كُنا دايماً بنسمع كلام كتير من نوع فين جيل زمان لما كنا بنحترم بعض وفين وفين وفين ...

وإن البلد دى باظت الشباب مش بيشتغلوا ولا بيخافوا على بلدهم زي زمان وخاصة قبل الثورة ، بس إكتشفت برضه إن الكلام ده كله لسه بيتقال لغاية دلوقتى ، بيتقال إننا بوظنا البلد وبنهرب منها ومابنخفش عليها ..

وطبعاً إنت مستنى دلوقتى إنى أكتب كلمتين أدافع عنك وأقول إنك اللى مظلوم فى البلد دى وإن المسئوليين هنا مش بيدوا الشباب اللى زيك فُرصة كويسة علشان يكونوا مستقبلهم ويفيدوا البلد بحاجة ، وإن اللى بيتخرج بشهادة كويسة مش بيشتغل ، وإن بقى عندنا أزمات أكتر من عدد سكان القاهرة تقريباً .. ده اللى مستنيه أقوله صح ؟ مستنين أقول إن العيب ف البلد مش فيك ؟ العيب ف المسئولين مش فيك ؟ العيب إنك عملت ثورة بس غيرك مارضاش يكملها ؟ عايزنى أقول إنك المظلوم ؟ طيب ..

ايه رأيك لو قلتلك حل لكل المشاكل دى وجبتلك فرص شغل كتيرة تكون من خلالها مستقبلك وتنهض ببلدك إنت وغيرك وتفيدها ؟

يرجى إتباع الخطوات الآتية :

1- أدخل نام وإنت مقرر إن بكرا هتنزل تدور على فرص العمل اللى مستنياك ف كل مكان ف بلدك المليئة بخيرات الله كلها.

2- إصحى من النوم على آذان الظهر تقريباً كده وقوم من سريرك وكلك نشاط وحيوية ومستعد لـيوم جديد فى تغيير بلدك ..

قوم روح إغسل وشك بشوية ميه من مياهنا النقية والخالية من البكتيريا والحاجات اللى مش موجودة عندنا دى ، وطبعاً هتسمع الكلمتين بتوع كل يوم من والدتك ووالدك بس ماتخدش ف بالك ، هم بيرفعوا من روحك المعنوية وبيحفزوك أكتر علشان تكمل اليوم بنشاط ..

3- إلبس أحسن لبس وأغلى لبس عندك ، إنت برضه رايح تدور على شغل وتنهض ببلدك .. لازم تكون لابس حاجة عليها القيمة.

4- إنزل وقابل كل معارفك ف الشارع بــ نفس ذات الإبتسامة اللى إبتسمتها من شوية لوالدك ووالدتك وروح لأكبر وأفخر محل حلويات وجاتوه من الغالى علشان تحلى روحك وأنت ذاهب فى رحلة طويلة لتنهض بالوطن الغالى العزيز الجميل ، ويفضل لابوار.. وماتسترخسش حاجة علشان تحلى روحك كويس برضه.

5- روح تحت بيت صديقتك اللى واعدها إنك تتجوزها وتعيشوا ف تبات ونبات وتجيبوا صبيان وبنات وروح معاها لأفخم مطعم ف البلد كلها وإطلٌب أحسن حاجة ف المطعم على شرط إلا تقل الفاتورة عن 700 جنيه تقريباً يعنى.

6- بعد ما تروح صديقتك تانى البيت ، روح إشحن كارت بـ 25 أو 50 يا سيدى مافرقتش ده إنت برضه بتحاول تحلى روحك لسه علشان تكمل مسيرة الوطن ، وبعد خصم الـ 12 جنيه اللى عليك للشركة اللى إنت تابع ليها .. كلم صديقتك مرة تانية وإطمن عليها بشرط إلا تقل المكالمة عن ساعة و9 دقايق و13 ثانية تقريباً برضه.

7- روح لأصحابك ، أصحاب الخير والفئة الصالحة المظلومة من المجتمع اللى شبهك كده مع خالص التقدير والاحترام ع القهوة او الكافيه شوب وإطلُب أغلى حاجة برضه ويفضل عصير كوكتيل أو (زبادى خلاط) علشان تحلى روحك يا أخى.

8- إخرُج مع أصحابك ف كل حتة ف البلد بالعربية الفخمة واخرج مع بنات وإبسط نفسك ، ده إنت يا راجل لازم تبسط نفسك قبل ما تروح تكمل مسيرة الوطن .

9- إرجع بيتك وإنت مبسوط وفرحان وكلك حيوية ونشاط نفس اللى كانت فيك من الصبح برضه ، وروح على سريرك مرة تانية ونام وإنت مقرر إنك بكرا هتنزل تكمل مسيرة الوطن .. وإسترخى غداً يوماً أفضل إن شاء الله.

المجد للشهداء اللى سبنا حقهم ومسكنا فى بعض