فى البداية كدة نصلى على النبى كدة واللى فية نفس يكمل قراءة للأخر. أول حاجة بيعملها الأب والأم مع ابنهم بيدخلوة المدرسة سنة أولى إبتدائى ظنا منهم أنو بيتعلم حاجة او مفيش غير النظام دة الموجود فى التعليم يدخل الواحد مننا أولى إبتدائى بقا وياخد سندوتشات كل يوم ويروح يجى ويفرح بالشنطة الجديدة والأستاذ ياماما ادانى خمسة من خمسة أدى سنة راحت سنة تانية وتالتة ورابعة يبدأ يدرس فى حاجات كدة الأشعار اللى إحنا بناخدها قطتى صغيرة واسمها نميرة زيلها طويل شعرها غزير ضحكها يسلى وهى لى كظلى ويبدأ الولد يخش فى مرحلة 6إبتدائى ودى بتكون مرحلة الشهادة الإبتدائية ويفضلو ينفخو فى الولد احفظ وذاكر علشان تسبق بن فلان شوف هنا الحكمة علشان تسبق بن فلان مش علشان يتعلم لا العملية نظام سباق ويذاكر الولد ويدش وينجح وهيييية وبعد كدا خد الأجازة اتفسح مع صحابك ياحبيبى والعب كورة .

نيجى لمرحلة الإعدادى بقا تبدأ الأم تقولو شد حيلك ياحمادة علشان تنجح وتبقى كويس ويفضل 3 سنين يحفظ اللى فى الكتب التضاريس وحربب اكتوبر والذرات والكلام الحشو اللى مليان فى الكتب دة لغاية مايدخل مرحلة الثانوى .. حمادة انت كبرت بقا ودخلت على مرحلة تانى خالص حاول تركز كدة عايزاك ياحمادة تكون دكتور أد الدنيا ..نفسى اشوفك دكتور ولا مهندس ياحمادة شوف محددتش بس هيا اقنعت حمادة أن دول هما الدنيا وكل دة حمادة ملوش رأيى بيذاكر علشان شايف أن المجتمع بقا عايز كدا ياما تكون دكتور او مهندس أو أنك أنت فاشل بالنسبة للمجتمع المصرى الجميل العسول .. حمادة يبدأ ياخد دروس ويذاكر ويحفظ معادلات ومسائل ويشترى ملخصات والكلام دة كلوووو لغاية ماتظهر نتيجة الثانوية وحمادة بقا مجابش المجموع اللى يدخلة طب او هندسة فيقوم اى بقا تظهر حاجة اسمها التنسيق تدخلة كلية على مزاج الدولة مش على مزاج حمادة ولا ام حمادة ...

المهم حمادة ضيع 16 سنة من عمرة بيدرس حاجات ملهاش اى ستين سبعين لازمة بإستسناء لو حمادة دة بياخد التعليم كعلم مش علشان يدش فى الإمتحان وخلاص ومش ذنب حمادة دة ذنب المجتمع أصلا .. الا لو ربنا أكرمة وحفظ القرأن يبقى عمل حاجة مفيدة .. إلا لو عرف معلومات عن دينة .. اما باقى العلوم فحمادة فى الزنجبيل. بما أنك أنت مش بتختار كليتك أومجالك اللى هتدرسة واللى درستة دة كلو كلام فاضى يبقى ركز معايا هنا بقا

أولا : لو أنت دخلت أى كلية وعايز تبقى إنسان كويس ولة قيمة ويعرف يتعلم الحاجة اللى هو عايزها فى حاجة كدا إسمها الإنجليزى لازم نتعلمه علشان دة أهم حاجة ماشية فى السوق حاليا ودة لغة العالم حاليا ولو أنت معاك اللغة دى تقدر تشتغل فى أى مكان أنت عايزة .تقدر تبحث عن أى حاجة أنت عايزها .والسؤال هنا اازاى نتعلم إنجليزى

اللى أنا هكتبة دة أنا بحاول اطبقة لسة مطبقتوش علشان محدش يقول انى عالم ! واللى انا هكتبة فى الآخر هكتب إتعلمتة عرفتة من مين.. فى البداية علشان تتعلم إنجليزى كل واحد ولة طريقة فى التعلم يعنى هتلاقى واحد يقولك لازم تسمع وفكك من القواعد , والتانى يقولك لا أنت لازم تعمل الإتنين , التالت يقولك لازم تركز على الأكسنت بتاعتك , والرابع يقولك لايعم أكسنت اى اتكلم أنت إنجليزى الأول وبعدين نشوف حكاية الأكسنت دى كل دة جميل وحلو وكل طريقة ليها مميزاتها وليها عيوبها .. بس الطريقة المعروفة والسائدة واللى كلهم متفقين عليها انك علشان تتكلم لازم تسمع وعلشان تكتب لازم تقرأ ..إنجليزى من هنا وكل اللغات : https://goo.gl/FbWn4q

