قعدة صفا

مجدي الحمزاوي

( المكان خال تقريبا إلا من بعض الأشياء المتناثرة .. بحيث لا يوجد دال على زمن ما ولا إفصاح عن ماهية المكان .. مكان متسع .. ستوجد به بعض الاكسوارات والأشياء المهملة فقط .. يدخل الشخصيتان 1؛2 من ركنين متقابلين الى ان يصلا للمنتصف وتبدأ المواجهة)

1 إيه اللي جابك

2 وانت ايه اللي جابك

1 اللي جابني جابك

2 طيب بتسأل ليه؟

1 خلاص

2 انت بجد إيه اللي جابك؟

1 حبيت اقعد مع نفسي لوحدي شوية

2 وانا كمان

1 طيب ايه اللي جابك هنا؟

2 وانت ايه اللي جابك هنا؟

1 تاني؟؟ ماقلت جاي اقعد مع نفسي شوية لوحدي

2 وانا كمان جاي اقعد مع نفسي شوية ولوحدي برضه

1 اتنيل اقعد

2 أتنيل؟

1 اتفضل اقعد

2 أتفضل؟

1 هبب اللي تهببه

2 أهبب؟

1 يوووووه ملعون ابو دي شغلانة ( يمسك بخناقه)

2 هدي نفسك بس .. الحكاية كلها ان انا لاهاعرف اتنيل ولا اتفضل ولا اتهبب

1 اعمل اللي انت عاوز تعمله

2 ما قلت لك كنت جاي اقعد مع نفسي شوية ولوحدي

1 ما تقعد ياسيدي

2 انت عندك عيب في ودنك ولا حاجة؟ قلت جاي اقعد لوحدي

1 وانا كمان جاي اقعد لوحدي

2 طيب ايه العمل؟

1 من رأيي تتفضل تمشي من هنا

2 ما تمشي انت من هنا

1 لا مش ناوي امشي من هنا

2 وانا كمان مش ناوي امشي من هنا

1 طب ايه العمل؟

2 ( ينظر حوله في المكان) المكان واسع .. ممكن كل واحد يقعد في ركن مع نفسه وتقريبا هيكون لوحده

1 الأمر لله

2 شوف عاوز تقعد فين

1 أي حتة

2 لا اختار الحتة اللي هتقعد فيها عشان اسيبك واروح بعيد

1 ياسيدي اختار انت الأول

2 لا والله اختار انت الأول

1 حاضر عشان ما اتعبكش انا هاقعد هنا وانت تقعد هناك

2 اتفضل

(يذهب 1 للجهة الأخرى ويجلس)

2 بس انا كنت عاوز اقعد جنب الشجرة

1 المكان كله مافيهوش شجر

2 اصل انا متخيل ان في الركن اللي انت قاعد فيه ، فيه شجرة

1 طيب ما تتخيل شجرة في الركن بتاعك وتقعد مكانها

2 أنت ضيق الأفق ومفتقر للجمال .. ياصاحبي الشجرة في الركن بتاعك هتكون أجمل

1 طيب ما تتخيل المكان اللي انت قاعد فيه كله بمزاجك وشغل الجمال اللي انت قارفني بيه

2 تعرف ليه انا متخيل شجرة؟

1 لا ماعرفش ليه انت متخيل شجرة

2 ويتقول على نفسك مثقف؟

1 ياسيدي انا مش مثقف

2 لا باين عليك مثقف

1 على الطلاق ما انا مثقف

2 أنت متجوز؟

1 لا

2 طيب بتحلف بالطلاق ليه؟

1 خلاص ياسيدي

2 لا .. عيب قوي انك تحلف بالطلاق وانت مش متجوز

1 كنت عاوز اثبت لك وخلاص

2 تثبت ايه؟

1 ان انا مش مثقف ولا زفت

2 متأكد انك مش مثقف؟

1 متأكد زي ما انا متأكد ان في واحد غتت قدامي وبيكلمني دلوقت

2 كدا فعلا أنا عرفت انك مش مثقف

1 وعرفت إزاي؟

2 من تشبيهاتك

1 تشبيهات ايه؟

2 انت بتقول انك متأكد إنك مش مثقف زي ما نت متأكد ان في واحد محترم بيكلمك وقدامك دلوقت

1 لا انا قلت واحد غتت

2 وانا قلت محترم

1 وانا قلت غتت

2 وانا قلت محترم

1 لا غتت

2 كل واحد يقول براحته المهم انك تشبيهك بيدل على أنك غير مثقف

1 إزاي

2 لما قلت انك متأكد انك مش مثقف زي ما انت متأكد ان في واحد محترم قدامك..

1 ( مقاطعا) لا غتت

2 المهم لما قلت دا . عرفت انك مش مثقف

1 ليه؟

2 لأن أنا ممكن أسكت ومااكلمكش ... وثانيا ممكن آجي جنبك أو وراك ومابقاش قدامك . فبهذا يكون الاستشهاد غير سليم وبناء عليه انت لا تعرف ان تستدل أو تشبه جيدا .. إذن أنت غير مثقف

1 ( يصفق) برافو برافو .. واضح عليك انك ضليع جدا ومتمكن

2 يوووووووه . مابلاش أم الحيرة دي

1 حيرة إيه

2 يابني انت مش فاهم .. لما تقول علي ضليع ومتمكن ..فدا معناه أنك رجل واعي ومطلع وبناء عليه هتكون مثقف .. لكننا من لحظة واحدة توصلنا الى انك مش مثقف.. حاجة تحير دي والا لأ؟

1 ياسيدي مشيها من دا على دا؟

2 هو كشري يابني؟

1 أنا زهقت منك

2 وأنا كمان زهقت منك

1 طيب ارجع مكانك

2 وانت كمان ارجع مكانك

1 يابني انا في مكاني

2 نرجع للموضوع

1 موضوع إيه

2 الشجرة

1 يابني مافيش شجر

2 لو كنت مثقف كنت تتخيل الشجرة معايا . عارف ليه؟

1 قلت لك قبل كدا مش عارف ليه

2 طيب فكر

1 مش عاوز أفكر

2 مش عاوز تفكر ولا مابتعرفش تفكر؟

1 ما تفرقش

2 لا تفرق كتير يا صاحبي

1 أولا أنا مش صاحبك

2 وثانيا ..

