قَاهَـرْأحْلاَمْـنَا / زجل مغربي
مالك من دون الناس..؟؟
نشر في 17 ديسمبر 2020 وآخر تعديل بتاريخ 30 شتنبر 2022 .
مَالْكْ دِيمَا مَنْ دُونْ النَّاسْ
حَـامِي دَنْـيَانَـا بـَــعْـوَافـِي
فِـيـكْ الْيُـومْ ضَاعْ رْجـَـانَا
بَعْـدْ مَا يـُومْ كُـنْتِ وَافـِـي
اللّي بْحَالَـكْ مَنْهُـمْ شَـــلاّ
لَكْبِيرْ فِيهُـمْ مَاشِي خَافِي
زَكْـرَمْ بَابُـو زَيَّرْ لَحْــزَامْ
لَكْرِيمْ فِينَا نْحَاسُو صَافِي
دَايَرْخَبْلَة، لْدَمْنَا مَصَّاصْ
قَاهَـرْأحْلاَمْـنَا وِيـــجَافِي
بْنِيتِ مْجَادَكْ بْعَرْقْ الْغِيرْ
وُبْحَرّْالْعِيشْ خَبْزُو حَافِي
بَلْسَانْ الْحَالْ نَاطَقْ بَكْلاَمْ
گُـلْتِ الْوَاجَدْ قَـدْرُو كَافْي
زِينْ قْـوَامْنَا زِيـنْ لـَفْعَالْ
مَاشِي هـَضْرَة وُقْـوَافِـي
رْفَدتْ هْمُومِي بَالْكَمْشَاتْ
نَهْشَاتْ عْظَامِي وُكْتَافِـي
تـْمَنِّيتْ رَبـِّي يِحَـدْ الْبَاسْ
وِيشُوفْ مَنْ حَالِي وِيعَافِي
صالح اهضير / بني ملال - المغرب / دجنبر 2020
-
صالح اهضيركاتب صحفي، زجال، موسيقي وقصاص...