سلام عليكم خوتي , ليوم جيت نهضر على واحد لموضوع مهيم ومكهرتش تاخدوه بجدية و تحسو بيه فالداخل ديالكم و كنتمنى يحرك فيكم شي حاجة ومتبقاوش غير ساكتين مكديرو والو حاولو توصلو معانا هادشي لناس أخرين لي مكيعرفوش مواقع تواصل بحال الفايسبوك ... وكل واحد يوصل بطريقة ديالو الخاصة لي كايكتب يكتب لي كايرسم يرسم لي عندو شي حاجة كيتميز بها يوصل بيها هاد لميساج ولي معندو والو يعونا غير ينشر الموضوع ويحاول يناقشو مع دارهم مع صحابو باش توصل الفكرة , مهيم الموضوع ديالنا غنهضرو فيه على واحد فئة معينة من شباب ولاد شعب دراري من نخبة لي كتستعمل 'الفايسبوك' وكتفاعل فيه بشكل كبير وكاين فيهم لي محتارف فمجال الإعلاميات بلاما يقرا فمدارس متخاصصة فهاد لمجال غير تقاتل ودار مجهود بذكاء ديالو قدر يولي محتارف وحسن من شحال من واحد قاري على هاد المجال وهدا غير مثال بسيط حيت هذ شباب فيهم ناس كيديرو الفن ناس لي خدامين و بولادهم وكين لي كيتجاوز السن ديالو ربعين سنة  وكينين ناس يقدرو يديرو أي حاجة باش يلتاحقو بهاذ شباب , المهيم باش منطولش هاذ دراري خلقو دولة ديالهم فالعالم الإفترادي باش يعبرو على رأي ديالهم ويوصل الأفكار ديالهم , دازو بزاف ديال المراحل لا داعي لذكر ديالهم إحتراما لسرية لي كينهجوها وفالأخر تجمعو ودارو مجموعة فايسبوكية سموها  "إمبراطورية هيروشيما العظمى" .

" إمبراطورية هيروشيما العضمى " وكتستحق هاد لأسم حيت من بعد  أشهر خرجات الأرض الواقع وتجمعو الأعضاء ديالها أو باللغة الهيروشيمية 'الجنود' من كل جهات المملكة وبداو كيناقشو الأفكار ديالهم ونهج لي غادي تمشي فيه المجموعة والأهداف الرئيسية ديالها وفعلا بداو فالتطبيق ولقات المجموعة صدى كبير حتى ولا الحلم ديال عديد من شباب يدخلو الهيروشيما ويعيش الحياة ديال الجنود لي كنقولها و كنعودها خيرة ديال شباب المغربي وكون توفرات ليهم إمكانيات يقدرو يغيرو هاد المجتمع لأحسن ويزرعو فيه روح التغيير و الغيرة على الوطن  و الروجولة ومحاربات الفساد الإجتماعي وسياسي وهدي هيا لأهداف ديالهم وكايسهرو ليل باش يحققوها من خلال الوسائل المتوفرة ليهم كالهجومات على صفحات رسمية لي كتبناها المجموعة كالهجوم الأخير على صفحة رسمية لمهرجان موازين'' وقناة '2m' لي دخلات لينا الأفلام الإباحية تال دار وحشماتنا مع واليدينا من خلال رسائل قوية كتبين على الوعي الكبير لي عند هذ شباب والقضاية لهامة لي كتناقشها المجموعة وقيام ديالها بحملات لي جمعيات كبار ومكيقدوش عليها حملات كتبين على الإنسانية الكبيرة لي كايتوفرو عليها شباب ديال مجموعة لي للأسف كنفتاقدوها فالمجتمع كجمع تبرعات لناس مراض ومحتاجين ومساعدة ديالهم ماديا و معنويا ومن أكبر الحملات لي تبناتها الإمبراطورية هيا تضامن ديالها مع الباعة المتجولين باللغتنا صحاب الفراشة بسبب المنع ديالهم من البيع فالأماكن ديالهم وكين فيهم لي هاز جوج عائلات غير بديك الفراشة المجموعة كتدرس طريقة ديال الحملة وقريب غنشوفها كاملين إن شاء الله وغنكونو معاهم حيت هوما محتاجين لينا و حنا محتاجين ليهم كتر , الجميل فالمجموعة أنها عائلة وحدة دار الكبيرة كلشي فيها خوت كلشي كايعاون الأخر مكينش فرق بيناتهم وعندهم قانون كيحتارموه مكينش لي كايخرقو ولي خرقو كايتطرد مباشرة وعندهم مصطلحات خاص بالجنود لي ولينا كنسمعهم خارج أسوار هيروشيما كنسمعوهم فالشارع وكتوفر المجموعة كذلك على منتوجات خاصة وشباب لي فيها عندهم روح مرحة كبيرة المجموعة عندها شويا دسلبيات حيت تا واحد فينا ما كامل و ناس المسؤولين كيحاولو ينقصوها ولكن المزاية ديالها كتيرة بزااااف ومغديش نسالي لجيت نكتبها كاملة هدشي غير شويا من بزاف .

فالأخر كنقول لناس لي شافو هاد سبيد و الجنود ديال الهيروشيما يعودو لواليديهم وصحابهم على المجموعة باش يعرفو علاش كتبقى قدام ال pc نهار كامل باش يعرفو بلي هذا هو المتنفس الوحيد ديالك باش يعروفو أنا هيروشيما راه أسلوب حياة ماشي مجرد مجموعة عادية باش يعرفو أنها هيا لي كتخلق ليك الإختلاف وكتخليك تحس بيه بمجرد أنك كتقول فراسك أنا جندي و باش يعرف العالم أن الإمبراطورية ماشي الهذف ديالها لأول هو ضحك و لعب بالعكس الهذف ديالها مقدس هو نشر وعي نقي فالمجتمع ومساعدة ناس لي محتاجين وتعامل بإنسانية , وكنبغي نقول أني كنفتاخر بالإنتماء ديال ال هيرو و بكوني جندي وهيرو باقى وتتمدد وغادي نورتوها لولادنا هير هيرو تا تقطع نفس .