1 تفرق أو ما تفرقش .. مايهمنيش

2 إزاي ما يهمكش؟

1 ياعم أنا حر .. ما يهمنيش .. (يكاد أن يشتبك معه)

2 (يبتعد) انت حر.. لكن إيه مسألة ان أنا مش صاحبك دي؟

1 انت فعلا مش صاحبي

2 مش صاحبك إزاي وانت قاعد تتكلم معايا ؟وجاي معايا في نفس المكان. والدنيا ليل ولوحدنا

1 انا مش جاي معاك .. انا جاي اقعد مع نفسي شوية ولوحدي

2 وانا كمان جاي اقعد مع نفسي شوية ولوحدي

1 وأنا مالي أنا ( يشتبك معه ) انا مالي بيك

2 ( يتخلص من قبضة 1) ياعم ما تخليكش عصبي كدا

1 ( بتانفعال شديد) انا مش عصبي ولا حاجة .. دا المكان اللي انت اخترته؟؟ صح؟

2 أيوا

1 خلاص اقعد في مكانك .. وماتتكلمش معايا خالص

2 ماقلت لك انا عاوز أقعد جنب الشجرة

1 ( بانفعال شديد.. ويجري وراءه و 2 يفرمنه) فين الشجرة؟ فين الشجرة؟؟

2 ما قلت لك .. الشجرة اللي أنا متخيلها

1 ما تتخيلها في مكانك يا أخي

2 لا في المكان دا مكانها الطبيعي

1 هيقولي طبيعي .. طبيعي إيه ياعم انت وانت هتتنيل تتخيل؟

2 أتنيل؟

1 أيوا ,, تتنيل عندك اعتراض؟

2 مش قلت لك ؟ بقيت عصبي جدا

1 أيوا عصبي جدا وباين علي هاقتل حد دلوقت

2 ياه .. أنت قاتل إذن

1 ( يلحق به ويطرحه أرضا) أيوه ياسيدي قاتل إذن .. وحالا هاقتل في تجربة عملية عليك

2 ياسيدي أنا مصدقك من غير ما تجرب

1 مصدق إيه؟

2 مصدق انك قاتل ومش مثقف ومش متربي كمان

1 أنا مش متربي؟ طيب هاوريك ( يهم بضربه)

2 اوعى تفكر إن أنا في الحالة الاستثنائية دي ممكن أغير موقفي؟ ثم أنا باردد الكلام اللي انت بتقوله عن نفسك و.. أنت قلت انك قاتل .. ومن شوية قلت أنك مش مثقف

2 طيب ومش متربي دي جبتها منين؟

1 باجوًد ياسيدي .. باحط التاتش بتاعي

2 طيب اسمح لي أنا كمان أحط التاتش بتاعي ( وهو جاثم فوقه)

1 انت هتعمل إيه؟

2 انت شايفني هاعمل إيه يعني؟

1 أوعى تكون هتضرب

2 لا مش هاوعى اكون هاضرب .. أنا هاضرب فعلا ( يضربه)

1 اضرب ياهمجي .. برضه انا مش هتنازل عن الشجرة ( يدفعه .. وينهض مبتعدا)

2 تاني الشجرة؟

1 أصلك مش عارف ليه انا مصر ع الشجرة؟

2 مش عاوز أعرف

1 ( يدير وجهه بعيدا عنه )جاهل

2 بتقول إيه؟

1 ما انا باقول كتير .. قصدك أي قوالة فيهم؟

2 اللي قلته وانت مودي وشك الناحية التانية

1 قلت .. جاهل

2 أنا جاهل؟

1 وانت بتاخد الكلام على نفسك ليه؟

2 مافيش إلا أنا وانت هنا

1 ودا مش مبرر انك تاخد الكلام لنفسك

2 مافيش إلا أنا وانت هنا

1 عارف انت مافيش إلا انا وانت هنا .. لكن برضه ممكن أكون افتكرت واحد تاني مش هنا, وقلت عليه كدا .. صح؟

2 ( في استسلام ) صح

1 عرفت...؟

2 (مقاطعا) كلامك صحيح انه ممكن .. لكن انا مش مرتاح للتبرير دا

1 بدال تعبان .. اقعد وبلاش الوقفة دي

2 ( يحاول أن يلحق به ثانيا) انت معمول من ايه ياجدع انت؟

1 شوف ياسيدي التحليل الكميائي لجسم الإنسان أثبت إنه مكون من ...

2 وانت انسان انت يابني آدم؟

1 شفت .. أنت فعلا تعبان .. وعقلك ابتدا يهيس

2 أنا؟

1 طبعا .. انت يابني مش داري باللي انت بتقوله

2 ياسلام

1 ياسلامين

2 يعني انا في نظرك مجنون؟

1 ما قلتش كدا .. لكن على وشك

2 طيب جنان بجنان ( يبدأ في محاولة اللحاق به وضربه أو قذفه بأي شيء من الممكن أن يكون متواجدا ( طبقا للمكان الذي اختاره المخرج ومهندس الديكور . وأن اختارا فضاء مجردا . فيمكن ل 1 فك حزامه أو حذائه .. الخ)

