#الثمانينات

1. شهيد حرب او معدوم سياسي بتهمة الخيانة .

2ّ . اسير حرب او معتقل سياسي بتهمة العمالة .

3. مفقود حرب او مختفي سياسي بتهمة التخابر .

4. معوق مبتور الأطراف او جريح حرب .

5. جندي مكلف او خريج مجند و نايم بموضع محفور بالتراب بالحر والبرد ويدك عليك النمساوي والهاون ثمن سنين .

6.ينطوك امر هجوم وبيدك بندقية وبيها شاجورين وتعرف انت بعد مترجع لان كدامك دبابات وومدفعية وساتر و 60 الف جندي .

7. انت من الجنوب واسمك وعباس وعبد الزهرة وحسين نقل بالساتر المتقدم انت من تكريت واسمك يزيد معاوية سفيان سطم سطام ريكان بكر عمر انت مكانك بالمقرات بغداد لو بالخلفيات متسمع طلقة ..

الي ميعترف بهذه النقطة طائفي للنخاع ..

8.القيادة مخلية وراك فرق اعدامات لان انت خائن مجوسي صفوي عجمي شيعي حتى لو انت تحارب ايران ومخلي صورة صدام بيتك ههه

9.الحرب ست اشهر وتطلع ثمن سنين الا شهر ونص تاكل كل عمرك ويموت بيها اما انت او اصدقاءك واقاربك وجيرانك

10.جثتك تبقة بارض الحرام تتفسخ وتضل لحد 2018 ويطلعون القلادة يلكوك رفات واهلك ميدرون بيك ..

11. اسمك طالب شارد من العسكرية حتى ما يسحبوك للموت ورى متتخرج حتى لو طبيب او مهندس ويسحلوك للجبهة من الياخة .

12.مبطل من الدراسة ومنتظر يسوقوك للجيش غصبا عنك وعن اهلك .

13. هارب فرار والحزب يلاحقك ويداهم بيت اهلك كل 72 ساعة ليلا وفجرا وظهرا ليعتقلك واذا اعتقلوك يعدموك بالملعب الاولمبي والناس تصفك غصبا وتهله الرفيقات ورى ما يتم تصفيتك وممنوع تسوي فاتحة وياخذون خمسين دينار فلوس الطلقات الي عدموك بيها ..

14.متخلف عن الالتحاق وخاتل بيت بيبيتك متطلع 24 ساعة لان تنعدم .

15. ياخذون ابوك قاطع جيش شعبي وهو شايب ويتاسر بالفاو.

16 يستدعوك احتياط وانت ستوك متسرح ويجلبون بيك ثمن سنين .

17. تطلع للسعودية تجاوز تشتغل راعي صخول وغنم وبعران .

18.تنزل مجاز تلزمك 50 سيطرة تنزلك وتحقق وياك احتمال مزور وهارب .. حتى يعتقلوك .

19. منتظر تخدم 8 سنوات يالله تتسرح .

20. بالتسريح صدام يجيت على الكويت ويمددون خدمتك .

21. تنتقد النظام يسمعك حزبي يكتب عليك تقرير انت سبيت السيد الرئيس القائد همسا ويعتقلوك بالامن وتروح معدوم لو مسجون وشابع دك .

22. ياخذوك تشتغل سخرة مجهود حربي ومينطوك فلوس .

23. يفرغوك من وظيفتك وعدل وكبل للجبهة المحترقة ويستلم مكانك واحد مصري ويكلولك اذا تحجي ويا كانك متجاوز على صدام

24.يصير هجوم بالقاطع مالتك اهلك امك وابوك اخوك ميعرفون بيك ميت عدل متصوب يسافرون وراك للحدود ينتظرون خبرك يسئلون بالجنود مثل المتهستر تعرف فلان ابن فلان ويكرون السؤال 100 الف مرة .. حتى يعرفون بمصيرك .

25. ينتظرون الجثث 150او 200 جثة ويبحثون عنك ويتمنون ان لم تكن واحد مهم وتجد اقارب او جيران او ابن مدينتك صدقة مستشهد واهلة ميدرون بي وانت تنقل الخبر الهم من ترجع لمدينتك .

26.تجي سيارة وحدة وعليها تابوت وتتوقف امام مقر البلدية والامن يسئلون عن عنوان والكل تتمنى ان هاي السيارة ما تتوقف في بابهم .

27.يجيبون جثة يسلموها لاهلك وانت اسير حرب وميعرفون بيك .

28.تتاسر وترجع انت بعد 15 سنة بالاسر وتلكي زوجتك تزوجت واحد ثاني لان انتضرتك 10 سنين وياست من ان تاتي وطلبت ان تطلق غيابيا ..

29.تخلص الحرب براسك تدخلها شاب وتطلع شايب وتسرح ماكو اي شغل او عمل ..

30.تلتحق منا للمحرقة وبجيبك شهادت التخرج متعرف ترجع او لا وتشوف المصريين يفترون بالاسواق ومفتحين محلات ووظائف والمفروض هي مكانك .

31.ثلاثون فقط واكتفي بذلك القدر وهناك مليون نقطة.

كم انت جميل ايها الزمن .. اللعين

الثمانينات التي حقق الخليج بها طفرة ونحن تراجعنا نصف قرن الى الوراء ..

هل فاتني شيئ ؟ نعم فاتني الكثير الكثير جدا ثلاثون نقطة من اصل مليون ثلاثون نقطة تشرح حالات كارثية في الثمانينات ..

كم عانينا ونعاني وسنعاني من اجل المعاناة حتى يخرج جيل جديد يعاني ..

#احمد_السلامي