كتير مننا بيحس أنه شاف مواقف قدام عينيه قبل كده، زي اقاعدة مع الأصحاب، أو كلمة أمك قالتها، ساعات بنحس أنها حلم وساعات بنحس فعلًا أننا عشنا اللحظة دي بكل تفاصيلها مش مجرد حلم، بس العلم فسرلنا الظاهرة دي وعرفها باسم ظاهرة ديجافو، إيه هى ديجافو دي وايه أسبابها دا اللي هنعرفه دلوقتي.

ديجافو هى ظاهرة بيمر بيها أغلبنا بيحسوا أن موقف معين في حياتهم اتكرر قبل كده أو شافه في خياله أو مألوف لعينه، وبتمر لثواني في عقله، وكلمة ديجافو هى كلمة فرنسية معناها وهم استباق الرؤية.

العلماء بيقولوا أن الشباب هم أكثر فئة بيلاحظوا هذه الظاهرة وخاصة ما بين ٢٠ ل٢٥ سنة، وأن أول مرة ممكن يحس بيها الإنسان وهو عمره من ٦ ل١٠ سنوات.

تفسير الموضوع دا عند علماء النفس أن الإنسان ممكن يكون مر بموقف مشابه قبل كده فالمخ بيستعيد الذكريات دي حتى لو مرت سنين طويلة، وبيقولوا أن أما يحصلك ظاهرة الديجافو دي دا دليل أن عندك رغبة قوية في تكرار تجربة عملتها في الماضي.

أما علماء ما وراء الطبيعة فبيقولوا أن الظاهرة دي تتعلق بتجربة حياتية عشنها قبل قدومنا للحياة، وعلى الرغم من التقدم العلمي مفيش نظرية مؤكدة تفسر لنا الموضوع دا بشكل علمي صحيح.

ولكن التفسير الأكثر دقة والأقرب للتصديق هو أن الذاكرة بيحصلها نوع من التشويش بسبب تشابك الأعصاب المسئولة عن الذاكرة قصيرة المدى وطويلة المدى، فساعات بتطلق مشاعر خاطئة تقولنا أننا عشنا الموقف دا قبل كده.

آخر نظرية تتعلق بخاصية الرؤية، وبتقول أن أحد العينان بتسجل الواقعة قبل التانية، فبعد مرور ثواني بسيطة أما تشوفها العين التانية بتحس أنك شوفته قبل كده، بمعني أن في عدم توافق في التوقيت الزمني بين نصفي الدماغ الأيمن والأيسر.

احنا كده قولنالك كل النظريات اللي العلماء حاولوا يفسروا بيها الموضوع دا، مع تأكيد مفيش تظرية واحدة متأكدين منها ١٠٠٪، أنت بقي إيه أقرب تحليل لتصديقك.