1 ( وهو يحاول ألا يلحقه 2) هدي نفسك .. مش كدا .. قل لي بس انت زعلان ليه؟

2 يعني تقول علي مجنون وما ازعلش؟

1 انا ماقلتش عليك مجنون

2 قلت على وشك

1 يعني لسه ما اتجننتش . وبعدين ياسيدي ممكن تلحق الوشك دا

2 وألحقه إزاي؟ إذا كنت مش عارف الحقك

1 بسيطة .. تفكر شوية في الكلام اللي بتقوله قبل ما يطلع منك

2 وإيه العيب في كلامي ياحشري؟

1 لأنك سألتني سؤال غبي جدا

2 اللي هو؟

1 انت سألتني ان كنت انسان . واردفتها بوصفي بني آدم

2 عندك حق ؟؟ صحيح انا غلطت في كلمة بنى آدم دي

1 لا دا مش موضوعنا .. موضوعنا إذا كنت انت فعلا عارف ان انا بني آدم . فبالضرورة كل بني آدم انسان . وبناء عليه فلا مجال للسؤال الغبي اللي انت سألته .. صح؟

2 صح.. تسمح لي أصحح السؤال؟ (يكونا قد وقفا وهدأت حركتهما)

1 اتفضل

2 وانت إنسان انت يا تور .

1 ( يبدو عليه الامتعاض)

2 لا بلاش تور دي

1 ( يبدو عليه الارتياح)

2 انت انسان انت ياحمار؟

1 ( يحاول ان يتكلم)

2 ( مقاطعا) أظن دا سؤال سليم ومافيهوش غلطة

1 ( محاولا استدراك الأمر وجعل الأمور تهدأ قليلا ) ياصديقي

2 انا مش صديقك

1 طيب شوف يا أخي

2 إذا كنت مش قابلك صديق هاقبلك أخ؟

1 شوف يا أنت .. واضح فعلا أن ضغوط الحياة مأثرة عليك. قصدي مأثرة علينا .. فإيه رأيك ننسى اللي فات ... ونحاول كل واحد مننا يقعد في الركن اللي اختاره بهدوء؟

2 كدا أحسن

1 يالا .. مع أن

2 (مقاطعا) انت عاوز تقعد جنب الشجرة . والمكان مافيهوش شجر.. , لكن انت بتتخيل شجرة . وتخيلها هيكون أحسن في الركن بتاعي .. صح؟

1 باقول يعني

2 ما تقولش حاجة .. اتفضل ياسيدي غير الأماكن بدل دا هيريحك ويريحني من كلامك الكتير

1 _ بجد

2 أيوا بجد ( يترك ركنه ويشير ل 1 بالانتقال اليه) اتفضل

1 أشكرك جدا

2 اتخيل شجرتك براحتك .. وانسى ان انا موجود خالص.. اتفقنا

1 ( يتفقد المكان ويبدو عليه بعض علامات التفكير والاشارات المبهمة)

2 ياااه .. أخيرا الواحد هيعرف يقعد مع نفسه شوية لوحده

1 لالا كدا في حاجة غلط

2 ( بصوت خافت) ولا انا سامع حاجة ولا هارد عليه ولو باض حتى

1 ( بصوت أعلى) أكيد في حاجة غلط

2 ( يدندن بأي أغنية)

1 فعلا في حاجة غلط ( بصوت أعلى )

2 ( برفع صوته بالغناء)

مرة واحد كان متضايق

حب يقعد شوية لوحده

1 انت سايبني وبتغني؟

2 ( يكمل الغناء بصوت أعلى وفيه الكثير من الضيق)

لقى واحد تاني بيتراذل

خلى شعوره يزيد عن حده

1 الأخلاق والمروءة انعدمت تقريبا اليومن دول

2 ( يشير بيده للسماء)

1 ( يهرش رأسه كمن يفكر . ثم تنفرج أساريره ويتوجه ل 2)

ما سألتنيش يعني ليه انا مصر ع الشجرة؟

2 وانا مش عاوز أعرف ليه أنت مصر ع الشجرة

1 براحتك

2 طبعا براحتي

1 طيب ماتزقش

2 أنا قربت لك؟

1 يعني انت بتزق في الكلام

2 ( يهدوء ورقة مبالغ فيها) انا مش عاوز أعرف ليه انت مصر ع الشجرة, وطبعا براحتي

1 انت متأكد إنك طبيعي؟

2 وانت متأكد إنك طبيعي؟

1 أنا فل الفل

2 طبب يافل. اتفضل سيبني لوحدي . أنا متضايق ومخنوق ومش عاوز اتهور عليك

1 انت متضايق؟

2 ( لايرد)

1 ومخنوق كمان؟

2 ( يرفع يده للسما ويتمتم ويبدو عليه الغيظ)

1 وبالرغم من دا مش عاوز تتهور علي؟

2 لا؛ أنا غيرت رأيي وهاتهور عليك

1 ( وهو يتراجع من أمامه) ياعم مش قصدي أضايقك

2 وهو انا من ساعة ماشفتك عملت حاجة غير انك تضايقني

1 تعرف. أنا حاسس إني أعرفك من زمان

2 وانا كمان حاسس اني اعرفك . وعشان كدا مش مرتاح لك( يلحق به ويمسكه)

1 ناوي على إيه؟

2 قلت لك هاتهور عليك

1 انت شايف ان التهور دا فعل كويس؟

2 ( مترددا في ضربه)

1 التهور تهور.. يعني مش حاجة صحيحة ومش عاقلة

2 ما انت جننتني (1 يهرب من قبضته)

2 أنا مش عارف ليه كدا ... وسط الناس أحس ان انا لوحدي .. ولما أحب اقعد مع نفسي شوية ما اعرفش

1 وإيه اللي مانعك؟

2 انت ياغتت .. مش سايبني في حالي .. كل شوية لك لكلك لكلك

1 يعني انت عاوز إيه دا الوقت؟

2 ولاحاجة

1 ودي اجيبها لك إزاي دي؟

2 ( يهم بالاتقضاض عليه ولكنه يتمالك نفسه) قصدي مش عاوز منك حاجة .. كل اللي انا محتاجه دلوقتى انك تروح مكانك وتسيبني في حالي

