المحلات الكبرى (إظلام على المذيع وعودة للمشهد

الرجل - ما إحنا أمنا عليها .وهناخد تعويضات من الحكومة.. نجدد بفلوس الحكومة ونستولى على شركة التأمين ... بلغهم أني رايح الشط استريح يومين ؛ وكمان أكد عليهم في المعامل يشتغلوا في موضوع الدوا والمصل بجد... خلاص ماعادش فيه حاجة نبيعها ولا نستولي عليها

1 - ماتنساش الاجراءت الاحترازية يا افندم

الرجل - ( يضحك)

1 - هو أنا قلت على حاجة غلط؟

الرجل - ياغبي من إمتى الفيروس موت واحد مننا؟ أمير ورئيس وزارة ووزير ورئيس جمهورية ونجم مشهور إلى آخره .. كلهم أخدوا أجازة أسبوع بس ( يهم بالخروج؛ يدخل 2 منزعجا وهو يحكم ربط ملابسه)

2 - الحقني يا افندم

الرجل - في إيه؟ ومالك كدا؟

2 - والله في عز ال..... جالي تليفون كارثة

الرجل - اتكلم..مش فاضي لك

2 - المطابع بدل ماتطبع المقررات التعليمية والكتب اللي اتفقنا عليها.. في غبي إداها أمر بطباعة الكتاب المقدس.. 300 مليون نسخة من الكتاب المقدس ( سطوع على الشخص فوق والرجل يمسك هاتفه ,دخول مناطق الإعلانات كل هذا في الإضاءة الكاشفة)

مذيع1 - وهناك نبأ من وكالات الفضاء باقتراب مذنب كبير من المؤكد أنه سيصدم بالأرض بعد شهر

مذيع2 - نظرا لحجم المذنب فهو قادر على أن يمحو الأرض ويفجرها تفجيرا

موديل1 - ( سمت رجال الدين) يوم القيامة قرب هتقابل ربنا إزاي من غير مايكون في إيدك وفي بيتك وف عربيتك وف جراجك الكتاب المقدس؟

موديل2 - ( نفس السمت) ماينفعش غير الكتاب المقدس يكون شفيع لا اسطوانات ولاملفات لازم الكتاب يكون بإيدك ( يدخل أبو حنان وهو يحمل مجموعة من الكتاب المقدس ويقوم بحركة توزيعه على الحاضرين. خفوت وإظلام)

انتهت

مجدي الحمزاوي