"إيلاف النعمة "

بدون أي اندهاشة 😮 كتير مننا بينسي يحمد ربنا

وغالبا هتلاقي في محيطك بعض الأشخاص اللي يشبهوا أصحابي الآلفين: اللي لما تسألها اذيك اخبارك إيه؟ تقول لك بعد تنهيدة طويلة ونفخة 😤 تطيرك " وقت " أو "ذي كل يوم" أو " أهي عيشة والسلام كلها ملل ومافيش جديد"

طيب ما الحمد لله ان الامور مستقرة ومافيش جديد، يمكن لو جد جديد يزعلك اكتر ما انتي زعلانة😁😁 يا شيخة.

لو غيرت الموضوع مع نفس الشخصية وسألتها عن ولادها هيطلعوا مطيرين أبراج مخها 🙃🤯ولو سألت عن زوجها هيطلع مزعلها😔 ولو سألت عن الأسرة هتكون فلانة اتطلقت 😞وفلان عيان🤕 و س اترفدت و ص اتنقل الواحات.

مش هي بس كمان غيرها شخصيات كتير أسأله عاملة إيه الدنيا معاك؟ هتلاقيه بينفخ😤 أو يقول الحمد لله بلا أي حمد فعلي أو " زفت " .

عشان كده حبايبي الحلوين 😊اللي مش راضيين😡 اللي ناسيين يحمدوا ربنا، إليكم البيان التالي😅:

⭕ قوم سبأ سكنوا اليمن وربنا سبحانه و تعالى أنعم عليهم لدرجة اكتمال النعم، كانوا آمنين المسكن والمأوي... كانت سماؤهم ممطرة... وطبعا ثمارهم يانعة... كانت أرزاقهم حاضرة... وأرضهم مخضرة... رب العالمين مش بس كفاهم مؤؤنة الطعام والشراب كمات كانت بيوتهم🏘 محاطة بالأشجار🏡🏡🏡، بسم الله الرحمن الرحيم:

" لقد كان لسبأ في مساكنهم آية جنتان عن يمين وعن شمال

كلوا من طيبات ما رزق ربكم واشكروا له بلدة طيبة ورب غفورا." صدق الله العظيم

قوم سبأ اتمتعوا بجميل النعم من طيب العيش والمعيشة... الهواء... والماء... والمسكن... والطعام... والأمان... والأهم عفو ربنا عن ماضيهم وكفرهم. لكن ربنا في الآية ذي ما ذكر إنه أنعم عليهم طلب برضو منهم يشكروا 🤲 بس قوم سبأ ألفوا النعمة وأعرضوا عن شكره واستكبروا، بسم الله الرحمن الرحيم:

" فَأَعْرَضُوا فَأَرْسَلْنَا عَلَيْهِمْ سَيْلَ العَرِمِ وَبَدَّلْنَاهُمْ بِجَنَّتَيْهِمْ جَنَّتَيْنِ ذَوَاتَيْ أُكُلٍ خَمْطٍ وَأَثْلٍ وَشَيْءٍ مِنْ سِدْرٍ قَلِيلٍ. " صدق الله العظيم

⬅️ أنعامهم وثمارهم.... هلكوا ومش بس كده نتيجة لإعراضهم أو تغافلهم عن شكره كان غضب ربنا انه فتح عليهم السد وهلكت بيوتهم وأراضيهم.

🚫 بلاش تألف نعم ربنا عليك وتنسي إنك أفضل كتير أوي من غيرك، وإن نعمه تستحق الحمد والشكر مرارا وتكرارا،

✅ صحيح أنت النهاردة ذي إمبارح وأول ويمكن بكرة وبعده بس ده مش معناه:" ذي كل يوم "، "حاجة ملل"، " عيشة والسلام "

في وجهة نظري ده معناه:

🤲 الحمد لله إن في ناس بتتصل📲 تسأل عني ويهمها أمري، أنا مش وحيد في الدنيا...

🤲الحمد لله إني نمت 😴 وصحيت فتحت عيني شوفت نور اليوم الجديد، أنا مش ضرير...

🤲الحمد لله إني بلاقي قوت يومي ولو احتجت فلوس💵 بلاقي عندي في حسابي، أنا مش فقير ...

🤲الحمد لله اني وقفت علي رجلي وصليت وخرجت رحت شغلي، أنا بصحتي مش مريض🤕...

ا🤲لحمد لله إني بتكلم ومركز والناس بتسمعني وتفهمني، مش طريح فراش ولا عندي عرض مأثر علي عقلي وتركيزي...

🤲الحمد لله إني بدخل السرير وقت ما أحب وأغمض عيني وأنام بدون إزعاج، مش محوطاني أجهزة في مستشفي🏨...

🤲الحمد لله إنه رزقني شغل👨‍💻 يضمن متطلبات أسرتي ويكفي احتياحاتي، أنا مش عاطل...

🤲الحمد لله إني بقدر أشتري كتاب 📘وأقراه وأفهمه واتناقش فيه، أنا إنسان مثقف...

🤲الحمد لله إني شخص بيراعي مشاعر وأحاسيس الناس، ده معناه انا إنسان عندي دم😊...

🤲الحمد لله علي حسن الخلق والخلقة...

🤲الحمد لله علي نعمة الضمير وحسن التربية والأهل والأصل والصحة والأمان والأسرة والصحاب والعلم والفهم والحب😍 والفرح😄 والوقت والبصر والبصيرة والوطن وتمييز الصح ✔ من الغلط ❌ والسيرة الطيبة...

🤲الحمد لله علي نعمة الابتلاء😑...

🤲الحمد لله علي النصح والنضج...

🤲الحمد لله علي كل نعمة متمتعين بها وبننسي نشكره عليها.

🚫 بلاش تألف النعمة وتنسي تشكره فتجحدك لكن أذكره وأشكره فتالفك نعمه!

✅ إفرح بنعم ربنا عليك حتي لو هي هي مافيش تغيير ولا جديد، ده دوام النعمة في حد ذاته نعمة.

لما حد يسألك بقي اذيك وأخبار الدنيا معاك إيه، قل له:

الحمد لله 🤲 بقلبك مش بس بلسانك وصدقني:

It's as easy as 1 2 3, as simple as do re mi!

" إيلاف النعمة ينسيك فضله وشكره "

#amira_ibrahim_neues_leben