1 بس كدا

2 على الطلاق بس كدا

1 ( يحاول ان يفتح فمه ويشير)

2 ( يضع يده على فم و1 ويمنعه من الكلام) عارف انا مش متجوز فما يصحش احلف بالطلاق . فأنا آسف ياسيدي .. ( يدفعه) كل اللي عاوزه تقعد في مكانك وتسيبني في حالي

(1؛ يذهب لمكانه في تردد و2 يذهب في اندفاع.. يجلس ويحاول أن يبدو هادئا .. يحاول 1 العودة وفتح فمه ولكن 2 يتحسس الحزام أو العصا متوعدا فيعود 1 مضظرا... تمر ثوان على هذا الصمت ... تدخل موسيقى خافتة يستحسن أن تكون لكمان أو فلوت )

2 زهقت

1 زهقت

2 كل ما أحاول ابعد عنهم ييجوا يحتلوا وريدي

1 كل ما احاول اقرب منهم.. يبعدوني بتصرفاتهم

2 هم عاوزين ايه مني؟

1 انا مش عاوز منهم حاجة

2 عارف انه لازم يبقى لي دور في الحياة

1 أنا بحاول اعمل اللي علي فقط

2 لكن الدور دا هو إيه ولمين وامتى؟

1 لكن إيه عرفني ان اللي انا باعمله .. هو اللي لازم أعمله؟

( الإثنان معا .. كل واحد منهما يمسك برأسه ) آه

1؛2 زهقت فعلا( يقومان ويسيران بخطوات مترنحة وكل منهما غير مهتم بالآخر) ايه العمل؟ ( يجلسان في المنتصف و ظهر كل منهما للآخر)

1 خلاص ماعادش في شيء صحيح .. هي دي المشكلة

2 أعتقد إن المشكلة انه ماعادش في شيء مش صحيح .. ماعادش في شيء غلط

1 إزاي يعني؟ كل شيء تقريبا غلط

2 غلط بالنسبة لمين؟

1 للكل

2 غلط

1 إزاي؟

2 ماعادش في حد بيحس بالغلط .. كل واحد شايف ان اللي بيعمله صح

1 حتى لو كان غلط؟

2 ماهي المشكلة انه مش شايف انه غلط

1 والحل

2 إننا نعرف ان في غلط فنحاول نصححه .. البشر حوالينا اتقدموا مش لآنهم عملوا الصح

1 أمال إيه؟

2 لأنهم عرفوا الغلط أولا

1 يعني...

2 ( مقاطعا) يعني عرفوا مليون طريقة للغلط فمابيكرروهاش

1 وعشان كدا ابتدوا يعملوا الصح اعتمادا على أنهم عرفوا الغلط

2 أيوا .. مش عيب انك تغلط .. العيب انك تتعامل مع الغلط على انه صح أو تحاول تجمله او تعدله مع أنه في الأساس غلط

1 طيب وإحنا اللي بنعمله دا صح ولا غلط ؟

2 حدد اللي تقصده بكلمة إحنا... انا وانت تقصد ؟ والا عامة؟

1 ( يهرش في رأسه) بس تعرف

2 إيه؟

1 دا انت طلعت داهية .. وعمال تقول عن نفسك انك حمار ومش مثقف

2 ( ينتفض واقفا) أنا حمار..؟

1 دا اللي قلته عن نفسك من شوية

2 انا ماقلتش ان انا حمار ياحمار

1 بتشتمني؟

2 انت شايف ايه؟

1 تعرف ان الحمار فعلا مظلوم .. على فكرة دا بيفهم ؛عيبه الوحيد انه بيستحمل بني آدميين زيك

2 انت بتغلط

1 ابدا .. أنما باقول لك معلومة

2 وفرها لنفسك

1 وفرتها ... ( كمن يضع شيئا في جيبه) ارتحت؟

2 انت مستفز جدا

1 وانت كمان مستفز جدا

2 إيه اللي جابك هنا؟ مش اتفقنا كل واحد يقعد في مكانه؟

1 وانت إيه اللي جابك هنا؟ مش اتفقنا كل واحد يقعد في مكانه؟

2 طيب لو سمحت .. سيبني لوحدي وروح اقعد مكانك

1 طيب ليه انت ماتسمحش انك تسيبني لوحدي وتروح تقعد مكانك؟

2 ( ينظر إليه في امتعاض . . ولكنه يأخذ نفسه ويتحرك نحو الركن)

1 ( بصوت عال) على فكرة انت بتناقض نفسك

2 ( لايرد عليه)

1 ايوا ... انت لسه قايل حالا إن المشكلة بتكمن في اننا بنعمل الشيء الغلط وإحنا متوهمين إنه صح؟

2 ( يقوم ببعض الحركات الرياضية الحفيفة .. مثل فتح الذراعين أو الاثناء للإمام .. الخ)

1 واللي انت عملته دلوقتى أكبر غلط

2 ( يبدل حركته الرياضية لحركة ملاكمة عنيفة او كاراتيه)

1 مش هخاف منك لأنك متناقض

2 ( يتجه نحوه وهو يقوم بتلك الحركات ... فيتراجع 1 لركنه)

1 أيوا متناقض لإننا كنا بنتكلم حالا في موضوع مفيد وانت قفلته فجأة من غير مانوصل لشيء

2 ( يكون قد وصل إليه وأمسك به)

1 بلاش اسلوب العنف البدني الغوغائي دا .. وكلمني بالمنطق لو سمحت

2 ( يحمل 1 .. ثم يضعه برفق على الأرض ) مش انت جاي تقعد مع نفسك شوية ولوحدك؟

1 زي ما انت جاي تقعد مع نفسك شوية ولوحدك

2 جميل ... إذن دا كان الهدف من التواجد هنا ؟ صح؟

1 صح .. لكن ...

