"تكنيك الاسلوب"

كانت دايما جملتي الشهيرة والي حاليا بيقتبسها كثير من اصدقائي والي كمان اديت عليها محاضرات في التنميه البشريه هي

"الموضوع جاست برزينتيشن "

لو طبقت الجمله دي في حياتك كفرد هتوصل ببساطه لكل الي انت عايزه سواء صح او غلط

لو عايز حاجه من حد او عايز ترفض حاجه معينه ومن غير ماتزعل حد يبقى لازم نستخدم هذا التكنيك جاست برزينتيشن

علشان نبسط الفكره نقول شوية قصص استنادا لقوله تعالى ((فاقصص القصص لعلهم يتفكرون)) الاعراف 176

من هذه القصص ماهو مقتبس واخر حضرته بنفسي

1-واحد أعرفه بيقولي وأنا راجع من كليتي مرة شوفت حادثة حصلت قدامي وأنا كنت حاضر كورس إسعافات أولية فدخلت وسط الناس عشان أشوف الشخص اللي اتصاب وبمجرد ما طلعت الـ gloves- الجوانتي بتاع معمل الكلية لاقيت الناس بتقول وسعوا الدكتور جه ! فبقيت أأمر الناس اللي يتصل بالإسعاف واللي يجري يشتري شاش وقطن ومطهر من الصيدلية واللي يجيب مقص والناس كانت بتنفذ كلامي فورا بدون تفكير، والحمد لله قدرت أعمله الإسعافات بدون إزعاج أو فتي من الناس، وربنا سترها، ومن ساعتها أدركت إن الجوانتي أبو 2 جنيه أهم شيء اتعلمته في كورس الإسعافات.

.

2-قرأت من يومين عن اتنين لبسوا الجاكت البرتقالي اللي بيلبسوه عمال البناء أو النظافة، إلخ، اتفاجئوا إنهم يقدروا يدخلوا أي مكان تقريبًا بدون ما أي شخص يسألهم عن هويتهم أو أي حاجة. قدروا يدخلوا مسرحية وحديقة حيوانات واحتفالات ومناسبات كبيرة، وفي الآخر جربوا حظهم في حفلة لColdplay في استراليا ونفعت ودخلوا بدون ما حد يسألهم عن أي حاجة. الأمن والناس افترضوا أوتوماتيكيًا إنهم عمال أو حد تبع المكان.

.

في حياتك اليومية وتعاملك مع البشر لازم تكون متأكد من حقيقة إن بنسبة كبيرة جداً مظهرك الخارجي المنمق وثقتك في نفسك ونظراتك ونبرة صوتك ومشيتك الواثقة وبعض الجرأة والمعرفة البسيطة أهم بكتير من الورق والإثباتات، وده اللي خلاني أقدر أدخل كلية الطب بمجرد ما حطيت البلطو الأبيض على دراعي ودخلت وانا بتظاهر إني بنهج وجاي جري عشان ألحق الإمتحان وأما اتسألت عن الكارنيه قولتله نسيته ومسحت عرق مش موجود وبصيت في الساعة بتوتر مقصود فدخلني فوراً من غير ما يقول كلمة زيادة .. ده اللي خلى صاحبي يقدر يدخل كلية الهندسه ويحضر أي محاضرة تعجبه بمجرد ما جاب مسطرة T من قريبه المتخرج وكل مرة يدخل بثقة تامة وباصص قدامه فمكنش حد بيسأله على كارنيه أصلا! .. ده اللي خلى صاحبي التاني يدخل الإيفنت أبو 200 جنيه ببلاش بمجرد ما لبس بدلة ودخل على الأمن بكل ثقة وقالهم أنا واحد من المنظمين والـ Speakers وعمل نفسه بينادي على صاحبه اللي جوا المبنى فالأمن اعتذروله إنهم أخروه ودخلوه على طول! .. وده اللي تسبب في اختراق أنظمة أمنية كتير جدا بنفس المبدأ فيما يعرف بالهندسة الإجتماعية .. وده اللي خلى الناس تقدم الراجل أبو دقن طويلة وجلبية عشان يصلي بيهم إمام وهو مش حافظ آيتين في القرآن .. وده اللي جعل دي كابريو في فيلم catch me if you can يقدر ينتحل شخصيات مختلفة من دكتور ومدرس ومحامي وطيار بدون ما حد يكشفه .. وده اللي خلى بعض الرؤساء المعاتيه يفوزوا بالإنتخابات.

.اخيرا انا حاليا بعمل ماجستير في الكيمياء الطبيه بدخل اي كلية في الجامعه بالعربيه بتاعتي بنفس الفكره والاسلوب واخر مره وانا داخل كلية العلوم بس كان على رجلي من البوابه بتاعة علوم قالي خش من بوابة الطلبة علشان تتفتش قولتله انا دكتور قالي كارنيهك ان سمحت قولتله طبعا طلعت البطاقه مكتوب فيها حاصل على بكالوريوس العلوم قالي حضرتك فين دكتور دي فرحت متنرفز وقولتله يعني انت عمرك شفت دكتور مايكونش متخرج نكتبهالك طالب يعني؟؟؟

قالي اسف والله يادكتور اتفضل انا لسه جديد

وده بيفكرني لما رحت ازور حد في السجن فقولتلهم لو كنت جبتلكم اثبات الجنسيه الالمانيه كنتو دخلتوني على طول راح جالي امين شرطه قالي (اش ليبدش ) وده اسهل كلمتين في الالماني ومعناها انا بحبك

قولتله (اش اوخ ) يعني وانا كمان

قالي اتفضل ياباشا اسفين عالتاخير

طبعا دول الكلمتين الي اعرفهم في الالماني

فلو كنت تجيد فن المظاهر وتستخدمه بما يرضي الله، سيدهشك مدى سذاجة أغلب البشر وسيزداد يقينك بقول من قال أن: المظاهر خداعة.ومن قال ايضا جاست برزنتيشن