بعض الناس لسانها بيعجز😐 أحيانا عن وصف مشاعر جواها والكلام بيكون متلغبط ويتكرر كتير:

انت فاهماني🤔؟ وصلتك فكرتي🤔؟ مستوعبة أنا عاوز أقول ايه🤔؟ مصدقاني🤔؟

هتلاقي نفسك بتسمع وأنت مستغرب😯، يمكن متضايق🙄 من التكرار وأحيانا بتتهرب منهم، لكن لحظة🚫✋في مشاعر جوانا حقيقي مالهاش اسم لكن لها وصف.

⬅️ لما تفاجأ إن ناس حواليك مزيفة مش أصلي وإن ماسكاتهم🎭 يوم ورا التاني بتقع ادام عنيك😯 وبيتكشفوا علي حقيقتهم الوحشة... في الوقت ده بتبقي مش عارف ترفع دماغك😑 من صعوبة الموقف ولسانك بيتخرس يمكن تحكي اللي حصل منهم لكن مااتقدرش تحكي اللي حصل جواك.

⬅️ لما تفاجأ😯 بإنك مش بطل قصة فرحت😃 في بدايتها وقلبك طار من الفرحة💞 كمان لكن فجأة😯 بتعرف انك مجرد كومبارس دوره جانبي أوي... بتدرك أخيرا إنك مش البطل... أنت مش محور القصة... أنت ولا حاجة... مش بس كده دول كانوا بيمثلوا عليك وأنت يا غلبان ماكنتش بتمثل كنت صادق بس اتحور عليك وبخبث شديد اوي.

⬅️ لما تكون متغرب عن ناسك وأهلك وبلدك ورغم أن كتير بيحاوطوك إلا انهم ذي قلتهم... يمكن حضور شخص واحد يغنيك عن كل اللي محاوطينك، بس هو فين؟

⬅️ لما تكون مسجون جوا قصة أنت ماكتبتش تفاصيلها ده القدر لعب لعبته وزرع انسان في طريقك وزرعه جواك، بس القصة لا بتكمل ولا أنت بترجع... من هنا بتغربك أحداثها عن نفسك اللي اتسجنت للأسف بدون حول منك ولا قوة جواها، فلا أنت قادر تخرج للي بتتمناه ولا عارف تكون لغيره.

⬅️ لما تتكسر نظرتك😪 بسبب الخيانة لحبك...لقلبك... لإخلاصك ولعشرتك.

⬅️ لما فجأة وبعد ما كنت شخص محب للناس ومعطاء وصبور وكريم تتغير وتبقي حد تاني لأن وببساطة كل اللي أنت قدمته في سنين طويلة من حب وعطف ودعم وحنان وإحساس واحتواء قابلهم خذلان من العيار الثقيل.

⬅️ لما تندم 😣وتتوجع😔 بسبب مشاعر طيبة وجميلة قدمتها بكامل ارادتك لانسان علي طبق من ذهب وهو باعك بأرخص من التراب.

⬅️ لما يطعنك في مقتل أكتر حد قريب لقلبك ويظلمك لدرجة إنه يموت جواك دفاعك عن نفسك.

⬅️ لما تقرر تكون غير نفسك اللي تعبت من كل ده☝️ وبقرارك بعد ماتفوق من صدمة اللي عشته وسمعته وعانيته بإيد ياما طبطبت عليها.

دي آهات قلوب❤❤❤ تعبت، دي آهات نفوس اتكسرت💔💔💔، عشان كده رفقا بقلوب موجوعة يمكن ماتكونش أنت سبب وجعها لكن تقدر تخفف عنها.

حمول الدنيا تقيلة بس كلمة طيبة ممكن تخفف آهات قلوب موجوعة، سؤال او اتصال او اهتمام أو احتواء بيكونوا احيانا سيارة إسعاف 🚑 وصلت في وقتها.