2 مفيش لكن .. وبما انك مثقف وبتفهم وضليع .. تبقى بالضرورة عارف ان اي شيء يعوق الهدف الأساسي هو موضوع فرعي ويجب التخلص منه أو عدم الالتفات إليه.. صح يا مثقف؟

1 صح .. لكن..

2 ماقلنا مفيش لكن ياسيدي .. بناء عليه فان نقاشنا الذي كان بمحض الصدفة هو شيء فرعي بيمنع كل واحد مننا انه يقعد مع نفسه شوية ولوحده

1 لكن النقاش اللي تم كان ممكن يوصل بينا لشيء

2 إيه هو؟

1 إيه هو اللي هو إيه يعني؟

2 الشيء اللي كنا هنوصله

1 المعرفة

2 معرفة إيه؟

1 معرفة السبب في اللي إحنا فيه؟

2 ولما تعرف السبب في اللي انت فيه هتعمل إيه؟ هتقدر تغيره؟

1 على الأقل احاول

2 حاول لوحدك ... أنا زهقت من المحالاوت الفاشلة

1 يبقى كانت محاولات غلط

2 غلط غلط .. أنا زهقت واكتفيت

1 والمعرفة

2 مالها؟

1 كدا مش هنوصل لها

2 مش عاوز أوصل روح أنت

1 ماينفعش اوصل لها لوحدي

2 يبقى ما تروحش

1 إيه ما اروحش دي؟ هي المعرفة دي قهوة هاروح اشرب شاي عندها

2 مش لازم شاي .. أطلب بليلة

1 انت بتهرج؟

2 آه

1 ودا مجال تهريج؟

2 براحتي

1 كدا غلط

2 إيه الجديد؟

1 مش ملاحظ انك ابتديت تبقى مستفز زيادة عن اللزوم؟

2 البركة في سيادتك

1 يعني إيه؟

2 يعني كل واحد يسيب التاني في حاله.. حضرتك جيت واخترت مكاني .. وبعدين قلت انك متخيل شجرة في المكان دا .. المكان اللي كان بتاعي انا ... سبت لك المكان تتخيل الشجرة براحتك .. يالا اتخيل الشجرة وحط لها كمان شوية عصافير .. أو قرود براحتك ... المهم مالكش صالح بي خالص .. انسى ان أنا موجود

1 انسى انك موجود إزاي. وانت بتكلمني

2 الصبر يارب

1 قصدك ان انا اتجاهلك واتجاهل وجودك؟

2 برافو عليك .. اتجاهلني.. أرجوك اتجاهلني .. أبوس إيدك اتجاهلني

1 ( يمد يده.. فيتوقف عند هذه الحركة 2 .. ولكنه يتمالك نفسه ويتجاهلها)

2 اقعد مع نفسك ومع شجرتك وسيبني مع نفسي .. اتفقنا؟

1 والله انا مش عارف اقول لك إيه؟

2 هتقول إيه؟

1 أصلي بصراحة يعني لما رحت المكان دا وجيت اتخيل

2 أيوه .. حصل إيه ياسيدي

1 لقيت المكان مش مناسب

2 مش مناسب لإيه؟

1 للشجرة

2 اللي هي فين؟

1 اللي هاتخيلها

2 طيب ما تتخيل المكان كله براحتك

1 مش فاهم قصدك

2 قصدي ياسيدي .. بما انك عاوز تتخيل شجرة

1 أيوه

2 والشجرة اللي انت مصمم تتخيلها مش ماشية مع المكان اللي انت فيه

1 أيواه هنقرب اهه

2 فسيبك من المكان هو كمان

1 يعني إيه؟

2 يعني بما انه لك القدرة على انك تتخيل الشجرة

1 أيوه

2 فشيل المكان الموجود قدامك بالفعل من دماغك

1 يعني؟

2 يعني تتخيل المنظر كله .. المكان والشجرة والقرود والنسانيس

1 قرود ونسانيس؟

2 ياعم زي ما انت عاوز

1 أنا فهمت قصدك

2 الحمد لله

1 انت قصدك ان انا انفصل عن الواقع خالص واتخيل الحالة اللي عاوز اعيشها ؟

2 صح؟

1 مش عيب عليك؟

2 عيب ايه ياعم المتخيل؟

1 أكبر عيب انك تعيش في واقع كله متخيل .. وتنحصر حياتك في احلام فقط وتخيلات أو احلام يقظة

2 عشان ترتاح

1 يا أستاذ الراحة مش اننا ننفصل عن الواقع ونتخيل ونحلم ... لازم تكون حياتنا شيء من الواقع مع شيء من الخيال . ونحاول نحققه كمان

2 يعني انت عاوز ايه؟ الشجرة اللي انت قارفني بيها تكون أحسن فين؟ تعالي ( يمكسه من يده ويسحبه للأركان) هنا ... والا هنا ... والا هنا...؟ اختار يالا

1 بصراحة؟

2 قول وخلصني

1 انا شايف انها في النص هتكون أحسن

2 ( يدفعه للمنتصف الأعلى) يعني هنا؟

1 أيوه

2 اتفضل ياسيدي .. اقعد واتخيل وعيش وما اسمعش صوتك تاني ( يدفعه في عنف ... يقف ا في المنتصف ويأخذ 2 جانبا) يووووووووووووه حاجة تقرف

1 يعني انت تخليني ابطل كلام وتتكلم انت؟

2 أنا اتكلمت؟

1 أيوا انت اتكلمت

2 ماحصلش

1 لا حصل .. انت لسه قايل حاجة تقرف ... وبصرف النظر عن انت تقصد إيه.. وكمان عشان المسامح كريم .. لكن طبقا للي انت عاوزه المفترض ماحدش فينا يسمع صوته للتاني

