البنت  بشكل عام  ليها دور كبير  في المجتمع , هي  الأم  والأخت  والزوجة . هي الحبيبه  والصديقة والمربية  والمهندسة والطبيبة , هي الل وصلت لدرجة وزيرة ورئيسة وزراء وقاضية ومستشارة ومحامية .

البنت هي الل بتجيب الولد  أيآ كان معنى الكلمة  سواء كان القصد  أنها الأم التى تنجب الولد  أو كان القصد  أنها  البنت اللى بيجيلها الولد  لخطبتها , فهى فى كلتا الحالات  تدور الجملة نحو  معنى واحد  وإن دل هذا المعنى فأنه يدل على عزة وكرامة  البنت  , فهى  أساس كل شىء فى الحياه  عززها  الله سبحانه وتعالى  ورزق بها  الرسول صلى الله عليه وسلم   .وقيل فى القرآن والسنة بأن من رزقه الله ببنت وأحسن تربيتها فسوف تكون هذه البنت سبب في دخوله الجنه . 

ولكن لدي وصف آخر للبنت  فمن وجهة نظري البنت مثل الوردة  الجميلة المزهره  التى لها رونق خاص بها  يختلف من نوع ورد  لآخر  ومن لون لآخر   ومن رائحة لأخرى . فملثما يتم تصنيف الورد  يتم تصنيف البنت . فالبنت  هى رمز العطف والحنان  . ذات القلب  البريء  ,والعقل المدبر  , والشخصية القوية القادرة على تحمل المسؤلية ,وشعلة النشاط التى بإمكانها  تغير المستحيل لواقع  .

فمن حقها أنها تستمتع بحياتها  وأنها تثبت ذاتها فى أكثر من مجال  بداية من المجال الدراسي  والحياه المهنية  والحياه الأسرية  فى كونها أم ناجحة ومربية لأطفالها , أو فى  مجال  الهوايات وممارسة  أنواع الرياضة  التى تهتم بيها .  بس  المشكلة  إن البنت فى مجتمعنا الشرقى بتدي أكثر ما بتاخد  , واجباتها بتكون قد حقوقها  ثلاث أو أربع مرات  تقريبآ . ونظرة المجتمع ليها بتبقى وحشة جدآ  لو شافوها بتعمل اللى يسعدها   خاصة  لو كانت بتلعب مزيكا  أو بتمارس رياضة معينه  وهى محجبة مثلآ  , من هنا بقى بيبدأ النقد ليها ولشخصيتها  وبيدخل اللى ليه الحق  واللى ملوش   وبيقول رأيه  وبالتالى بينتشر الكلام والنقد  وبعدها ندخل في مرحلة  دى واحدة طايشة ياعم  متتحملش مسؤلية  خااااااااالص  .

طيب نيجى لسؤال  أنت تعرفها  عشان تحكم عليها بأنها طايشة ؟ 

أنت اتعاملت معاها اصلآ عشان تنتقدها ؟

الاجابة هتكون .... لأ 

طيب طالما متعاملتش معاها  ولا تعرفها  ولا تعرف ظروفها , يبقى  ليه  تتكلم عليها فى  غيابها وتطعن فى سمعتها  ؟  

معندكش رد !! صح ؟ 

ايوة معندكش رد وهتفضل ساكت مش لاقى رد لسؤالى  لأن أنت من جواك عارف الفرق بين الحرام والحلال  , عندك يقين  أن اللى بتعمله  دة غيبة ونميمة  , متأكد أنك بتطعن فى سمعة البنت لأنك مش عارف تبقى  زيها . فنصيحة  أرجوك خليك فى حالك  وركز فى حياتك ومتحشرش نفسك فى الشىء اللى مش يخصك  وسيب الناس فى حالها  . 

ليه مفكرتش بتفكير إيجابى لما شوفتها  بتعمل أكتر من حاجة فى نفس الوقت  , وقولت لنفسك  دة حقها   إنها  تفرح نفسها بنفسها وتخرج من الاكتئاب اللى مسيطر عليها  سواء ببمارسة هواية أو رياضة  وليه مكنتش واقف فى صفها  أنها تاخد جزء من حقوقها وهو الحرية ؟ طيب ماتيجى بينا نفكر هى كدة بتعمل شىء غلط ؟ أو حرام ؟

هنتكلم الاول فى نقطة الغلط وهنقول إن الغلط هو الشىء اللى نتيجته هتكون مضره للشخص ولمجتمعه . طيب ياترى هى كدة ضرت نفسها أو مجتمعها ؟

الاجابة ... لأ بالعكس هى فرحت نفسها ودورت على الحاجة اللى بتسعدها واللى ممكن بعد ماتعملها هتقدر أنها ترجع لشغلها تانى بطاقة ايجايبة أكبر من الاول وتساعدها أنها تبدع أكثر فى مجالها .

تمام نيجى بقى نتكلم فى نقطة الحرام .. وهنقول إن الحرام والحلال دة عبارة عن علاقة بين العبد وربه ومش من حق أى حد فينا أنه يتدخل ويقول على الحلال حرام أو على الحرام حلال .

متتغرش فى المنظر والهيئة أو التصرفات لأن الحياه مش بتتقاس باللبس ولا بالشكل ولا بالتصرفات ,

أعرف ناس كتيره ملتزمة فى لبسها بس من جواها مش كويسين , وناس تانية بتلبس على الموضة بس علاقتهم بربنا قوية جدآ .

كل الكلام اللى فات مينطبقش على كل الناس ,لأن صوابعك مش زي بعضها , وزي مافي الحلو في الوحش . زي مافي ناس بتنتقد البنت فى ناس تانية بترفع من شأنها .

ناس كرست حياتها وكتابتها وقلمها بس لنصرة البنت , وأكبر دليل هو الشاعر العملاق رحمة الله عليه (نزار قبانى ) هذا الإنسان الذى انتحرت أخته أمام عينيه عندما رفض أهلها من أن تتزوج بالانسان الذى أحبته وفرضو عليها أن تتزوج من آخر . قامو بحرمانها من أبسط حقوقها في إختيار شريك حياتها ونظرآ لأنها إمرأة حرة لم تستجب للواقع .

أرجوكم قبل ماتحكمو على شخص لازم تتعاملو معاه الاول . لازم تعرفو ظروفه ومتاخدوش بالمظاهر لأن المظاهر خداعة . ومتيجوش على حق البنت أو تظلموها لأن البنت وردة بلدى جميلة رقيقة لو أهملت فيها بتذبل وتموت .

رزقنا الله وإياكم القرب من الله .