نداء من رئيس الجمهوريه للمشاركه فى الانتخابات محدش راح

غرامه 500 جنيه لمن يتخلف عن التصويت محدش راح

الغاء بطاقة التموين لمن لم يشارك فى الانتخابات برضوا محدش راح

عقوبة عدم المشاركه كعقوبة تارك الصلاه مفيش فايده برضوا محدش راح

مستحيل حد يقنعنى ان سبب عدم مشاركة المواطنين فى الانتخاب هو حملات المقاطعه اللى على الفيس او حتى اذا كانت توعويه ومباشره من حد فينا فى الشارع

لكن الحقيقه التى لاتقبل الجدال ان فى ناس كتير بدأت تفهم أو تشغل مخها ولو للحظه فى ساعة تجلى ان كل اللى بيحصل ماهو الا مسرحيه عرجاء أو على الاقل بدأت تعرف ان الموجودين على الساحه الان سواء سياسيين أو اعلاميين ماهم الا اراجوازات تحركهم أيادى الاجهزه السياديه كيفما تشاء

ماهو بالعقل كده مواطن شايف قدامه واحد اعلامى بيوجهه للنزول للانتخابات ونفس الاعلامى الحمار ده كانت فضيحته بجلاجل من كام يوم لما خرج على الناس بلعبة فيديو جيم على انها الحرب فى روسيا يبقى بالتأكيد محدش يسأل ليه محدش راح

أو مثلا اعلامى اخر متخصص فى برامج الدعاره الاعلاميه يطلع منتج افلام بورنو على التليفزيون ويسبه على الهواء مباشرة ويقوله ياعرص وفى الاخر يوجه المواطنيين للانتخاب تفتكروا مين ممكن يسمع منه فبالتالى محدش راح

سياسيين من عينة الكائنات اللزجه تحشد الناس للاستفتاء على الدستور وتتمادى بالقول بانه اعظم دستور فى التاريخ ثم بعد ذلك تلاقيهم طالعين لينا على شاشات التليفزيون وكأنهم تابوا عما فعلوا ويقولوا للناس لازم نعدل الدستور عشان الدستور ده مش حلو مين ممكن يصدقهم تانى وهما بيحشدوا دلوقتى للانتخابات فعشان كده محدش راح

حكومه كل يوم تزود معاشات العسكريين وتفوجئ بوزيره فى نفس ذات الحكومه وهى بتقول ان الدوله لايمكن لها ان تتحمل معاشات الموظفين فى الوقت الحالى وفى الاخر نفس الحكومه بتشرف على انتخابات المفترض انها تجيب برلمانيين يحاسبوها يبقى الطبيعى اننا نلاقى محدش راح

وفوق ده كله ييجى رئيسهم الاهطل اللى عمال يعلن عن مشاريع اقتصاديه ضخمه ومستقبل زاهر وقناة سويس فاخره ويقترض من البنك الدولى قرض بقيمة 3 مليار دولار ومش بس كده ده البنك المركزى نفسه يعلن عن نقص الاحتياطى النقدى قيمة مليار ونصف المليار دولار ده طبعا غير الغلاء فى المعيشه وفواتير الكهرباء التى فى اذدياد مستمر فماذا ينتظر هذا الشعب مره اخرى حتى ينزل ينتخب ؟ وينتخب مين ؟ قائمة فى حب مصر اللى هما متأكدين انها تابعه للرئيس أم ينتخب حزب النور اللى شغال زى الرقاصه كل يوم فى كباريه شكل

لكن الغريبه هنا فى شئ مهم جدا انه لاول مره الكنيسه والازهر لم يحشدوا ، رجال الاعمال لم يحشدوا ، حتى الاعلام المسعور يقول ان نسبة المشاركه هزيله !!

هل نحن أمام برلمان سينحل قريبا على يد محامى بتلاته تعريفه حتى تعود السلطه التشريعيه مره اخرى فى يد الجنرال المجنون ؟

بيتهيألى ان ده رأى غالب خصوصا ان اللى يشوف المشهد من بعيد يعرف ان الجنرال اجرى الانتخابات دى تحت ضغوط دوليه عشان خاطر الديموقراطيه والملوخيه وكده

لكن مش عايزيين نسبق الاحداث لسه فى انتخابات إعاده أكيد فيها الافاده وبرضوا محدش راح

مش حد راح

راح محدش

حد مش راح

حد راح مش

راح مش حد

بكل لغات العالم