2 آسف كنت باكلم نفسي

1 وهي نفسك بعيدة قوي كدا عشان تزعق لها؟ كلمها في سرك يا أخي

2 ( يشير علامة الموافقة ويسد فمه بيده ويبتعد .. 1 يراقبه .. 2 يجلس ويخرج سيجارة ويحاول ان يشعلها)

1 إيه دا؟ انت هتدخن؟

2 أيوا انا هادخن .. عندك مانع؟

1 لكن الدكتور قال لك بطل تدخين

2 وانت مالك انت؟ ( يتذكر شيئا فيقوم ويتجه بعصبية نحو 1) هو انت بتراقبني ولا إيه؟ انطق؟ إيه اللي عرفك ان الدكتور مانعني عن التدخين؟ انت بتشتغل إيه ؟

1 ( يضحك)

2 ( يمسك به) انت هتنطق والا

1 ( وهو مازال يضحك ) بذمتك عمرك سمعت عن دكتور مامنعش اي واحد داخل له عن التدخين ؟ دا حتي في واحدة راحت لدكتور الأطفال قالت له ابني عمره شهرين وحاجب عينه الشمال بيوجعه .. رد عليها بكل آلية وقال لها خليه يبطل سجاير

2 بايخة

1 إيه اللي بايخة؟

2 النكتة اللي انت قلتها

1 دي مش نكتة دي حدث بالفعل

2 وانت منين عرفت ان انا رحت للدكتور؟

1 هو في واحد في سنك وعصبيتك دي ماراحش للدكتور؟

2 يووووووووووووه خلاص بلاش كلام .. سيبني في حالي وخليك في حالك

( ثوان صمت فيها الاثنان يسيران في المكان و1 في حالة تحفز ومراقبة ل 2 .. ثم يتعمد ان يكون في مواجهة 2 الذي يسير وهو ينظر للأرض فيصطدم به)

2 أسف... ثم مافيش أسف ولا حاجة انت جاي قدامي ليه؟

1 وانت جاي قدامي ليه؟

2 ( ينظر اليه في غضب . ثم يتركه وينصرف مبتعدا عنه)

1 انت ليه ماولعتش السيجارة؟

2 ولاحاجة .. افتكرت

1 افتكرت ان التدخين مضر بالصحة

2 لا افتكرت ان الولاعة مش معايا

1 طيب

2 مش عاوز منك حاجة

1 (يخرج ولاعته ويتجه ل2)

2 انت بتدخن؟

1 لا شايل الولاعة آخد بيها ثواب... إيه السؤال دا طبعا بادخن

2 والدكتور قال لك تبطل تدخين طبعا

1 طبعا

2 وانت....

1 قليل الأدب مابسمعش الكلام ومابعرفش مصلحة نفسي .. الخ الخ الخ

( يشعل الولاعة ويهم ان يشعل السيجارة)

1 انت عارف ليه أنا مصر ع الشجرة؟

2 ( ينتفض بعيدا دون أن يشعل سيجارته) ياسيدي مش عاوز أعرف ليه انت مصر ع الشجرة

1 يا أستاذ لازم تعرف

2 ليه لازم؟

1 عشان ... عشان انت بتدور ع المعرفة

2 لا مابدورش عليها ... أنا سايب لك نصيبي من المعرفة ... وألا اقول لك سايب لك المعرفة بحالها وانا هابقى اتفاهم مع الناس التانية

1 ماهو المعرفة في حد ذاتها مالهاش لازمة إلا لو شاركناها مع حد

2 شوف لك شريك غيري

1 ماهو مافيش غيرك هنا

2 يعني انا أعمل فيك إيه؟ استنى انا هاعمل معاك صفقة

1 صفقة إيه؟

2 شوف انا هاخليك تقول لي ليه انت مصر ع الشجرة بشرط ندخل في تحدي مع بعض

1 ندحل في تحدي مع بعض؟ وماله.. تحدي إيه؟

2 نشوف أكتر واحد فينا يقدر يقعد من غير مايتكلم .. واللي ينطق قبل التاني يدفع كل اللي في جيبه ... وبعدين أعرف منك ليه انت مصر ع الشجرة

1 ( يحاول ان يعترض أو يتكلم)

2 خلاص نبتدي من دلوقتى ( كل واحد منهما يذهب لركن ..يجلسان .. لكن 1 ينهض ثم يجلس ثانية ثم ينهض .. يضع يده في جيبه ثم يتجه ل 2)

1 ماهو لازم تعرف انا مصر ليه ع الشجرة؟

2 إحنا مش اتفقنا...

1 ( مقاطعا وخد أخرج جيوبه فارغة تماما) آدي كل اللي في جيبي.. اتفضل

2 ( في ضيق) إنت معمول من إيه؟

1 ( بهدوء) والله .. في ناس بتقول من عسل وناس بتقول سكر وناسبتقول مربى

2 انت معمول من زفت

1 ( بنفس الهدوء) والله دا رأيك

2 أيوا رأيي... عندك اعتراض

1 ماعنديش اعتراض ... ولكن للعلم رأيك لا يمثل لي أي اهمية .. باختصار مايهمنيش

2 وبما ان رأيي لا يمثل لك أي أهمية ... كابس على نفسي ليه؟

1 انا مش كابس

2 لا كابس وبشدة

1 مش كابس

2 انت مش ممكن يا أخي .. انت طايق نفسك ازاي؟

1 أنا أخوك إذن؟

2 مين قال كدا ؟

1 انت حالا قايل كدا

2 غلطة ياسيدي

1 وليه تغلط؟

2 ياسيدي أنا حمار

1 أي نعم .. انت حاليا افضل بكتير

2 إزاي؟

1 ابتديت تحط رجلك على أول طريق الحقيقة والمعرفة باعترافك دا

2 أنت ناوي تجنني؟ طيب انا هاتجن عليك( يحاول ان يفتك به)

