بقلم:

بلويري فردوس 

سلام عليكم ، اليوم تحت واحد الحملة بغيت نسميها (كورونا فايرس كوفيد-19ليس مزحة) ،المرجو من جميع الناس اللي غايقراو هاد المنشور ايبارطاجيوه على اوسع نطاق على الله وعسى نشرو شويا ديال الوعي حيت راه مشكيلة كبيرة ملي تقول الواحد نقص من الخروج وتجمعات الخاوية ديال المقاهي ويقولك ماعندو مايوقع لي و لا تقولو غسل يدك بصابون يقولك نتا فيك الوسواس واش اعيباد الله ماكتقراوش الجرائد والاخبار وآلاف الناس كتموت فنهار والفايرس دخل البلاد ونتوما مازال مابغيتو تفيقو و تلقا واحد خارج اتقدا خارج عائلة معاه و ديرو علقكوم راه غتندمو من بعد ، وراه حشومة واحد كيوعي فيك على مصلاحتك وحياتك وانتا داير فيها بطل ، اكيد الله يحفظنا ويسترنا وينجنا من هاد الوباء ولكن راه الله قالك خود بالأسباب ،ماشي انتا كتقيل دور فالزناقي والسوبرماركتس و المقاهي والمولات و تسلم على هاد وتبوس هاد وتقولي اوا الله يحفظ واش لاباس ابنادم ؟!الا مكنتيش كتخاف على راسك خاف على عائلتك اللي معاك على ناس لي قراب ليك.

المهم رجاء النصائح التالية تؤخذ بعين الاعتبار نتمنى يتم تطبيقها حتى لي ماقراش تعليمات وزارة الصحة نعاودهم ليه مع بعض الإضافات :

-تفادي التجمعات والاماكن العامة قدر الإمكان الا في حالة الضرورة (اوا راكم عارفين ضروري من ترفيهي ⚠️)

-المواظبة بشكل مستمر على تنظيف اليدين بالماء والصابون 

-تفادي لمس منطقة الفم والانف و العينين باليدين 

-السلام باليدين او العناق ممنوع منعا كليا ، فهذا يؤدي الى العدوى المحتمة في حالة اصابة احدهما .

- الحفاظ على مسافة (متر) على الاقل بعيدا عن الاشخاص ،او تغطية الانف والفم في حالة استحالة القدرة على الحفاظ على المسافة أعلاه (حالة ركوب الحافلة،السيارة .......).

-ملازمة قفازين في حالة شرائكم لاي منتوج (فانتم لا تعلمون من لمس المنتج قبلكم).

- يمنع منعا باتا مشاركة اغراضكم مع اي شخص حفاظا على سلامة الجميع 

-امتنعوا في الفترة الحالية عن تقبيل الاطفال و الرضع تفاديا لاي حالة عدوى 

-لا يعد من الضروري ارتداء الكمامة للاشخاص الغير مصابين(بل قد يكون سبب في الاصابة بالعدوى)

-في حالة ظهور اي اعراض مشابهة اعراض الاصابة بالفايرس المرجو عدم التماطل و الذهاب الى اقرب مستشفى.

-تعقيم الاشياء التي تلمس باستمرار (مقابظ الابوب, كؤوس الماء........) 

-اهم شيء هو توعية الاشخاص من حولكم ونشر هذه المعلومات على اوسع نطاق ممكن.

للاسف حنا ماعندناش شي حاجة سميتها الوعي والتربية الوقائية لذلك هاد النشور فرصة نوعيو بيه ناس ، مابغيناش نوصلو مرحلة نشوفو حبابنا كيموتو قدام عينينا و نتوما عارفين مزيان وضعية الصحة فالبلاد و المستشفيات كيدايرين لذلك الوقاية خير من الف علاج ، (كوفيد -19)، فايرس كيستهدف المسالك التنفسية بالدرجة الاولى و فترة حضانة الفايرس تقدر ب 15 يوم لذلك ماتقوليش هادا ممريضش وهادا مريض حنا ماعرفين والو اقدر اكون حداك واحد مريض ونتا ماعرفش هاد علاش التعليمات اعلاه هي وسيلة تحميك ،الموضوع مافيهش حشومة و لا هاد كنعرفو مدلي يدو منقدرش نقولو سمحلي ،اولا متقيسش ليا حواجي اولا بعد مني وخلي مسافة اللهم تقولو ولا تبقى تايجي واحد نهار لي تندم فيه علاش مسمعتيش للهدرة و قصحتي وجهك. الموضوع ماشي مزحة وناس ما كديريش الحجر الصحي بدون هدف ، (الحجر صحي هو تسد عليك باب دارك وماتخرجش الا فالحالات الجد ضرورية) الحصيلة ديال عدد الإصابات المؤكدة ، في تزايد والمشكل أنها ارقام تقدر تكون خاطئة حيت ماعندناش الامكانية ندوزو على المغرب كولو واحد بواحد ونديرو test لكلشي مما يعني انه يقدر اكون بناتنا ناس مصابين ،الناس ليبانت الاصابة ديالهم دخلو المغرب ما بين شهري فبراير ومارس و ما كان باين عليهوم والو تالبارح ، هادشي مكنقولوش باش نخلعكوم انما باش تخدو الحذر ديالكم كاملين عندنا ناس كنبغيوهم وبغينا نحميهوم ،اذن بداو من دابا الموضوع اصبح مقلق و الوضع غادي وكايتفاقم، و رجاء الاول الدعاء والصلاة ولكن الجانب الوقائي والوعي والتحسيس امر في غاية الضرورة حاليا، (كان بامكاني نكتب بالانجليزية او الفرنسية ولكن كتبتو بالدارجة باش ايوصلكم كاملين حيت بنات ولاد البلاد أولى,اوحيت حنا خوت فالاسلام ومابغينا لتاشي مسلم ايتضرر ، ربي يحفظنا ويحفظكم اينما كنتم و انشاء الله نتغلبو على هاد الوباء اللي ولا جائحة عالمية (يعني انه وباء عالمي حيت تجاوز الصين ودول اسيا ودابا ولا تقريبا في جميع دول العالم) المرجو اتباع التعليمات حفاظا على سلامتكم ومن تحبون و شكرا.