في وقتنا الحاضر مع تطور التكنولوجيا الحديثة صار الإنسان بسرعة يوصل صوته للعالم و ممكن يصير مشهور بشكل سريع.
هُناك عدة أنواع للشهرة الي نعرفها إحنا لكن مثل ما كلت مع تطور التكنولوجيا دخلت أنواع شهرة جديدة غير ألي نعرفهن يعني ممكن تصور فديوهات ترقص بيها تصير مشهور بدون اي هدف أو غاية ، ممكن بس لأنك حَسن الوجه تصير مشهور و غيرها من أنواع الشهرة الجديدة الي نعرفها.
هسا لازم نعرف هل هذهِ الأنواع الجديدة من الشهرة أثرت سلبياً عن الناس أو لا؟ وشنو السبب؟!
نعم أثرت وبشكل كبير أيضاً الكل صار مهووس بالشهرة لان يشوف غيرة مشهور بدون سبب أو فقط لأنه يرقص ، صار المقابل يحس بنقص داخله ولازم يصير مثلهم ويروح يفتح حساب على تطبيق "TikTok" ويرقص بيه و بدل ميصير مشهور يحصل فقط الإنتقاد والسخرية من الناس .
لازم تكون عندك قناعة تجاه بعض الأشياء الشهرة مو لازم ترقص ، تكدر تصير مشهور اذا عندك صوت حلو أو ترسم..الخ .
ومو بالضروري لازم تكون مشهور مبيها شي اذا كنت على طبيعتك إنسان بسيط وحياته بسيطة بعيدة عن ضجيج العالم والشهرة مبيها شي اذا الأنستا مالتك فقط بي ٥٠ متابع ، الإنسان مينقاس بعدد متابعينه أو الناس الي تدعمهُ و تكتبلة تعليقات، قبل الشهرة لازم تكون مثقف و الشهرة مسؤولية كبيرة لأن لازم تقدم لمتابعينك شي ميأثر عليهم سلبياً ممكن أكو أشخاص يقلدون الي تسويه وبذلك راح يتأثرون بيك وبأي شي تسويه سلبي أو إيجابي.
و قد تُسمى أنت متأثراً من خلال الشخصيات الموجودة على تطبيقات التواصل الإجتماعي فكُن حذِراً في إنتقاء من تتأثر بهِ.
الشهرة حلوة و أن تكون محبوب من الناس بشيء جميل تقدمه بدل الرقص و ترديد الأغاني و زيادة متابعينك بدون هدف.
في النهاية حتى و إن كنت صاحب موهبة مو بالضروري تكون مشهور أيضاً عادي جداً تنشر رسماتك أو أغانيك ومتحصل مشاهدات أو إعجابات كثيرة المهم إنت سعيد بالشيء الي تسويه وتقدمه.
-
Joseph Samiيوسف سامي , عمري 20 سنة أسكن في بغداد , ما أقدمه في كتاباتي هو النقد للحالات الشاذة و السلبية في المجتمع ومحاولة أيجاد حلول لها , يُشرفني وجودك هنا في صفحتي. ويمكنك أضافتي على الأنستقرام : JosephSami