1 ( وهو يتجنب الامساك به) قول انك بتعمل كل دا عشان تهرب من اتفاقك وترجع في كلامك

2 أنا عمري مارجعت في كلامي

1 طيب يالا نفذ الاتفاق اللي انت قررته بنفسك

2 اتفاق إيه؟

1 انك تسكت وتهدا وتعرف ليه انا عاوز شجرة

2 ليه؟

1 في بيننا اتفاق

2 اتفاق ايه

1 إننا نقعد اسكتين واول واحد يتكلم التاني ياخد اللي في جيبه .. وبعدها تقعد وتعرف ليه انا عاوز شجرة

2 انت أول واحد اتكلم

1 نعم انا أول واحد اتكلم

2 وبعدين

1 تاخد اللي في جيوبي وتقعد عشان تعرف

2 ماهو مافيش حاجة في جيوبك

1 هو دا اللي فيها ... واتفاقنا كان على فيها

2 اللي فيها..؟ اللي فيها لاشيء

1 خده حلال عليك

2 آخد لاشيء؟!

1 اتفاقنا كدا

2 الاتفاق بيكون على شيء مش لاشيء

1 معظم الاتفاقات بتكون كدا في اعتقادي

2 بتكون إيه؟

1 على لاشيء

2 ( يهم بالكلام)

1 لكن المهم ازاي يتنفذ

2 اللي هو إيه؟

1 اللا شيء

2 ( يشيح بيده ويبتعد)

1 ماتهربش

2 اهرب منك انت

1 دا الواضح

2 أنا بس

1 بس إيه لو كنت انت اللي اتكلمت الأول كان هيحصل

2 كنت هتاخد اللي في جيوبي

1 اللي هو إيه؟

2 وانت مالك؟

1 لا مالي

2 ( يشيح بيده)

1 ( يلتف ويواجهه ) وريني اللي في جيوبك

2 مالكش حق في دا

1 لا لي حق في دا

( يتصارعان وينزل 2 لمستوى وسط 2 ويخرج جيوبه فارغة.. لحظات صمت فيها بعض انكسار من 2 وحاةل زهو من 1 .. من الممكن أن تكون هناك بعض الموسيقى في الخلفية)

2 ( يرفع يده مستسلما) اتفضل ياسيدي قول ليه انت عاوز شجرة

1 بجد عاوز تسمع ليه انا عاوز أتخيل شجرة؟

2 لا أنا مش عاوز اسمع ليه انت عاوز شجرة.. بس هاحترم كلمتي .. ويالا ماتاخدش وقت كتير قبل ما ارجع في كلامي

1 في واحد اسمه بيكيت كان كاتب نص مسرحي اسمه في انتظار جودو .. اتنين زينا كدا وشجره .. وهم بيستنوا

2 إيه اتنين زينا دي ؟ اتكلم عن نفسك أنا لا أنتظر أحد

1 يعني

2 ثم الاتنين اللي بينتظروا جودو دول .. جودوا جالهم؟

1 لا

2 وفضلوا منتظرين؟

1 أيوا

2 أغبياء

1 ليه أغبياء؟

2 لأنهم انتظروا مالن يأتي

1 كان عندهم أمل

2 في إيه؟

1 إنه ييجي؟

2 مين؟

1 جودو

2 وهم كانوا عاوزينه ليه؟

1 ... أكيد لشيء ضروري

2 ضروري جدا يعني؟

1 أيوا وإلا ماكانوش انتظروه المدة دي كلها

2 مادام هو شيء ضروري .. بدل ماينتظره يروحوا له

1 يروحوا لمين؟

2 لجودو.. اللي منتظرينه

1 ( حائرا) يروحوا له؟؟ يروحوا له إزاي ؟ انت مش فاهم... دي دعوة للانتحار.. أنت مش فاهم

2 أنا برضه اللي مش فاهم؟ والا انت بتحاول تمثل شيء قريت عنه أو قريته وخلاص

1 الموضوع مش كدا خالص

2 كدا او مش كدا .. انا وفيت بوعدي وسمعت منك انت ليه متخيل شجرة.. صح؟

1 صح

2 خلاص.. أرجوك سيبني في حالي وشوف حالك بعيد عني

1 واضج انك مش فاهم انا باتكلم عن إيه؟ تلاقيك مش عارف لا بيكيت ولا النص المسرحي اللي باتكلم عليه .. وبالتالي مش عارف علاقته باللي باتكلم عنه

2 ياسيدي والله عارف .. ومش عاوز اعرف علاقته باللي بتتكلم عنه

1 حاول تعرف

2 مش عاوز ياغبي

1 انا غبي؟

2 طبعا\

1 شوف انا مش هتخانق معاك ... لكن تقدر تقول لي انت حكمت بغبائي ليه؟

2 اولا لأن النص اللي بتتكلم عنه فيه شخصيات تانية مش اتنين بس

1 هايل .. انت عارف اهه .. لكن دا لا يبرر وصفك لي بالغباء

2 ثانيا انت مش فاهم بالضبط إيه معني ان الاتنين الأغبياء بتوعك بدل مايستنوا جودو يروحوا له بدل عاوزينه في شيء ضروري ... بدل حياتهم كلها ماتضيع في الانتظار

1 كلامك صح شكلا .. لكن موضوعا لا

2 إزاي؟

1 انت فاجأتني ... لكن ازاي يروحوا لجودو إذا كان بيكيت نفسه عنده شك في وجوده

2 ودا اكبر دليل على الغباء انك تنتظر ماتعتقد انه ليس موجودا في الأساس

1 طيب وإذا قلنا زي شوية ناس انه بيعتقد في وجوده

2 يبقى يروح له أفضل مما ينتظره

1 الحكاية مش كدا

2 واضح انك عاوز تدخلني معاك في مناقشة مثقفين

1 مش فاهم

2 يعني نقعد نتكلم في كل حاجة من غير مانطلع بحاجة

1 مجرد الحديث شيء كويس\

2 مش كويس

1 أنا رأيي

2 مش عاوزه

1 مش عاوز إيه؟

2 مش عاوز رأيك.. احتفظ بيه لنفسك وروح بعيد عني ( يدفعه ويمضي للجهة الأخرى

( فترة صمت ثوان قليلة ثم يندفع 1 ل 2 بعصبية)

