من حوالي 4 سنين ، عصير Dango عمل إعلان لطيف جدا.. لكن في أول الإعلان كان في موقف، تقريبا بيحصل مع 3/4 الأمهات مع الأطفال .. الطفل ماسك القلم وبيرسم شخبطة على الحيطة بتاعت الأوضة بتاعته، وكرد فعل أي أم لما دخلت عليه : " آدم، إنت بتعمل ايه ؟! " .. لكن الطفل رد بكل تلقائية وقال : " ماما، هي دي شخبطتي، تفتكري ممكن تعمل ايه لو طلعت بره أوضتي ؟! " ..

تصرف الطفل مش غريب علينا أبدا، مافيش طفل ما شخبطش على الحيطة تقريبا! والتصرف الطبيعي من الأم، إنها تشيل القلم من ابنها، وتزعقله! في طفل يسكت ويستسلم ويمكن ما يكررهاش تاني، وفي طفل يلف من وراها ويرجع ياخد القلم ويرسم تاني، السؤال هنا بقى " ليه ؟! " ..

الحقيقة إنه الأطفال بتعمل تصرفات احنا بنشوفها عيب، ونبدأ نمنعها ونفتح باب النصائح الأدب والتوجيهات من غير ما نفسرها تفسير صحيح! ياترى العيب في تصرفات الطفل نفسه، ولا العيب في البيت اللي بيعيش فيه الطفل ده ؟!

البيت بالنسبة للطفل هو العالم " الوسط " اللي بيعبر فيه عن كل اللي بيحبه بتصرفاته _ واللي على الأغلب بنشوفها غلط_، لأنها مش متوافقة مع متطلبات ديكور البيت.

تفتكروا لو كان في أوضة الطفل _ اللي في الإعلان _ مكان يعلق فيها الطفل " رسوماته " أو على الحيطة مكان يرسم فيه، كان هيشخبط على الحيطة؟!

في عالم الديكور، في حاجة اسمها " Passion Corner "، كترجمة حرفية بالعربي " ركن الشغف " ..

الركن ده بيكون في فراغ معماري _ على الأغلب غرفة الشخص _ وبيحتوي على تفاصيل الشئ اللي بيحبه، واللي بتتمثل بالحلم الكبير اللي نفسه يحققه في حياته.

Passion Corner بيبدأ تكوينه في مرحلة الطفولة، لما يبدأ الأب والأم ياخدوا بالهم ايه اهتمام الطفل، أكتر حاجة بيحب يعملها، الحاجات اللي بيمارسها وهو مبسوط وسعيد، وعلى أساسه بيبدأ تصميم ركن خاص بيعكس كل تفاصيل للمجال اللي الطفل بيحبه وبيعشقه.

على سبيل المثال .. الأم " Cathrena " بتقول : " بنتي ( Avila)، كانت بتتحرك وتتشقلب كتير جدا في البيت لدرجة إني فقدت السيطرة عليها، وكانت بتنهكي من كتر ما كنت بفضل اجري وراها، عشان خايفة تكسر حاجة من كتر حركتها.. دخلت في مرحلة اكتئاب، وتذمر كبير من بنتي حتى إني بدأت أكره وجودها في البيت، وأعشق اللحظات اللي بتكون فيها نايمة.

" بنتك بتتحرك بسرعة كبيرة جدا، ممكن تبقى في المستقبل راقصة باليه " دي الجملة اللي قالها شخص لما كنا في المستشفى في غرفة انتظار الكشف، واللي بعتبرها اللحظة اللي نورت بيها حياتي وحياة بنتي. رجعت بسرعة البيت، وبدأت أكون ليها ballerina Corner. ولما دخلت المدرسة، أول حاجة عملتها هي إني اشتركتلها في Ballerina Club.

ومع ذلك، هل كل Passion لازم يكون موجود داخل الطفل ؟!

الحقيقة، أنه مش كل passion لازم يكون داخل الطفل، لكن ممكن الأب والأم يخلقوا جوه ابنهم passion ناحية حاجة معينة، ويبدأ يكوِّن له Passion Corner فيه كل العوامل والتفاصيل اللي تساعد ابنهم على تحفيز الــ Passion ده جواه. الفكرة دي، هتنجح في كل الأحوال، سواء الطفل استجاب للـ Passion اللي أبوه وأمه اختاروه له، أو رفض الطفل هيوَّجه الوالدين للحاجة اللي بيحبها الطفل، وبالتالي النتيجة في النهائية إيجابية.

لو اسقطنا ده علينا، هنلاقي إنه الــ Passion بيبدأ يظهر أو نفكر فيه لما نكبر_ حوالي عند سن 18 سنة_ ، بعد ما نكون تخلصنا من القيود اللي بتتفرض علينا، وده بسبب طريقة التربية، وتقييم الأمور بالنسبة للمجتمع بيفرضه تحت مسمى " كليات القمة " اللي اتحصرنا تحتها، وملايين من الناس بتموت وهي مش عارفه ايه هو passion بتاعها، ولو عرفته ما بتستمتعش بيه أصلا، لأسباب كتير مالناش دعوة بيها.

أما بقى، بالنسبة للفئة اللي بتكتشف الـ passion بتاعها، واللي بيكون إما في مرحلة الجامعة _ بسبب الأنشطة والتطوعات وغيره واللي بتكون طريقة لاكتشاف نفسه_ أو بعد الجامعة لأنه بيكون اكتشف أنه التخصص بتاعه ده مش حابه ولا عاوز يكمل فيه، أو حتى بعد ما اشتغل فحسس بملل الشغل وظروفه، ودي هنلاقي لازم عندها Passion Corner في الأوضة بتاعها.

على سبيل المثال.. في صفحة " دروس أون لاين " كان مصور فيديو تفصيلي _ هحط اللينك تحت_ للأوضة بتاعته اللي بيصور فيها الفيديوهات، بكل ما فيها من تفاصيل صغيرة، وبيشرح مكان وجود كل حاجة في المكان ده بالذات، لدرجة أصيص الزرع اللي حاطه واللي بيظر في الفيديوهات بتاعته، وده دليل على الاهتمام المبالغ بالــ Passion بتاعه. وعلى الأساس ده، الــ passion corner بيكون مستويات، من حيث الفراغ، والمواد والمساحات والماديات..

في البوست الجاي... هتكلم عن أنواع الــ Passion corner ؟... ازاي اصمم passion Corner لابني/ بنتي/ أو حتى ليك إنت شخصيا ؟ امتى يكون الــ passion corner يكون تصميمه مناسب أو لا ؟!

صور لــ ballerina corner من هنا .. 

https://www.instagram.com/yourempire0/

لينك الفيديو بتاع دروس أون لاين .. 

https://www.youtube.com/watch?v=BWiu9HV0SQo

لينك الإعلان ...

 https://www.youtube.com/watch?v=0-uPXFY19pA