ثانيا : لازم تحدد المجال اللى أنت عايز تشتغل فية لازم تعرف اى الشغف بتاعك الحاجة اللى أنت بتحبها ودى حاجة صعبة مش سهلة

حدد شغفك : https://goo.gl/9orQa2

ثالثا: بعد ما اتعلمت إنجليزى وعرفت الشغف بتاعك إبدأ بقى دور على حاجات تتعلمها فى المجال بتاعك ودة ممكن يكون أنك تاخد كورسات تحضر إيفينتات تقرأ كتب تسأل فلان تسأل علان المهم تتعلم .. وممكن حضرتك تتعلم وأنت قاعد فى بيتك عن طريق حاجة اسمها الكورسات الأون لاين وهى MOOCs وعلشان تعرف خش هنا: http://on.fb.me/1ycJml3

رابعا: حضرتك اتعلمت إنجليزى وعرفت شغفك وأخدت كورسات أون لاين خلاص انزل بقا جرب الشغل وخد خبرة طيب ياعم هو أنا هشتغل وانا طالب اة ممكن وممكن كمان فى حاجة اسمها التدريب الصيفى دى حاجة كدة بتعيشك جو الشغل فعلا وتقدر تعرف عن التدريب الصيفى وتعرف تحصل علية إزاى بص على الرابط اللى هنا دة : http://on.fb.me/1fCJMZ

خامسا :حاول تكون علاقات مع الناس وتفيد الناس بالحاجة اللى انت عارفها ودة هيكون من خلال الأنشطة التطوعية طيب عايز تعرف عن الأنشطة التطوعية إنزل تحت فى الرابط دة : http://on.fb.me/1JODN0G

سادسا: طالما معاك إنجليزى وتعرف انجليزى كويس ومعاك شبكة علاقات كويسة ومعاك أنشطة تطوعية أنت اشتركت فيها يبقى خلاص دوس وقدم على منح دراسية فى الخارج طيب عايز أعرف ازاى يعنى إى منح ولية وفين ومنين ! بص على الرابط اللى تحت دة هتلاقى كل حاجة عن المنح الدراسية انزل تحت وبص على الرابط دة : http://on.fb.me/1Ibp6U6

سابعا : حاول تتعرف على مجالات أكثر وأكثر علشان ربما يعجبك وتشوف يمكن تتعلمة فى موقع تكتب علية اى مجال يقولك إى المطلوب منك علشان تتعلم المجال وتتعلمة إزاى وهو موقع :https://www.onetonline.org/

ثامنا : غلف نفسك بحالة من التعليم والتعلم فى كل مكان وحتى على

الفيس ولذلك هديك شوية صفحات وأشخاص تتابعهم وتحاول تعيش وتتعلم وصدقنى طريقة فكرك كلها هتتغير جدا جدا جدا بص على الرابط دة : http://on.fb.me/1FQN3hX

تاسعا : حاول تفيد غيرك واللى حواليك باللى اتعلمتة وساعد الناس ومتبخلش على حد وخلى ليك بصمة فى المجتمع واسعى انك تغير فكر الناس لأن مفيش حاجة هتنفع علشان نتصلح إحنا إلا إذا الفكر إتغير

عاشرا : لو أنت معاك مشروع وعايزة تبنية وعايز له تمويل وعايز تعرف إزاى تحصل على تمويل ممكن تشوف الرابط اللى تحت دة هيفيدك وبالعربى كمان ياعم ابسط هو دة اللينك :http://bit.ly/1Ea6QX3

فى ناس هتفهم من كلامى أننا نهمل الجامعة ومش نخلى بالنا من الجامعة .. لا والله غلط الجامعة دة المفرروض مكان للتعلم وببساطة لو أنت بتتعلم بجد فى الجامعة خليك فيها وذاكر فعلا وجيب تقدير واحضر محاضرات وسكاشن والحاجات الجميلة دى .. ولو مش بتستفاد برضو حاول توازن بين حياتك اللى انت بتتعلمها برة وبين الجامعة لأن الجامعة فى الأول والأخر علشان ترضى الحج والحجة .. حاول ترضيهم .