1 انت بتقول ان مافيش شبه بينك وبين اللي باتكلم عنه.. صح؟

2 ( يشير له بالانصراف بعيدا)

1 دا لأنك انت اللي غبي ... الحقيقة قدامك ومش عاوز تشوف

2 ماشي انا غبي ... يالا روح بعيد

1 ومتناقض كمان بتحكم ع الناس بشيء انت أساسا مابتعملوش

2 ( يلتفت اليه ويواجهه) انا متناقض؟

1 أيوا

2 دي هتنضرب فيها ( يهم بضربه)

1 غبي ومتناقض ومندفع ومابتتعلمش .. فاكر لما انت قلت على ان انا غبي؟

2 ما انت غبي فعلا

1 هاتجاوز عن دي ليس عن ضعف

2 وانت تقدر تعمل إيه يعني؟

1 يا استاذ لما انت وصفتني بالغباء .. قلت لك ليه حكمت بدا صح؟

2 تقريبا

1 بتهرب من الاقرار بالواقع

\2 ماشي ياسيدي .. صح

1 إذن لما اقول عليك انك متناقض تحاول تعرف انا حكمت بدا ليه بدل ماتدخل حرب انت فيها خسران معنويا حتى لو كسبت ماديا

2 يعني انت عاوز إيه؟

1 انت متناقض

2 تاني؟

1 لما اقول عليك انك متناقض واجب كانسان متحضر انك تسأل ليه؟

2 يعني انت شايف ان انا متناقض؟

1 ايوا

2 وغبي ومش متحضر وهمجي كمان

1 يعني

2 مايعنيش .. ماشي ياسيدي انا كل دا وسيبني في حالي الله يخليك( يدفعه ويأخذ الجانب الآخر)

1 أنا عاوز أفهمك

2 ياسيدي مش عاوز أفهم .. وعشان ترتاح انا هاسيب لك المكان وامشي .. ارتحت ..( يهم بالخروج .. لكن 1 يقف في وجهه ممانعا)

1 مش هاسيبك تهرب

2 ( يحاول الافلات منه)

1 ( يمنعه) انت بتقول انك كنت جاي هنا عشان تقعد مع نفسك شوية ولوحدك صح؟

2 أيوا .. لكن للأسف لقيتك

1 ولقيتها؟ لاقيت نفسك؟

2 ( يفاجأ .. ويفكر ثانية) ما انت كمان كنت جاي هنا عشان تقعد مع نفسك شوية ولوحدك..صح؟

1 صح

2 ولقيت نفسك؟

1 كنت بحاول

2 لكن مالقيتهاش .. صح؟

1 تقريبا

2 مافيش تقريبا.. لاقيتها ولا لأ؟

1 لا أنا لقيتها ولا انت لقيتها .. ولكن بالرغم من دا كنت قاعد تنتظرها تيجي لك.. زي الاتنين الأغبياء اللي مش عاجبينك بالضبط

2 ما انت كمان كنت قاعد تنتظر نفسك ... وكنت بتحاول تضيع الوقت بكلامك الرخم طول الوقت

1 انا كان عندي اقتناع بسيط ان نفسي ممكن تيجي لي في أي وقت هي تختاره .. أما انت فمن الواضح انك غير كدا\

2 إزاي يعني؟

1 يعني انت مش مع فكرة الانتظار المطلق .. فليه بتنتظر نفسك .. ماتعمل مع نفسك زي ماطلبت منهم انهم يعملوا مع جودو

2 قصدك؟

1 أيوا .. حاول تروح لنفسك .. دور عليها بدل محتاجها في شيء ضروري

2 عشان اخلص منك بس .. هاخدك على قد عقلك بعد إذنك

1 على فين؟

2 هاسيبك واروح ادور على نفسي .. وانت افضل هنا مستنيها

1 للأسف انت مش هتعمل كدا .. هتروح تدور على مكان تاني .. تجتر فيه الذكريات .. ومحاولة لوم الآخرين والظروف

2 مش هناقشك .. خليك هنا ولما نفسك تيجي لك سلمي لي عليها

1 انا كمان ماشي

2 ليه؟

1 أصلي مش عارف هي اللي هتيجي واللي انا اللي ادور عليها . والا إحنا الاتنين لازم ندور على بعض

2 جايز تكون نسيتها في مكان

1 والا مع شخص

2 او دفنتها تحت شوية حاجات مالهاش لازمة

1 أو هربت في يوم ماكنتش فيه انت نفسك

2 يوووووه انت هتجرني للكلام تاني . سايبها لك وماشي

1 وانا سايبها لك وماشي

( يخرج كل واحد منهما من اتجاه .. ثوان بسيطة ويدخلان كل واحد منهما من خروج الآخر )

2 إيه اللي جابك

1 وانت ايه اللي جابك

2 اللي جابني جابك

1 طيب بتسأل ليه؟

2 خلاص

1 انت بجد إيه اللي جابك؟

2 حبيت اقعد مع نفسي لوحدي شوية

1 وانا كمان

2 طيب ايه اللي جابك هنا؟

1 وانت ايه اللي جابك هنا؟

( تبدأ الإضتء في الخفوت)

2 تاني؟؟ ماقلت جاي اقعد مع نقسي شوية لوحدي

1 وانا كمان جاي اقعد مع نقسي شوية ولوحدي برضه

2 اتنيل اقعد

  (إظلام)