مفيش حد ممرش بتجارب فاشلة ومفيش حد متعرضش للصدمات ومفيش حد محتكش بناس سلبيين بتفكير سلبى وفكر متخلف ومحبط .
وعلى رأى المثل ياما دقت على الراس طبول . وياما هتشوف فى الحياه من أزمات ومشاكل وسلبيات وفشل وإحباط من كل الناس اللى حواليك ,طول مالنفوس مش صافية ,وطول ما الخير دخيل .
الناس في الحياه قلوبها مش صافية مهما إن كانت بتبينلك عكس كدة , مفيش حد مبيحسدش ومفيش حد مبيحقدش ومفيش حد مبيبصش لعيشة غيره ومفيش حد راضي بحاله وكاتم جواه إلا وبيتمنى بينه وبين نفسه إنه ربنا يبدل أحواله .
مش هتلاقى حاجة دايمة .. لا صحابك بتوع ابتدائى ولا بتوع اعدادى ولا اللى شوفتهم فى ثانوي ولا اللى عرفتهم فى الجامعة .
وصاحبك اللى فى وشك حبيبك ,من ورا ضهرك عدوك وزي ماالمثل قال
(فى الوش مراية وفى القفا سلاية )
مهما حكيت لصاحبك همك وألمك وحزنك ,مش هيقدر يخفف عنك ,حتى لو يبان انه زعلان عشانك بس يكاد يكون فرحان داخليا باللى بيحصلك من سلبيات او فشل وخلافه .
صاحبك اللى لو كنت فرحان ورجعتله عشان تشاركه فرحتك ,ميفوتش يوم وفرحتك تزول .
#اسمع_منى ... ومتحكيش همومك لحد غير ربنا .. هو الوحيد اللى قادر يسعدك . #
-
Aya sweidطالبة بكلية الهندسة قسم الميكانيكا جامعة الزقازيق