من أهم عاداتنا وتقاليدنا ف العيلة كلها هو التجمع قُدام شاشة التلفزيون مع جميع المقرمشات و”الذى منه” للقعدة علشان نتفرج على جنازة والصلاة على أحد القادة العرب ، والإستمتاع بمراقبة القادة العرب ف الصلاة ونشوف مين بيبُص للكاميرة ومين بيضحك ومين مش عارف بيبُص ناحية مين ومين مش عارف بيعمل ايه ..

فضلت اسأل نفسى كتير ، هل القادة العرب دول وهم واقفين ما بين يد الله كده وهم بيصلوا ف خشوع تااااام ، مش عارفين إنه ممكن ياخدهم ويريحنا منهم ف أى وقت ؟

مش عارفين إنهم ف يوم وفى أى لحظة ممكن ربنا يخطفهم من بين كل الأمن والحراسة اللى حواليه ؟ من بين كل الجيش والنظام الفاسد اللى بيسند عليه ؟

مش عارفين إن كل اللى بيعملوه فى شعبهم ده هيطلع عليهم فى يوم لو مش مننا هيبقى من اللى خالقهم وكاتبلهم يمسكوا المناصب دى ؟

مش عارفين إنهم ف يوم م الأيام هيتعمل فيهم كل اللى بيعملوه فينا ؟ فاكرين إن لسه فيه حاجة إسمها الله هيحسابهم على كل حاجة بيعملوها ؟ على كل كلمة بيقولوها ؟ على كل خطاب بيقولوه ويضحكوا بيها علينا ؟

اسئلة كتيرة من دى بدأت تدور ف دماغى ، هل الحكام العرب بيفكروا ف كده ؟

هل إنت نفسك بتفكر ف كده ؟ عارف إن ربنا هيحاسبك على كل اللى بتعمله ف شعبك من ضرب ونهب وقمع وإنك تاخد منهم أقل حاجة عندهم وهى الكلام والتعبير عن الرأي ؟

هل إنت شايف إنك لما تدافع عن نظامك وكلابك وتطلقهم علينا وتطلع تقولنا إنى بدافع عن الوطن الغالى إننا هنصدق ؟ إن ربنا هيصدق ؟ إن إنت كده ف السليم وبتعمل الصح ؟

عمرك ما بصيت لنفسك وفكرت للحظة .. لحظة واحدة بس إنك اللى بتعمله ده اللى هيجيبك الأرض زى ما جاب غيرك وكان (أصيع) منك كمان ف المجال ده ؟

مشكلتك دلوقتى هى أصعب من مشكلة اللى قبلك ، اللى قبلك ماكنش بيسمع ، ولما بدأ يسمع .. سمع متأخر أوى ، سمع وهو على حافة الجبل خلاص وبيقع هو ونظامه.

لكن إنت بقى مشكلتك إنك مش بتسمع ولا بتشوف وكمان أهبل وغبى ولحقت النظام القديم ده من الأنهيار

تقدر تقولى شعورك ايه وإنت بتبقى سبب فى إن أم تفقد إبنها أو ست تبقى أرملة او طفل يبقى يتيم ؟

مشكلتك إنك موهوم زى اللى كان قبلك بشوية ناس حواليك مطمنينك.

بس أنا عايز أقولك على حاجه !!!

سيبها بدل ماتسيبها زى كتير ف دول تانية حاولوا يعملوا زيك بس ماعرفوش ، سيبها علشان كان غيرك أشطر .

سيبها علشان زهقنا ، زهقنا من الفقر والجوع والذل وشماعة الإرهاب اللى بيشيل ذنبه وذنبك وذنب كلابك ..

آه على فكرة ..

نسيت أقولكوا إن الكلام ده موجه لـ بشار الأسد واللى بيعمله ف سوريا ، إحنا رئيسنا ربنا يحفظه لينا زى الفُل ومافيش زيه .. الحمد لله ، ألف حمد وشُكر ليك يا رب ، يا رب كل الرؤساء كانوا زى الحاكم بأمر الله المعظم عبد الفتاح السيسى

هييح .. المجد للشهداء اللى ماتوا ويا عالم هيموت غيرهم بعد ما تقروا الكلام ده ولا لأ ؟