عارفين ايه الدرس الكبير اللي المفروض نتعلمه من الدنيا دي ؟!!!

واللي بنقعد بسببه نخرج من مشكلة نخش ف غيرها .. ونخلص من حاجة تطلع لنا غيرها وكل دا عشان ربنا يفهمنا الدرس ..

عارفين هو ايه ؟

ان حسابات ربنا ف الدنيا غير حسابات البشر ..

والمقاييس اللي ماشية عليها الدنيا غير مقاييسنا احنا ..

مثلاً عندنا 1+1 =2 .. دا بالنسبة لمقاييس البشر

لكن بالنسبة لمقاييس ربنا ممكن تساوي صفر او 100 او اي حاجة تانية ..

.....

مقاييس البشر بتقولك لو كلمتي شباب ع الفيس او اتبسطتي معاهم او قعدتي تتنططي ف كل فرح شوية حد ح يشوفك ويتجوزك ..

ومقاييس ربنا بتقولك ( ما عند الله لا ينال إلا بطاعته ) ..

....

تبقى عمال تحلم في احلام وتحط امنيات وف الآخر تقول لنفسك : ما انا حلمت قبل كدا وياما اتمنيت وما حصلش حاجة .. فمقاييس البشر تقولك فوق من الحلم وخليك ف الواقع بلا حلم بلا بتاع ..

ومقاييس ربنا بتقولك ..( انا عند ظن عبدي بي ) .. عند ظن عبدي .. مش عند حسن ظن عبدي ، يعني ما تجيش تتوقع السيء ولما يحصل تقول شفتوا انا انسان واقعي !! ما هو انت من الاول ظننت بربنا ظن سوء واهو اتحقق ، عاوز ايه يعني !!

......

يبقى قدامك هدف ونفسك تحققه وشايف انه مستحيل ..

بمقاييس البشر .. انت فين يا عم وهدفك دا فييين !!

وبمقاييس ربنا بيقولك ( والله على كل شيء قدير ) ، ومافيش حاجة اسمها مستحيل ، مادام فيه حاجة انا عاوز احققها نجح فيها غيري وحققها يبقى انا كمان اقدر احققها .. المستحيل دي كلمة محبطة وغير حقيقية ..

......

الخلاصة من كل الرغي دا ..

احسب حساباتك ف الدنيا بمقاييس ربنا مش بمقاييس البشر ، وماتقولش ( مش ممكن ) ولا ( مش معقول ) ، دا ربنا مقلب القلوب والدنيا بتتغير بأمره ف ثانية ، واركن حساباتك دي على جنب وزن الأمور بميزان صح

عشان الدنيا ف الاخر اللي خلقها ومقدر فيها كل حاجة هو ربنا ، وماشية بقوانين ومقاييس ربنا .. مش مقاييس البشر