قصيدة أمي يا غالية .. كتبت باللهجة العامية المصرية .. في أحد مناسبات الاحتفال بيوم ميلاد الأم
********************************************************************
أمي يا غالية
هاكتب إيه وهاقولك إيه
تعبك معايا .. كل الكتابة شويه عليه
لو في مثيلك .. في الدنيا غيرك .. بيحبني ويخاف عليا
كنت أقول ده حب زايد .. ممكن يتوجد في الدنيا
لكن يا أمي ده ما في مثيلك .. حب بصدق وتضحية
********************
أمي يا غالية
كل ما باكبر .. أحس بقيمتك
كل ما ألف وأشوف وأتعلم .. أعرف أنك
واحدة وبس .. ولازم أحس
إن سعادة قلبي معاك .. قبل سعادتك
إن اللحظة معاك .. بتسوى بالنسبة لي .. كل الدنيا
إن البسمة وسط شفايفك .. ضله ومايه
وارجع تاني .. واقولك إيه .. إمي يا غالية
********************
أمي يا غالية
حب الدنيا .. كله في قلبي .. كله علشانك
حب لذاتك .. قبل صفاتك
حب طبيعي .. ولأفعالك
حب ياليت .. يوصل ويبارك
حب يقولك .. أمي يا غالية
*******************
أمي يا غالية
عشت وطبت.. سعيدة هنية
ويارب .. يكثر أفراحك
ويعلي .. في الجنة مقامك
وتشوفي .. ولادك واحفادك
والفرحة .. معاهم على بابك
بيحوطوكي ويهنوكي .. بسنة حلوة جديدة لجنابك
********************* د. أحمد حسنين
-
D. Ahmed Hassanienخبير إدارة المشروعات واستشاري الادارة الاستراتيجية ،باحث في مجال العلوم الإدارية والتنمية البشرية ،كاتب ومفكر استراتيجي ، له العديد من المقالات والمؤلفات .