بعد السلام و التحية ..
عندى حالة من التعجب الشديد من حملات اعلامنا الجميل تليفزيون و صحافة لدعوة الناس للتصويت فى انتخابات البرلمان ..
اكيد شىئ جميل اننا نشارك فى الانتخابات بس اعتقد ان اغلب الناس معرفوش ان فى انتخابات غير من التلفزيون و ده ان دل فى معناه ان فى فشل حاد فى الحياه السياسية فى مصر تقريبآ مفيش احزاب معروفة غير حزب او اتنين معروفين وبرضه مش مؤثرين فى الشارع ..
و لذلك ف البرلمان القادم هيكون رأى شفاف مش معبر عن فكر و رأى المواطن المصرى .
ف ازاى يا محترمين بتطلبوا مننا ننزل نتخب ناس مش عارفنها اصلآ و ابه اللى عرفنى ان اللى انتا بتقول عليه وحش انه فعلآ وحش و العكس برضه .. الاعلام لازم يبطل يتعامل مع الشعب على انه قطيع غنم يلا فى انتخابات و لازم تنزلوا عشان البلد هتضيع و مش عارف الاخوان هيعملوا و هيعملوا .. بلاش النغمة دى و حياه السيسى عندكوا !
انتا ما ينفعش تفضل مهمشنى طول السنتين اللى فاتوا و فجأه فى اسبوع تفتكرنى و تفولى انزل شارك و انقذ مصر لآن المصريين مش كومبارس هتجيبهم يكملوا المشهد بتاعك..و بعد الانتخابات تصبح على خير يا شعب,
لازم الدولة تاخد بالها من الازمة دى و تبدأ تفكر فى حلول ليها ابسطها الاجتماع مع كل الحركات و الاتئلافات الشبابية و اتحادات العمال و جميع اعضاء النقابات المصرية باستمرار .. لازم يكون فى وقت ان الشعب يحس ان صوته مسموع و مهم طول الوقت طول السنة مش بس فى موسم الانتخابات و بس
ف النهاية اتمنى ان الانتخابات تعدى على خير و ميحصلش اى حاجه تعكر الصفو و ربنا يختار الاصلح دايمآ للبلد .. و شكرآ
-
احمد طلعت جويلىخريج كلية تجارة انجليزى جامعة عين شمس .