رغم ان تعلقنا بآباءنا وأمهاتنا كبير حتى بعد زواجنا واحتياج وجودهم في حياتنا شيء مهم جدا ومجرد الكلام معاهم او حضن منهم بيغير مودك كله..

مجرد انك تصحى الصبح تشوفهم او تسمع صوتهم وتسمع عنهم كل خير ده يخليك في حالة نفسية كفيلة انها تخليك تهد صخور وجبال بكل طاقة وتحدي للحياة..

الا ان نفس الجيل ده هو أول جيل ما بيحترمش وجود اولادهم في حياتهم فالمهم عندهم الأنانية - الجشع - الطمع - التدني في الاخلاق - المهم نفسي.. اعتقد لو بصو بكل حب وعاطفة لوجوده في مرحلة بناؤه داخل اسرة لحد ما بقى شخص كبير يقدر يتحدى الحياة.. لو بص حوالية لقى اول لما يمرض اول اتنين يجروا عليه هما احن اتنين عليه ويحس فورا ان ٧٥% من الالم راح اثره.. وقتها هيفكروا الف مره في اولادهم وقت اي قرار ما يخصهمش في الأساس بل يخص أولادهم..

الطلاق مش هو الحل للشباب دلوقتي.. الجيل ده عايز وعي ودين وعُرف.. اكثر منه حلول سهلة وسريعة.. عشان هنيجي بعد كده هنلاقي جيل أصلا لا يهمه مشاعر لا مشاعر تجاه الاباء ولا مشاعر تجاه الأبناء ونخرج اجيال اسوء في كل مرحلة ونوصل للتشتت والتشرذم.. فشتات الأمم يبدأ من داخل البيت ان تشتت البيت بدأت تتمزق الأمم حتما..

اتذكر من ٧ سنوات كان واحد بيحكيلي موقف مع بنت البنت بتعمل اللي هي عيزاه حرفيا طيب امال بابا فين؟ وماما فين؟ وليه مفيش رقيب؟ تقول حرفيا كده انا اصلا بابا مش فاضي مشغولياته ومع مراته مبيفتكرناش الا كل فين وفين ومعندوش وقت.. والأم مع جوزها ومش هينفع اعيش مع جوز امي.. فقالت على طول انت عارف انا مش هتجوز الا واحد زيي لازم يكون باباه طلق مامته.. بيقول اتصدمت سألتها ليه؟ قالت عشان محدش هيحس باللي انا فيه الا واحد مر بتجربه زيي. قالتله لو هتجوز واحد طالع من اسرة متمسكة احنا هنتفكك. لأنه عمره ماهيستوعب اني اصلا محتاجة احس بحنية ضايعة سنين.. هبقى بحسده وانا شيفاه بيروح بيتهم لأبوه وامه مع بعض ويحظى بقبلتين منهم وحضن من اهم اتنين في حياته في نفس الوقت..

- السنة اللي فاتت. حصلت مشكلة كبيرة وكانت المشكلة مع بنت. البنت سرقت مبالغ كبيرة.. وحدثت مشكلات كبيرة لما اتكلمت مع ناس تعرفها قال هترد على مين.. البنت ابوها في دنيا وامها مع جوزها في دنيا تانية والبنت هي اللي مخططة حياتها وماشيه لوحدها تعمل اي حاجة من وجهة نظرها يعوضها النقص اللي في حياتها..

انا معاك توجد اسباب كثيرة للطلاق لا مفر منها.. لكن هناك سبب تافه وعليه معظم هذا الجيل ويكأنك تشعر للحظة انه بقى مذهب.. بقى في مذاهب الطلاق لاسباب العمل وتحقيق الذات ومذاهب الطلاق لأجل كرشه اكبر من كرش جوز صاحبتي ومش عايز يتغير. ومذهب الطلاق عشان بيزعق كتير للعيال. ومذهب هطلقها عشان زهقت منها.. وكلها ماشاء الله مذاهب ممكن تلفها وتحطها تحت رجلك في جيل لايفقه الكثير عن امور حياته فضلا عن انه لايفقه شيء عن امور دينه وبناء الأسر..

#خاطرة_المساء

#محمد_عوض