في كتير ناس بيمروا بحياتنا منكون مضطرين نتركون بإرادتنا رغم أنو ألم الفراق بيكون كبير، بس بيكون أكيد فاق ألم تحمل البقاء معهم. هالشعور بيجيك لما بتحس أنك عطيت كتير لحد وصلت فيه أنو مو قادر تعطي غير الوجع، أنت مو أنسان سيء ولا تلوم حالك أنك عم تكب كل شي ورا ضهرك وتمشي .. أنت هيك كمان عم تضحي بشعورك بالأمان والحب كرمال ما توجع الشخص الي يمكن عم يوجعك خارج إرادتو .. مع أني ما بصدق أنو في حدا بيحب من قلبو ممكن يوجع الي بحبو بقصد أو بغير قصد .. الفكرة يا صديقي أنو الأنسان أناني، كائن ما بيشوف مصلحة حدا فوق مصلحتو، لهيك بيقرر دائماً ينحاز للأفضل إيلو ولو كان في وجع إلك رح يتجاهلو بأي طريقة. مع الوقت رح تعرف شقد كلامي قاسي بس حقيقي، الناس ما بتعرف تحب إذا ما كان هالحب عاطيا شي ولو شعوري، لهيك انوجدت الخيانة .. أنو الأنسان مو قادر يتخلى عن الطرفين الي عم يمنحوا السعادة، سعادة الاستقرار وسعادة الي هي ممكن تكون الحب أو التغيير أو شي ما انوجد بالطرف الأول .. رغم أنو هو بيقنع حالوا أنو هو عم يضحي كرمال يرضي الطرفين .. 

نحن دايماً منحب نكون الضحايا، بس لو ركزنا شوي منشوف قديش نحن عم نجلد حالنا قبل ما نجلد الي حولينا. اليوم أنت ببساطة فيك تتخلص من حدا ما عاد قادر يقدملك غير الوجع والازعاج بضغطة زر .. بلوك وبتخفي هالشخص من حياتك، أنت مو قادر حتى تعطي فرصة تانية. البلوك أنحج وسيلة حتى تخرس كلمات الطرف التاني حتى خلص تريح حالك من همو .. هالزر أناني .. أناني كتير متلنا وانعمل لأنو بيناسب طموحنا، بيناسب قدرتنا على التحمل!

علاقتنا اليوم فاشلة بامتياز والدليل هو زر البلوك، ما تستغربوا ليش عم بكتب بالعامية وأنا الي بقدس الفصحى، بس لقيت أنو هالحكي طالع من غير جبران خواطر، مو خواطر بل أمر واقع. شو يعني أنك تكون مع حدا وعم تشاركوا تفاصيل أيامو وتقرر مصير هالعلاقة بكبسة زر، يعني أنو علاقتك ما كانت أكتر جدية من هالبكسة!

أنا زعلان منك .. بلوك

أنا بدي اتركك .. بلوك

أنا وياك تركنا .. بلوك

حياتنا صارت عبارة عن تواصل اجتماعي وموقع، لأنو لو في شي حقيقي ما كان رح يكون في بلوك يحدد نهايتو، كان في أنو تكتبلي مرسال، أنك تنطرني تحت البيت، أنك تدخل ألف واسطة حتى نرجع نحكي، كان في لذة للزعلة وفي لذة للقاء بعد شوق، بس يا ترى هاللذة نفسا موجودة بفك البلوك؟!

أصدقائي من قلبكون راجعوا محبتكون للناس الي حوليكون وعلاقتكون فيون، العلاقة الي بحياتكون بتنتهي ببلوك انهوا من هلق، وبعدوا فترة عن هالمواقع الي خلت حتى مشاعرنا عبدة للتكنولوجيا ومتغيرة متل ما بتغيير ميزات هالبرامج كل يوم! فكر إذا كنت فعلاً والي حوليك علاقتكون محصورة ببلوك ولا إذا هالشخص راح فعلاً أو زعل رح تخترع ألف طريقة لتكون معو وترجع إيلو .. فكروا بعيداً عن الذات الأنانية ولا تحصروا حالكون بأي قوسين .. مافي شي أسمو واقع وظروف واستقرار وحياة بدنا نعيشا .. في شي اسمو سعادة وأمل .. في نفس الله وهبك لسبب .. ففكر منيح شو هو السبب الي بخليك تكون مجرد اسم على قائمة الأصدقاء أو قائمة البلوك؟!